變種再變種 雪糕三文治 之爭白熱化！＠Charmaine

雪糕三文治 好Hit，用曲奇、餅乾夾雪糕嘅三文治通街都係，咁仲有咩好玩？最近幾間 雪糕三文治 就話你知咩叫創意。用「麵包」夾雪糕，一諗就諗起前排《東京攻略》入面，杜如風介紹過嘅人氣雪糕蜜瓜包，間舖要排成個鐘先買到。估唔到香港即刻有人跟，喺旺角嘅81番Deli 都有得賣，烤至微脆的包身，夾住冰凍嘅雪糕，口感先暖後凍，I’m in heaven！。唔食日式，可以試吓大隻仔推出嘅雪糕菠蘿包，香脆外皮包住厚滑嘅雪糕，一樣咁正。眼見咁多甜品店出三文治，吉野家都玩埋一份，旗下嘅Fairy Kiss 九龍灣店都出咗牛角包夾Frozen Yogurt。除咗包仲有其他，好似Elephant Grounds 黑炭窩夫雪糕三文治，以食用竹炭做成黑炭窩夫，再夾煉奶雪糕，竹炭窩夫中和咗煉奶嘅甜味，唔會太甜。星級形象指導馬天佑間Vive餅店就出Macacream，即係macaroon 夾雪糕。喺IG 見到呢期美國，興用雞蛋仔夾雪糕三文治，睇黎香港遲早有得食！