重口味必食！觀塘歎正宗 美式 、 墨西哥 滋味 ＠Dining娜

Photo：二彤

正宗美式餐廳喺觀塘頗為少見，觀塘友想食得正宗，要「長途跋涉」過海品嘗都幾麻煩。早排喺觀塘發現一間走地道美式、 墨西哥 路線嘅Moreish & Malt，大賣美國街頭、小店滋味，成功俘虜我等熱愛comfort food嘅朋友。呢度嘅招牌手撕豬漢堡、熱狗，仲有多款墨西哥小食同特飲Monster Shake，無論賣相同味道都好吸引，我Dining娜已經約咗班姊妹開心share重口味美食喇，真係大滿足呀！

美式 手撕豬漢堡惹味之謎

極具人氣嘅瘋狂自家製牛肉漢堡（可選熱狗），滋味靈魂就在手撕豬。豬肉選用軟腍嘅脢頭部位，將混合咗Cayenne辣椒、胡椒、百里香嘅香料，同豬肉以低溫慢煮，香料嘅芳香逼入豬肉，手撕豬肉後再用燒烤醬烹調。一啖咬落去，好惹味，又帶點香甜；手撕豬底下仲有重6安士嘅厚厚牛肉餅同芝士，將重口滋味加倍提升，總廚特別加兩片厚番茄，平衡及中和油膩感，呢款招牌菜每日賣20至25個！

大滿足！重口味＋重量級之選

總廚Kelvin直言，Moreish & Malt用嘅食材同味道調配都比較重口味，例如重量級牛扒、豬鞍，仲有意粉、芝士、薯仔等，通通令人食完大滿足。呢度無論鹹、甜食品，都一樣重口味兼份量十足。夏日下午茶限定特飲Monster Shake，就係甜點代表喇，大大杯嘅奶昔有藍莓、士多啤梨、朱古力3種口味，上面加入大量棉花糖、糖果、朱古力餅等等，顏色勁夏日，賣相同味道都滿足一眾foodie！

墨西哥 風味小食

小食方面，總廚Kelvin也刻意注入大量墨西哥元素，味道濃郁香口，用嚟佐酒就最啱。墨西哥小食如Tacos、Nachos、Buffalo Wings，都跟足傳統做法，風味十足！

Moreish & Malt

地址：觀塘鴻圖道48號地下B號舖（顯示地圖）
電話：3580 7133
備註：設加一，收現金及信用卡。