【西環】韓式九層塔終極登陸 海鮮食法自己揀

我最期待的畫面出現了，韓國最Hit 的九層海鮮塔終於現身香港！位於西環的The Seafood Kitchen 近日人氣爆燈，個個等住朝聖呢個海鮮塔。從事海鮮批發的老闆每日從香港仔挑選時令生猛海鮮，種類超過三十款，包括俄羅斯皇帝蟹、波士頓龍蝦和象拔蚌，全部放在魚缸中供客人自己撈！揀完海鮮，就揀點食。首推當然是韓式海鮮蒸，食幾多層、哪種海鮮統統由你決定，底層可選人參雞鍋、挪威三文魚湯等，海鮮先在廚房蒸至九成熟才上桌，再用蒸塔內的熱氣保溫，客人邊蒸邊食，味道鮮甜帶有湯鍋香氣。還有充滿玩味的美式食法，用槌仔將灼熟的蟹和龍蝦敲碎，再灑上混合20種香料的「Happy 粉」，辣辣哋好過癮！還未夠喉？可試海鮮燒烤、海鮮火鍋和焗海鮮，總有一款合你心意。