荃灣誠意小店│由地道 越南菜 吃到新派法越滋味 ＠Dining娜
Photo：Barry
香港唔少人鍾意食東南亞菜式，我Dining娜亦係其中之一，尤其是比較light嘅 越南菜 更係我杯茶。香港泰菜館就好多，但偏偏想搵正宗嘅 越南菜 ，選擇唔及泰菜。最近喺荃灣發現開業只係三個月嘅越味皇，味道正宗之餘，仲要誠意滿分。
店主兼總廚張先生，曾經喺多間5星級酒店任西廚廿幾年，喺酒店已經學到一身好功夫，擅長烹調西菜同法越Fusion菜；又曾經專程去越南跟當地師傅學傳統越南菜，加上店內師傅半數係越南人，風味自然夠晒地道！
無添加健康 越南菜
張先生尤其注重健康，所以菜式以比較健怡嘅越南南部口味為主，有別於北部較重口味。另外，全店菜式都係無添加味精，由於食材都係優質嚴選，所以湯河同其他菜式具層次嘅鮮香味道，主要來自新鮮食材同地道香料。
傳統 越南菜、Fusion法越菜俱備
越味皇嘅正宗 越南菜 大約佔八成，其餘就係糅合咗西菜同法菜嘅Fusion菜。地道菜好似順化濱海、湯河，以及越式芋合鮮菠蘿蝦酸湯飯都可喺呢度食到。想一次過試勻唔同越式滋味，推介集合咗唔同經典小食：春卷、蒸粉卷、迷你蔗蝦嘅越式拼盤。
製作認真夠誠意
食材往往主宰菜式嘅味道，為咗貫徹越式風味，越味皇八成嘅食材係購自越南，即使簡單如香茅亦堅持用越南貨，張先生解釋，越南香茅嘅風味同香港買到嘅完全唔一樣，一食就食出。
鎮店招牌菜頂級生牛肉湯粉嘅湯底，每日用新鮮牛骨自家熬製，味道濃厚馥郁。為咗照顧唔食牛嘅朋友，呢度嘅湯河除咗配牛湯，亦可以配雞湯，真係要畀個Like小店嘅細心同誠意！
足料落重本
除咗製作用心，越味皇用料亦足！另一必食招牌菜牛油蒜蓉雞翼，同樣係心機之作，師傅先將雞翼炸到香脆，再用牛油、蒜蓉炒香，牛油滲入外皮後超級香口，佢哋用嘅更係法國牛油，對小店嚟講非常重本。
而越式牛油果沙冰每杯用一個秘魯牛油果製成，非常足料。雖然話係沙冰，但質感幾厚身，好似奶昔，相當飽肚。近年潮流興食牛油果，呢款健康特飲，長期成為女士No. 1至愛。
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
