觀塘食乜好 食肉獸至愛＋家長傾到偈＋小朋友放電 要Save低嘅超值自助餐

鄰近觀塘港鐵出口嘅「魔膳廚房」，近日因應食客要求將晚市由以往嘅西式套餐轉咗做自助餐，結果大受歡迎！而家每逢週末同紅日，更加係一枱難求！上星期 Dining娜就趁餐廳啱啱推出全新優惠時，走咗上去睇吓佢哋嘅自助餐到底有咩過人之處！

餐廳位於大廈2樓，空間闊落坐得舒服。

「即日海鮮拼盤」：新優惠人人有份

而家幫襯每枱都會免費送返一個用龍蝦汁煮嘅「即日海鮮拼盤」（份量按人數比例而定），每份約有5至6款，種類視乎當日貨源而定，所有海鮮會按季節時令喺海外同本地入貨，每日仲有專人去魚檔揀料，保證係即日鮮。

當日嘅「龍蝦汁海鮮盛宴」（4人份）就有鮑魚、青口、蝦、魷魚、蜆、花螺同北寄貝，汁香味鮮！

當日啲海鮮未煮熟前，仲喺水裡面不停郁動同噴水，果然好生猛！

「牛魔王盛宴」：食足5大部位

晚市自助餐有兩大必食皇牌，包括集齊牛肋骨、牛仔骨、牛柳、牛仔粒同埋牛舌，唔同部位嘅「牛魔王盛宴」，絕對係牛迷至愛！其中牛肋骨係必食推介，選用美國最高級別嘅PRIME安格斯牛，因為本身牛味濃郁、肉質嫩滑，所以只用黒椒、海鹽同香草簡單醃吓，就可以放入真空袋用45度慢煮3個鐘，上碟時肉香與油香四溢，入口更加係細嫩無筋，所以一出好快就俾大家夾走晒！牛仔骨同樣選用美國PRIME安格斯牛，只不過切法唔一樣，同埋用咗黑椒調味。至於原條牛柳就夠晒入味多汁；厚切牛舌飽滿細緻；而牛仔粒就係小朋友至愛！

「牛魔王盛宴」一次過可以食勻牛肋骨、牛仔骨、牛柳、牛仔粒同牛舌，5大部位同食法，牛氣沖天，係全場最受歡迎嘅美食！

牛肋骨選用美國最高級PRIME安格斯牛，平日單點要$488，每條約1kg重，配合慢煮令肉質變得鮮嫩多汁。

「豬羅紀公園」：肉魅逼人

假如你無豬不歡，一定會為另一道皇牌「豬羅紀公園」著迷！一整盤有齊原隻德國豬手、惹味燒豬肋骨、春雞同德國腸。德國豬手做到皮脆甘香肉質鮮嫩，獨有嘅胡椒咸香愈食愈有後勁。而豬肋骨則用傳統焗製手法去保持肉質細嫩，即使小朋友同老人家都可以輕鬆食到最嫩滑嘅骨邊肉部位。咪住！點解會有慢煮春雞嘅呢？原來負責人話春雞係代表翼龍，真係好有童心同創意，可以等小朋友邊食邊發揮想力創作故仔，好開心！ 加埋啖啖肉嘅豬肉腸，真係大滿足呀！

「豬羅紀公園」同樣係食肉獸至愛招牌菜之一！

德國咸豬手味道正宗，平日單點要$188，而家晚市自助餐任食真係好抵！

為方便大家夾食，豬肋骨焗好後喺上菜前會先被切成條狀。

酸菜魚係今期推介嘅特色中菜，依照廣州名廚烹調手法，減辣減酸並加入秘製香料增加風味，好味到連湯都飲埋。

同場仲可以任食多款沙律、熱葷、小食同甜品，尤其甜品區可以DIY棉花糖、熱辣辣焦糖爆谷，同任溝大熱台灣芋圓！小朋友仲有小禮物抽獎㖭！而家幫襯更可享高達6折優惠，加上任食4小時，唔怪得成日都滿座啦！

新鮮沙律吧除咗數款特色沙律外，仲有芝士拼盤、意大利火腿、鮮製蝦片同蒜蓉飽。

多款熱葷美食同樣各有風味特色，其中包括庶蝦、糯米雞翼等香口小食嘅「魔膳小食拼盤」，就好受大人同小朋友歡迎啦！

甜品區有10幾款精美甜品，又可以DIY棉花糖、熱辣辣焦糖爆谷，同大熱台灣芋圓，所以成日見到人龍。

餐廳佈置非常用心，每個角落都有創作繪畫及裝飾。

餐廳門口佈置成花園一樣，頗有魔幻感覺。

魔膳廚房

地址：觀塘開源道77號業發大廈一期2樓D室
電話：3955 1460/ 3955 1461/ 6319 2511

備註：自助晚餐供應時間：6pm – 10pm

價目：星期一至四，成人$238*，小童(身高91- 130cm) $138*

星期五至日及公眾假期及公眾假期前夕 成人$268*，小童(身高91- 130cm) $168*

小童(身高90cm 以下) 免費

* 須另加一服務費