2019買大閘蟹情報！三招教你揀靚蟹分公乸 | 內附蒸蟹方法、薑茶食譜

撰文：ning 攝影：Man

湖南蟹和陽澄湖、太湖蟹有咩分別？

除咗港人最熟悉的陽澄湖、太湖蟹之外，大通湖大閘蟹都不失為一個好選擇！其實大通湖大閘蟹質素又如何？賣蟹廿多年的輝哥說：「大通湖在湖南數一數二，養殖方式拍得住陽澄湖、太湖等的江蘇蟹種；蟹膏份量亦多，蟹公有啫喱膏、黃膏；蟹乸有半軟半硬的橙黃膏，唯獨味道會比江蘇蟹稍淡，但肯定比早前的日本、台灣蟹優勝。」

試食太湖蟹！甘香蟹膏，濃郁軟糯！

記者試食後也發現，蟹膏的確飽滿，蟹乸亦有黃油漏出，賣相好吸引；食落質感黏糯軟滑，也有微微蟹膏香，但未及江蘇蟹般甘甜、齒頰留香。但既然是現時唯一正宗國產的大閘蟹，作為蟹迷都收貨嘅！

現時食公定食乸？

所謂「9月圓臍10月尖」，大閘蟹食公定食乸，都要睇農曆時節。輝哥話農曆9月，應該先吃蟹乸，一次過食齊軟硬蟹膏的口感；去到農曆十月就應該食蟹公，屆時膏量最多最飽滿，啫喱膏黏稠漿口的感覺最滋味！當然亦可學內地人的食法，一公一乸食齊一對。

閱讀更多：蟹膏滿瀉！準備出動盡情歎正宗蟹宴上海菜

3招教你揀靚大閘蟹！

講完蟹市行情同價錢，都要識得買隻靚蟹，即刻學揀大閘蟹3式。

1. 睇蟹眼

揀大閘蟹，第一步先要睇蟹眼。蟹商教路，可以輕按蟹眼對落的蟹蓋位置，該處是蟹的眼穴，若然按下時蟹仔眼仔郁郁、識眨眼就為之新鮮。

2.按蟹肚

其次就是反轉蟹仔，睇蟹肚位置，乾淨潔白為佳；另外也可輕按蟹肚，質感堅硬結實代表膏多肉多，如果蟹肚軟腍，則代表蟹肉瘦削、無乜膏食。

3.摸蟹腳

第三步就是玩腳！可以輕拉蟹腳的尖端，如果蟹仔有反應，蟹腳有回彈，就為之生猛。如果想知道大閘蟹是否貯貨太久，可以輕搖及輕按蟹腳，無鬆脫、質感實淨、有彈性，代表蟹是新鮮來貨或只貯放了1-2日；若按落沒有彈性，甚至有虛位，就代表蟹已貯放一段時間，漸變消瘦、蟹膏減退了。

完美蒸蟹大法＋食後薑茶

買完靚蟹返屋企，仲要學埋以下的零失敗蒸蟹大法。

1.紫蘇葉要放水裡面

購買大閘蟹時，通常都會附送有驅走蟹寒作用的乾紫蘇葉。坊間有人話蒸蟹時用紫蘇葉墊蟹底，但其實正確做法是將紫蘇葉放於水內煲滾，再隔水蒸蟹，避免紫蘇葉直接接觸大閘蟹而沾上苦澀味。

2. 蟹肚要向上隔水蒸

紫蘇葉水煲滾後，就可放入蒸架，將洗乾淨的大閘蟹反轉，大火蒸20分鐘就完成。切記不需鬆綁，而且蟹肚要向天，就可以避免蟹膏流走。

3.食後驅寒薑茶

大閘蟹始終是寒涼之物，所以最好食完蟹，飲杯熱辣辣的薑茶驅走蟹寒。只須將薑去皮切片，連同紅糖或片糖，於滾水內煲大約5分鐘即可。

閱讀更多：養生驅寒必飲！自製紅糖生薑茶

閱讀更多：【邊間最好食】Top10 超市湯圓 新年即食湯圓大比拼

永富大閘蟹及日本鮮果專門店

地址：九龍城侯王道47號舖（顯示地圖）
電話：2718 2688、2718 2689
營業時間：8:30am-9:30pm
Facebook專頁：永富大閘蟹及日本鮮果專門店
網址：www.wingfu.hk
備註：大閘蟹價錢只供參考，建議先致電查詢。