錦田摩洛哥風Cafe｜土耳其洞穴打卡位＋沙漠感異國風情＋寵物友善
廣告
因為疫情關係，莫講話踏出亞洲，就連澳門都去唔到，真係好掛住外遊嘅感覺呀！最近發現錦田開咗間新摩洛哥風Cafe，裝修充滿異國風情，好似去摩洛哥走咗轉咁，開業僅僅兩星期，就已經吸引咗長長人龍排隊潮聖，網民更表示朝早10點去到拎完籌都要等到下午4點先有得入座，等記者帶你睇吓呢間餐廳有咩咁吸引！
錦田新開摩洛哥風Cafe！
土耳其洞穴打卡位＋沙漠感異國風情＋寵物友善
位於錦田紅磚屋市集嘅La Cafeteria，最吸睛嘅地方就係門口個室外打卡位，仿如土耳其洞穴嘅設計，配合聖母像、花草植物、木製窗戶及擺設，喺藍藍晴天嘅時候去，真係好似去咗歐洲島嶼一樣！加上亦係寵物友善餐廳，可以週末帶住毛孩一齊去郊遊。
餐廳提供食物種類唔算多，主要提供小食、薄餅、三文治、甜點及飲品。不過價錢都算合理，最貴嘅薄餅都只係$130，味道質素都有返咁上下。另外飲品價錢都相對平，咖啡及茶不論冷熱口味，全部都只係$35杯，反而梳打水同礦泉水最貴，要成$40杯，睇嚟今次見字都未必會飲水！
餐廳分室外及室內座位，位置數目唔算多，但勝在環境非常適合影相，而最重點嘅洞穴打卡位並唔會坐人，所以只要乖乖地肯排隊就一定影到靚相。
不過由於錦田紅磚屋只限星期六、日及公眾假期開放，連帶呢間餐廳都只會開係週末，想打卡記得要預早去到排隊拎定籌先。
餐廳亦有樣加分位，就係員工服務態度都好好，亦會主動提出幫客人影相打卡，就算情侶閨密去到都唔驚無張合照見得人啦！
- 地址：元朗錦田錦上路祠堂村地段390至400紅磚屋（顯示地圖）
- 營業時間：星期六、日及公眾假期 10:30am – 7:30pm
- 電話：2482 2188
- Facebook專頁：La Cafeteria HK
- Instagram專頁：@lacafeteria_hk
- 注意事項：
1）只接受walk in，早上10時會現場拎籌，不設預約。
2）只收現金 - 交通：由錦上路地鐵站B出口步行至紅磚屋，需時約15分鐘左右
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
圖片來源：新假期編輯部、IG
