九龍灣川菜酸辣姐 配料最平$5！日賣100碗 酸辣粉＋涼皮＋麻辣燙｜區區搵食

九龍灣川菜酸辣姐 堅持5斤豬骨煲熬湯底

「酸辣姐」位於九龍灣鴻力工業中心的樓上小店，由阿豪和英姐一同開設。二人本是舊同事，由於英姐自己喜歡食辣，不時會自家研發及改良四川菜，加上阿豪有意創業，於是二人一拍即合。小店主打多款四川麻辣粉麵，其中酸辣粉的湯底更加是花足心機研製。英姐每日堅持用上5斤豬骨熬製湯底至少2小時，令酸辣湯除了酸度和麻辣香之外，額外多一份天然的豬骨清甜味道。

除了湯底外，老闆們對於酸辣粉的另一主角——紅薯粉都一樣有要求，為了可以保持薯粉最佳的煙韌口感，店家特意從四川進口，務求令酸辣粉最貼近當地的味道。難怪剛開業，就已經在短短2小時售出超過180碗！

車仔麵式自由配搭：先選麵底 再挑配菜 酸麻度都有得揀！

酸辣姐採用了港式車仔麵的下單方式，讓客人可以由麵底開始挑選，再揀配菜，相比起一般的四川店鋪只可以單點酸辣粉，客人可以自己組合心宜的酸辣粉配搭，感覺較為親民，而且款式亦有較多變化，不怕食到悶。麵底方面，除了招牌酸辣粉和拌涼皮外，還有酸辣湯米線等，菜式名也充滿幽默感，如「OL新寵拌涼麵」、「QQ彈彈拌薯粉」、「冇咩人揀拌米線」等。配料亦有超過30多款，最平$5就食到！

老闆私心推介吸湯力一流的風琴豆腐、豬頸肉和油炸鬼。豬頸肉份量多而且肉質爽口彈牙。而油炸鬼用作酸辣粉的配菜更是香港比較罕見，原來是老闆阿豪參考了台灣火鍋的食法，認為油炸鬼不論是加入湯麵、酸辣粉或麻辣燙中，都可以吸滿湯汁精華，因此特意加入此款式，每日限量供應。店主笑言：「基本上每日過了Lunch Hour就會賣曬喇，超搶手！」食客更可以選擇辣度和酸度，由走辣至大辣、走酸至大酸共5個Level都可以按個人口味調整。

招牌酸辣粉＋手工涼皮＋四川麻辣燙

招牌酸辣粉是店家招牌，湯底主要用上豬骨湯，再加入秘製酸辣汁和麻辣醬調製而成。湯底酸中帶辛，入口不會過嗆，即使飲完湯都不會口渴，酸度和辣度平衡有致。另外，涼皮亦是人氣款式，用上10款香料調成秘製醬汁，麻辣痹感搭配清爽富咬口的涼皮，於夏天食特別透心涼。

不想每餐都食澱粉質？小店還有推出四川麻辣燙，專門為上班OL而設！麻辣燙分別可以自選大、中、小辣度，以2款配菜起選擇，湯底不會過於油膩和重口味。

14款川渝小食：涼拌牛脷＋OL至愛口水雞＋期間限定糖水

酸辣姐共有逾10多款川渝小食，包括港人班至愛的蒜泥白肉、口水雞、涼拌豬肚、涼拌土豆絲等。其中涼拌牛脷每日新鮮炇煮至少一小時，拌以麻辣醬汁十分入味，麻香味濃。另外泡椒雞腳更是新增的小食款式，每日限量供應。

食飽仲可以食埋糖水添！小店每星期都會更換糖水款式，例如腐竹蛋花糖水、紅豆沙、椰汁西米露等，即使是放飯時間都可以有酸辣姐的愛心糖水滋補一下，好Sweet。

• 餐廳：酸辣姐
• 地址：九龍九龍灣區宏冠道6號鴻力工業中心B座2樓26室
• 電話：5740 1128
• 營業時間：星期一至五11am-7pm，星期六11am-4pm（星期日休息）
• Facebook：suenlartje