【年度食材冠軍雞翼】現場直擊！新假期 x 煤氣烹飪中心母親節雞翼烹飪班 母子/女雙人拍住上溫馨煮雞翼餐過節！
撰文：Sam 攝影：Scott
雞翼高票勝出！年度「我最喜愛食材選舉2019」冠軍
《 新假期 》早前舉辦了年度「 我最喜愛食材選舉2019 」，希望更了解香港人口味，當中有10款搜尋率最高的話題食材，供讀者投票，歷時2個月的投票，冠軍食材終於誕生，由雞翼以31,816當選，成為港人2019年度食材冠軍！
現場直擊！新假期 x 煤氣烹飪中心 親子雞翼烹飪班
記者到現場發現，有不少子女攜同母親一同參加烹飪班，約有20人左右。課堂一開始，Annie會先講解雞翼不同部分煮法，然後由切、醃製和煮雞翼等等過程都會詳細示範，學員亦可以隨時發問，Annie會為大家一一解答。示範完便到學員親自下廚，Annie會與助手從旁協助大家，子女與母親一起下廚，場面好溫馨！
1.泰式香葉炒雞球
多名學員表示起骨步驟最困難，Annie表示，「一啲都唔難，最重要係把刀夠利，對準位就好易起（骨）。」
材料：
300克雞肉、3-4片檸檬葉（要撕開）、半個紅洋葱（切條）、1隻紅辣椒（切角）、1-2隻指天椒（持圈）、1/2-1茶匙紅咖喱醬（可用少許油拌稀）、1-2棵九層塔（取葉）
雞球是用雞鎚起骨而成，香軟彈牙，加上撲鼻的紅咖喱香，這道充滿泰國風情的菜式，令人胃口大開。
醃料：
1茶匙紅咖喱醬、1湯匙魚露、1茶匙糖、1茶匙生粉
做法：
- 雞肉沖淨及抹乾，切小件，與醃料拌勻待片刻。
- 燒2湯匙油爆香雞件，加檸檬葉、辣椒、紅洋葱及咖喱醬一齊炒至香味溢出。
- 雞熟後加獻汁，最後加九層塔葉快手兜數下，上碟。
2.花雕醉轉灣
除了泰式香葉炒雞球，Annie還教另一款菜式「花雕醉轉彎」。
材料：
6隻雞翼、1湯匙薑汁、1 1/2茶匙鹽
花雕醉雞汁：
1/2杯花雕酒、1/2杯糟鹵
做法：
1.雞翼沖淨，先用薑汁搽勻，再搽上鹽，醃15分鐘。
2.把雞翼排放碟上﹐隔水用中火蒸10-12分鐘。取出，蒸好的雞翼用飲用冰水浸涼、使皮爽脆。斬件或保留原隻。
3.花雕醉雞汁拌勻試味，可隨意加些糖及多些花雕酒使酒味更濃。
4.把雞翼排放一深碟內，加花雕醉雞汁浸過雞翼，待數小時，或放雪櫃至翌日成涼菜。
3. 薑汁南瓜露
教完2款雞翼菜式，Annie還示範煮糖水，「薑汁南瓜露」，由買南瓜到煮糖水的過程都一一為大家講解。
材料：
1000克南瓜、150克薑、8-10碗水、適量冰糖或白糖調味（可配小丸子、有餡湯丸）
做法：
1.南瓜去皮切粗粒；切出8厚片薑及預備2-3湯匙薑汁。
2.南瓜及薑片放水內煮至南瓜腍爛及薑味香濃。取出薑片。然後放攪拌機內攪成香滑糊狀。
3.放回鍋內，加入適量糖煮溶。最後多加些薑汁即可品嚐。
註：可加入煮熟小丸子、有餡湯丸更為豐富。
學員：學到嘢！烹飪技巧簡單易明
學員Esther與男朋友的媽媽來學煮雞翼，她指Annie教得非常好，「風趣幽默，由教揀食材到刀至煮食技巧都解釋得好好，好仔細又簡單易明！」
學員Calwan指，自己都有下廚經驗，「成個過程都開心，媽咪幫到我好多，因為我拎平時拎細刀或者剪刀煮嘢食，驚拎大菜刀。」他表示，平時煮西式菜式多，所以覺得今次烹飪班好有挑戰性。
Calwan最滿意是泰式香葉炒雞球，「炒出黎真係好香，而且顏色配搭都好鮮豔，配料十足超級豐富，味道唔會話好濃味，但係辣辣地幾惹味，色香味俱全！」
學員KaKa因母親沒有空，決定自己一個挑戰煮雞翼。她指，自己不懂烹飪，雞手鴨腳，但想嘗試來上堂學廚，「好好嘅嘗試，想整畀媽媽食，自己都可以食埋一份。」
學員Tiffany表示，「因為我媽咪屋企好悶，所以帶佢嚟玩，」煮完2款菜式後，她指上完堂令她重拾一點點信心，母親節會嘗試煮大餐，如果母親肯食的話。
錯過咗今次雞翼烹飪班嘅朋友，唔使擔心，我哋將會聯乘更多品牌合辦有趣年度食材-雞翼活動，記得密切留意住我哋嘅介紹喇！
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
