平民下午茶! $20 豉油雞髀加紅豆冰 |太子有咩好食|

超抵$20下午茶 豉油雞髀 配紅豆冰

見到 阿媽靚湯以為淨係得湯水飲，原來仲有其他嘢食，碟頭飯、米線、拉麵，連烏冬都有。一到晏晝2點半下午茶時段就開始多人，因為呢度下午茶夠平，$30有找。最平下午茶餐， 豉油雞髀 配紅豆冰只係$20，相比起坊間的價錢平好多！

豉油皇雞髀 配紅豆冰 $20

雞髀size適中，肉質夠嫩滑juicy，但豉油味唔算好入味，中規中矩。

Cappucino紅豆冰

除咗原味紅豆冰，仲有Cappucino紅豆冰、奶茶紅豆冰、杏仁霜紅豆冰和好立克紅豆冰，加$2就轉得。記者試咗Cappucino紅豆冰，紅豆份量都有1/3杯，Cappucino味都突出，紅豆甜甜哋可以令Cappucino冇咁苦，不過帶點酸味，整體覺得唔太夾。不過，想試嘅朋友都可以挑戰吓。

迷你西多

食完雞髀唔夠喉，可以加$9要件迷你西多。迷你西多份量係平時食開西多士嘅一半，西多外層炸得香脆，但略嫌花生醬唔夠多，多士有d乾身。

飽肚細碗飯 $30有找

下午茶唔止有雞髀同紅豆冰，仲會有$30有找嘅細碗飯，有雞飯、叉燒煎蛋飯 、酸菜滷肉飯、鰻魚汁肥牛飯、香酥豬扒飯等等，畀食量較大嘅朋友選擇。不過相比起雞髀，細碗飯嘅味道就麻麻哋喇。
叉燒煎蛋飯 $24

叉燒好dry，而且肉質較粗糙，食落好「嚡口」，豉油味道有d淡。

薑蔥霸王雞飯 $26
一共有4款雞飯，沙薑雞飯、麻醬雞飯、切雞飯和薑蔥雞飯，而薑蔥雞飯比其他雞飯貴$1。薑蔥幾香口，切雞肉質都算滑，味道正常。

阿媽靚湯
地址：太子太子道西100號地下B舖（顯示地圖）
營業時間：星期一至六 7am-11pm；星期日休息
電話：2398 1933
想知更多吃喝玩樂、扮靚資訊，就快d like Sam拍胃 facebook page啦！