牛頭角「金飯館」人氣炒飯專門店！鑊氣椒鹽豬扒飯限量供應＋沙嗲牛肉燶邊蘭王蛋炒飯｜區區搵食
廣告
牛頭角「金飯館」，外表看似一間新開茶餐廳，但實情是家主打炒飯的專門店，供應一系列鑊氣碟頭飯、泡飯及炒飯，無論是用料、做法都較一般茶餐廳講究，怪不得開業不久，就成為了附近街坊開飯的熱點，究竟餐廳有咩咁好食？即睇介紹！
撰文：Zero｜圖片來源：金飯館
「金飯館」炒飯專門店 牛頭角必食鑊氣碟頭飯！
牛頭角食肆一向臥虎藏龍，最近在車水馬龍的牛頭角道，就開了家「金飯館」餐廳，起初聽名字，以為跟一般賣茶記小炒無分別，但翻開餐牌，才知這是家主打炒飯的「炒飯專門店」！餐牌十分清晰，分炒飯、經典有汁飯及泡飯三大類別，每款都有5-8款選擇，另外有五、六款小食。敢以專門店自居，對食物自然有信心，當中用料就十分有要求。店內的炒飯均用泰國米，貪其米香突出，再加入湖北蛋來快炒，每碟炒飯出來，米飯都被蛋汁包裹，粒粒炒得金黃乾身，蛋香米香並重！
必食椒鹽豬扒食 每小時限賣4份！
說到店子最受歡迎的椒鹽豬扒飯，就特別選用豬肋骨旁豬排的位置，再以秘製醬料醃足4小時，最巴閉是廚師會逐塊替豬扒按摩，令醃料融入豬肉中，同時亦令豬扒入口更加鬆化。除了豬扒外，其他「配角」亦充滿細心位，炸豬扒的油選用較健康的芥花籽油；椒鹽及辣椒亦是即時生炸，不會預先炸好。怪不得椒鹽豬扒一上枱，充滿香噴噴的椒鹽香！由於椒鹽豬扒飯即叫即做，故每小時限量供應4份，認真誇張！
椒鹽、豬扒都是即叫即炸，香氣誘人，粒粒米飯炒得分明。（圖片來源：金飯館授權圖片）
另一款必食的碟頭飯，就是沙嗲牛肉濃邊煎蛋飯，沙嗲汁以豬骨湯底熬足4小時，再將湯底撞入秘製沙嗲醬當中而成。為了豐富沙嗲汁的層次，特別用上四款不同的沙嗲醬來調製，更重本用上成本比一般日本蛋貴足一倍的「蘭王」日本雞蛋，蛋黃有獨特的橙黃色澤，蛋香極濃，煎至燶邊，食前刺穿蛋黃，連同沙嗲牛肉拌炒飯底來吃，邪惡！
沙嗲牛以牛冧肉炮製，入口軟腍、吸盡醬汁味道。蘭王日本雞蛋煎得脆邊，蛋味濃郁。（圖片來源：金飯館授權圖片）
脆皮牛腩炸得外脆內軟，牛肉香十足。（圖片來源：金飯館授權圖片）
豬膶厚切夠口感，白灼時間剛剛好，入口又爽又滑。（圖片來源：金飯館授權圖片）
包括魷魚、豬皮、牛栢葉，盡吸沙嗲汁，惹味。（圖片來源：金飯館授權圖片）
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
