屯門蛇王輝 蛇羹／糯米飯賣足30年！車仔檔賣到入舖 真材實料 街坊至愛 |區區搵食
撰文：Burger｜攝影：新假期攝影部
屯門蛇王輝 廿歲開始賣蛇羹＋糯米飯
冬天暖身方式有許多，一碗蛇羹少不得。區區有蛇王，屯門就有一個「蛇王輝」。「好多屯門友，細細個就食！」架著眼鏡的老闆輝哥，外表斯文，說話溫文，實情是出身蛇王家族。「我哋海南人，用蛇最精，大角咀蛇王濤都是我們親戚。」輝哥自小跟家人擺街檔，捉蛇、劏蛇、開蛇膽，一般細路聞之色變，他卻冇有怕。輝哥廿多歲就跟太太在屯門新墟開蛇店，「嗰陣街坊成日問我咁後生，識唔識劏蛇，結果我哋做到晚晚排長龍呀！」可惜新墟舊舖，七年前因業主加租被迫搬遷，來到置樂花園仁愛街巿附近的現址，瑟縮在公園旁，夾在菜檔、魚檔之間，不甚起眼，好在熟客識得找上門。
$49足料五蛇羹＋$38糯米飯
蛇王輝的蛇羹，罕有地用上過山烏、三索線、過樹榕等超過五種蛇肉，肉質嫩滑而不嚡，木耳絲、冬菇絲、雞肉比例恰到好處，湯底濃稠度剛好，帶淡淡酒香。「好多舖頭為慳功夫，只用急凍淨蛇肉，沙士後我哋無用活蛇，不過都會畀貴啲，用連骨的蛇條。」用蛇條，功夫就多了，要逐條起骨、手拆撕肉先夠幼細，一斤蛇骨最後拆剩幾両，剩下蛇骨，加藥材熬五、六小時就是蛇湯。
湯羹帶著芳郁的玫瑰露香，蛇絲、雞肉絲、冬菇等材料幼細，做得夠細心，加一點檸檬葉，很清香。
龜湯以草龜、龜板，加入生熟地、土茯苓等材料煲成，入口甘甜，有滋陰清熱的作用；五蛇湯以大量蛇骨及藥材熬煮，色澤奶啡，帶濃郁藥材味，湯中帶鮮，飲一碗暖笠笠。
糯米飯煙韌軟糯，也做得粒粒分明、乾身，花生炸得香脆，還透出臘味的香味。一片片的臘腸、膶腸蓋面，十分足料。
即叫即煮，鳳爪燜得軟腍，排骨有豉味，飯粒帶米香，吃至最後還刮起飯焦。
租金太貴 密密做等退休
問到輝哥，下一代會接手嗎？「唔會喇，租金咁貴，一碗蛇羹又賺得幾多？我而家都係半退休。」說是半退休，其實比不少人更落力，每朝十點半開舖，凌晨時分關門，每年只在大年初一至三才抖一抖。「舒服咗㗎喇，以前我哋大年初一都照開！」勤儉、刻苦、不走捷徑，這是上一代人的特質，也是做出一碗蛇羹的必備條件。
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
