精緻點心動物園過癮龍蝦湯浸蝦餃！ | 西營盤 食乜好|
廣告
西環石塘咀食肆頻頻開，林林總總相繼插旗，最近又添一家，但唔賣咖啡、西餐，卻主打中式點心。
撰文：Jeff｜攝影：Man
不過，競爭大生意難，都要搞搞新意思，裝修飛甩老套格局，走型格摩登路線，點心造型則花盡心思，芋蓉酥就做成得意鴨仔，蓮蓉酥就做成趣致相思雀，活靈活 現。點心亦都「 有姿勢有實際 」，好似金魚蝦餃，巧妙加入了切碎的珊瑚蚌，提鮮兼增加口感。筆者最喜歡是另一款龍蝦湯蝦餃，蝦餃做成小龍蝦造型，上枱時再倒進濃厚的忌廉龍蝦 湯，Creamy 濃郁的味道，蘸著中式蝦餃食，有點似意式雲吞!甜品亦走出紅豆糕、芒果布甸的框框，有桂花燉雪梨、紫薯糕等選擇，追上潮流又有新意。
相思雀形狀的蓮蓉酥，外層的餅皮酥香鬆化，蓮蓉入口甜而不膩，且帶點欖仁香。 而杏香荔茸鴨，外層是炸得外脆裡綿，餡料有冬菇碎，味道濃郁!
外貌吸引之餘，亦見師傅巧思，在傳統蝦肉餡中，加入珊瑚蚌碎，口感多了一重爽脆之餘，而且更加鮮味!
龍蝦湯味道鮮濃，龍蝦味道突出，上枱時才注進蝦餃中，不會把餃皮浸軟，裡面鳳尾蝦肉則與龍蝦湯相映成趣，鮮甜味美。
原個雪梨以桂花酒煮過，煮得晶瑩，配上桂花糖水，加上幾瓣玫瑰，香氣清幽，甜美滋潤。
臻
地址:西營盤 山道48號南昌大廈地下 C 舖 （顯示地圖）
營業時間:星期一至日11am-9pm
查詢: 2811 2568
備註: 接受信用卡，須加一服務費
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
