葵涌廣場美食｜河國榮掃街食盡4間小店：梳乎厘班戟＋章魚燒｜區區搵食
葵涌廣場美食！河國榮4間小店逐間試
身為澳洲籍的藝人河國榮，已在香港居住多年，操得一口流利廣東話，就連口味亦貼近香港人，喜歡試勻香港地道小店美食。近年疫情，河國榮更不時在Facebook分享自己買外賣後，上車品嚐美食的照片，貼地行為獲得大家歡心！今次《新假期》邀請了他首次到香港夜市之稱的葵涌廣場，身體力行支持小店，挑選4間試食。河國榮食完更感嘆：「入到廣場發現很多小食店，我覺得好開心，如果只有大公司選擇會較少，大公司經營方式好唔同，小店有時會不計成本，食得出分別嘅。希望大家多多支持小店。」
葵涌廣場美食1. 真章魚無雙 原粒章魚製作
真章魚無雙獨沽一味只賣章魚燒，其章魚燒用原粒章魚製作，外層酥脆，內層柔潤，再配搭爽口章魚，是葵廣名物之一。章魚燒口味超過10款，當日河國榮選了最熱門的「真黑松露章魚燒」及「真蜜糖芥末章魚燒」，當中黑松露口味，在駕駛途中已經聞到陣陣黑松露香味；蜜糖芥末味鮮甜，蜜糖味突出。整體章魚燒彈牙，怕海鮮的他，認為這款章魚燒完全沒有腥味，評價甚高！
河國榮評分：9分
味道酸甜開胃！（圖片來源：新假期編輯部）
黑松露味濃烈！（圖片來源：新假期編輯部）
- 餐廳：真章魚無雙
- 舖位：2樓C07B號舖
葵涌廣場美食2. 西關老祖 古法瀨粉＋炸粽
來到主食，河國榮便選了這間西關老祖，小店提供懷舊中式外賣小食，其中古法瀨粉甚為吸引！西關瀨粉是廣洲的傳統小食，瀨粉每日人手打成，再用機器壓成條狀，口感極似狗仔粉，但又更幼細嫩滑。瀨粉吃前再加入自家煉製的本地黑毛豬油渣及辣菜脯，惹味得很！不過未曾食過狗仔粉的河國榮，認為這種口感難以形容，整體味道很中式，前勁有股辣勁，吃至後來有種皮蛋味。
河國榮評分：8分
古法自家製作，有傳統廣洲西關風味。（圖片來源：新假期編輯部）
雖然古法瀨粉是店子的招牌菜，河國榮卻被炸粽這款新奇美食吸引。「死得了！一睇就知呢個好食，我哋呢啲鬼佬最鍾意食炸嘢，呢個味道有啲熟悉，似之前喺澳洲食嘅炸魚薯條，抵擋唔到。」不過食慣蒸粽的河國榮，食過炸粽後，感覺有點混淆：「點解粽會係脆？」感覺似番薯的味道，也像薯餅。這種新奇的感覺，成為河國榮當日最愛的食物。
河國榮評分：10分
炸粽都是自家製作，加入黑毛豬入饌落重本！（圖片來源：新假期編輯部）
- 餐廳：西關老祖
- 舖位：2樓2003號舖
葵涌廣場美食3. FreeHcake梳乎厘班戟
來到甜品時間！西關老祖斜對面傳來陣陣蛋香味﹐原來是店子「FreeHcake」主打的梳乎厘班戟！因為即叫即製，所以每次柯打都需要等待15分鐘。梳乎厘班戟並不是空氣感般，而是既有實在感，也有軟綿綿的感覺。
今次河國榮選擇了黑糖三重朱古力味，用朱古力奶蓋配黑糖燒焦成脆皮，再灑上Oreo碎及朱古力醬。河國榮吃前認為這款必定很甜，不過試食後，卻表示朱古力味多過甜味，效果剛剛好。「我曾經喺澳洲班戟餐廳做過廚師，主要製作Crepe。呢款似法國嘅梳乎厘，唔容易製作㗎，佢哋做得好好。」
河國榮評分：9分
加入朱古力奶蓋、朱古力醬、Oreo碎、黑糖焦糖製作而成。（圖片來源：新假期編輯部）
店內新推出低糖版班戟，利用曲奇碎、糖粉、低糖糖漿奶蓋製作而成。（圖片來源：新假期編輯部）
- 餐廳：FreeHcake
- 舖位：2樓2010號舖
葵涌廣場美食4. 茶芝味 奶蓋烏龍茶＋水果茶
掃街飲品同樣重要！今次來到茶芝味，河國榮選了奶蓋烏龍茶及水果茶試飲，前者奶蓋綿密，即使過了大半個鐘，奶蓋依然屹立不倒，奶蓋與茶底完美分層。味道方面，芝士味及奶味同樣突出，原來河國榮從未飲過奶蓋茶：「我形容唔到呢個味道，又唔係奶，又唔係芝士。不過呢個奶蓋超好味，但我比較貪心，覺得如果少烏龍多奶蓋會更好。」另一款水果茶，加入新鮮生果製作而成，味道飲落酸酸甜甜，夏天飲用不會口渴！
河國榮評分：8分。
烏龍及奶蓋完美分層！（圖片來源：新假期編輯部）
以多種水果，如橙、檸檬、西柚粒、芒果等果肉製作。（圖片來源：新假期編輯部）
- 餐廳：茶芝味
- 舖位：1樓B07號舖
想睇更多食評，可以到新假期Facebook觀看影片，內有河國榮開金喉唱亞視永恆片段！
葵涌廣場有咩好食？
葵涌廣場美食小店眾多，例如章魚燒、梳乎厘班戟、茶飲等，詳情按此。
葵涌廣場點去？
可乘坐地鐵至葵芳站，D或E出口步行一分鐘即達。
