觀塘工廈 享中環滋味｜細嘗高質 意菜 ＠Dining娜

Photo：二彤

近年 觀塘工廈 區新食店愈開愈多，但質素比較參差，想食有質素嘅西餐都唔容易，更加唔好講意大利菜。直至三年前，意菜餐廳Kowloon East Kitchen進駐觀塘，東九龍人先可以喺區內食到中環嘅高質滋味。來自中環著名餐廳嘅總廚，對烹調、食材選擇同配搭都好執著，單係pasta佢哋就堅持每日新鮮自家製，因為咁先可以親手調校至理想狀態，一食就食到與別不同。

堅持自家製Pasta 調校理想韌度、闊度

Kowloon East Kitchen嘅homemade pasta如闊條麵同意粉每日新鮮即製，總廚咁堅持，因為麵粉親自試過先入貨，麵條嘅韌度、長度、闊度亦親身試過無數次之後，調校至最理想嘅口感同狀態。呢度嘅麵條偏韌，有彈性、有嚼勁之餘，烹調後亦能充分吸收廚師精心炮製嘅醬汁，令味道更豐富。而招牌辣番茄海鮮闊麵嘅醬汁，就集合咗海鮮、鮮番茄、洋葱等精華，味道鮮甜濃郁。

盡顯 意菜 認真細緻功架

呢度由前菜、主菜、配菜，到甜品、飲品，都令人食得出佢哋嘅誠意同中環高質 意菜 滋味，例如黑松露香蒜薯條，簡直係不惜成本嘅誠意之作，師傅用上大量黑松露，再加生蒜、番荽煮成醬，每根薯條都沾滿黑松露醬，已經非常濃郁入味；最令人意想不到係，師傅仲配搭一個由燒蒜、蛋黃醬製成嘅醬汁，將惹味推向頂點，製作一絲不苟！

Kowloon East Kitchen嘅甜品，大家亦唔可以錯過，除咗我同班閨密，連男士都話要留肚品嘗！豆腐芝士餅配芝麻醬就係中西fusion嘅創作，概念源自中式芝麻糊拼豆腐花嘅「黑白糖水」，當味道較淡嘅豆腐芝士餅，遇上濃如芝麻糊嘅芝麻醬，兩種極夾嘅甜味令人有意外驚喜！

透心涼鮮果特飲、中秋新作

炎炎夏日，推介大家點透心涼嘅smoothie、果汁、梳打，一呷暑氣全消，而且佢哋全部用鮮果製成，so refreshing！佢哋嘅特飲會按時令轉款，例如夏天會多用亞熱帶水果，好似菠蘿、椰子等，不同季節可以飲到不同味道。

中秋好快到，大廚透露將會有新搞作，鹹、甜食品會大玩中秋水果食材，除咗柚子，仲有楊桃，非常創新，期待！

Kowloon East Kitchen

地址：觀塘駿業街66號巧運工業大廈5樓C室（顯示地圖）
電話：3468 5383
備註：設加一（星期一至五午市除外），收現金及信用卡。