【3點3啦喂】西九龍中心Food Court $8平到喊 雞髀+德國腸?!

西九龍中心Food court 平到喊$8餐

好彩 西九龍中心Food Court 未俾大企業同化，未變到一式一樣嘅連鎖式食肆，呢度嘅Food Court有好多特色小店，今次小編行到呢間有韓式豬肋骨、又有啲西式意粉鋸扒、兼且仲有芝士乜乜乜嘅餐廳停低咗，點解呢？因為我竟然望到一份雞髀+德國腸都係賣$8!同埋另一款雞髀+炸蟹鉗都係$8!

個牌其實唔係太起眼，$8，無睇錯，真係$8！

不過呢，正當長期糧尾嘅小編勁興奮地想叫返個$8餐嚟試下，Oh!原來係要跟餐先可以+$8點，不設散叫……（人地個牌其實一早寫明，興奮過頭睇唔到）不過其實呢度嘅午餐其實都唔太貴，都係$30~$50。

另外都有啲西式嘢食~有羊架、德國腸、意粉等等。

不過意粉同啲扒都唔夠呢個芝士韓式豬肋骨吸引，即叫即整，小編係非繁忙時間都等咗大約15分鐘，真係熱辣辣到唔可以直接拎起個錫紙兜，睇落賣相都唔差，好多Mozzarella芝士鋪晒係意粉上面，豬肋骨面頭仲有韓式甜辣醬。

雖然意粉表面全部都係芝士，但對於超級芝士控嚟講，如果想每件豬肋骨都捲幾圈芝士，睇嚟就唔係幾夠用啦。而豬肋骨肉質都夠腍但就比較少肉，而且個汁偏甜左啲，食多幾啖就開始膩，兩個女仔share一個已經夠。

重點嚟啦！跟餐先叫到嘅$8餐，Er……說好的雞髀呢？點解會變咗做雞槌嘅？幻想破滅……不過隻雞槌睇落都幾多肉嘅，而條德國腸都四四正正，$8仲可以要求啲咩？不過一心諗住有雞髀食……真係好失望！

雞槌食落都唔錯嘅，肉質都算滑，而且食有陣蜜糖甜味。另外德國腸味道就麻麻，雖然腸身彈牙，但乜味都無。

試埋另一款$8餐，個蟹鉗炸得香脆，口感彈牙，都食得過。

Food Court入面有好多位，可以坐低慢慢食。

星級小品

地址：深水埗欽州街37號西九龍中心8樓美食廣場8F-31 (顯示地圖)
營業時間：12nn-9:30pm
電話：從缺

堅平！　$10有包冷麵

食完豬肋骨，正想離開呢一層，又俾小編發現有抵嘢！學生時代成日食嘅冷麵，由舊時嘅$1一包餸，已經加價到而家$4一包餸，點知！西九果然係平嘢集中地，呢間冷麵零食舖竟然$10有6包撈麵！平到喊！不過唔好以為平就無得揀，有五款麵可以揀，仲有成廿幾款餸任揀。唔怪得之一到放學時間就有好多學生排隊！

係Food Court嘅另一邊，近住溜冰場個邊就會見到呢檔冷麵檔。

有選擇困難症嘅你大鑊啦，麵有5款可以揀，餸有廿幾款。$10/6包，我諗都係全港最平。

所有餸都有獨立包裝，再放係雪櫃入面，夠衛生！

當然，冷麵最後指定動作係加蒜、加醬同加紫菜再撈埋一齊！

簡直係學生嘅恩物！拎上手仲要好有份量，一啲都唔係輕飄飄。

係5個餸入面，小編叫咗鴨胸、鮑魚片、海蜇皮同鳴門卷，其實食落又ok喎，鴨胸有鹹香，鮑魚片爽彈，海蜇皮夠Q彈爽脆，而且每樣餸都有4-5件，就算平都無偷工減料。

反而菠菜麵食落就無咩味，但份量驚人啊，呢度只係一包麵嘅份量，勁多！

除咗冷麵之外，呢度仲有少少零食賣，經過可以幫襯下婆婆啊。

冷麵(無檔名)

地址：深水埗欽州街37號西九龍中心8樓美食廣場，近溜冰場 (顯示地圖)
營業時間：10am-9pm
電話：從缺

最平甜品　$12/5球雪糕

食完正餐當然要搵甜品嚟食啦！果然沒有最平，只有更平！同一層裡面發現咗$10/4球雪球，夠平未？未？！痴線價：$12/5球雪糕！點解可以平到咁？而且都有啲幾特別嘅雪糕口味可以揀，好似烤番薯、益力多味等等，至於味道伏唔伏呢？就見仁見智啦!

門口大大個牌寫住$12五雪球，真超荀價！

一眼睇晒，雪糕有26款味，不過有部分雪糕要另外加錢，貓山榴槤、益力多、香蕉朱古力、香橙朱古力椰皇同Tiramisu要另加$2。

仲有朱古力醬、士多啤梨醬同彩針任加，勁慷慨！

每粒個size就同乒乓波差唔多，今次試咗烤番薯、靜岡草莓、海盜蜜瓜（我都唔知咩係海盜蜜瓜 XD ）、牛奶雲喱拿同豆腐味。雪糕食落都有奶味，亦都滑溜嘅。烤番薯食落甜甜哋，隻味一食就估得出！牛奶雲喱拿比一般雲喱拿雪糕再甜啲；豆腐味只有少少豆香，但食落都算清新，而蜜瓜同靜岡草莓就最唔掂，雖然一食都估到係蜜瓜同草苺，但陣味超級假，直頭係香精味！

雪糕達人

地址:深水埗欽州街37號西九龍中心8F-74舖(顯示地圖)
營業時間:11:30am-10:30pm
電話：從缺