觀塘碼頭熟食市場星馬菜 拿督星馬大飯店 蔡瀾都話正！人氣星馬黑豉油撈麵 ｜區區搵食
撰文：ning 攝影：Fion
觀塘碼頭熟食市場 拿督星馬大飯店
三度搬遷 熟食中心建人氣
每到午飯時間，拿督星馬大飯店這裡都會迫滿人，打工仔明知食飯時間短，都甘心排隊等位，為的就是這裡的地道星馬菜。老闆娘陳太做過珠寶生意，90年代跟新加坡親戚學煮星馬菜，十多年前返港覺得技癢，就在尖沙咀開設星馬餐廳，後來搬到小西灣，最終因貴租結業，她仿如孟母三遷，在觀塘碼頭這個熟食中心落腳。初開之時，這裡被稱為死場，但陳太不放棄，努力做回舊味道，憑著有麝自然香，短短三年間，新客被它迷住，回頭不斷；熟客更是專誠來吃。
蔡瀾都愛！招牌黑豉油乾撈麵
店內主打傳統星馬菜，最受歡迎的，要數黑豉油大細腳撈粗麵，連蔡瀾都話好食。所謂大細腳，其實就是滷豬腳和雞腳，更特意用豬前腿來做，軟滑肉多肥膏較少，兩者燜得腍滑入味，雞皮豬皮煙韌有咬口。粗麵是本地麵廠製造，每日開店時就將麵條攤出來，待其「 走鹼 」，去走鹼水的苦澀味，也令粗麵食落的質感更加爽身。
份量足，男生吃夠晒飽肚，女生食記得嗌「少麵 」。（圖片來源：新假期編輯部）
不過這些都是其次，全個麵的精髓，在於撈麵用的醬料，老牌新加坡黑豉油濃稠厚身，每根麵條都沾得深啡黝黑色，更額外加了柴灣燒臘名店的燒豬油，份量落得慷慨，畫龍點睛，油香馥郁，香口又滋味。
同場加映 人氣海南雞＋限定肉骨茶
除了黑豉油撈麵，店內還有每日極速沽清的海南雞飯，指定用兩斤至兩斤半的雞，肥瘦均勻，浸雞用的雞湯每日不停煲，吸盡雞的精華，雞件食落有油香，皮肉間有啫喱膏；油飯用珍珠米、雞油、香茅煲，粒粒分明又惹味。
亦有喇沙湯麵，湯底以蝦殼和魚熬，加入自家炒的喇沙醬，香料味強，吃到蝦米、馬拉盞、香茅和辣椒香，米粉加油麵有雙重口感，紐西蘭青口、鮮魷和蝦等海產也鮮味。
逢星期三限定的肉骨茶，湯底用當歸、杞子、川芎等藥材熬3小時，胡椒比藥材味重。以豬腳代替排骨，豬膶及粉腸腍身入味。
不過來這裡光顧，早到的鳥兒才有得食，因為大部分菜式午市過後就沽清，不做晚市，周末假日亦會休息，記得別撲空！
拿督星馬大飯店
地址：觀塘海濱道190號觀塘碼頭熟食市場1樓20號舖（顯示地圖）
電話：2344 2347
營業時間：星期一至五 11:30am-3:30pm（星期六、日及公眾假期休息）
平均消費：$50/位
備註：不設加一，只收現金
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
