英韓混血餐廳 莎莎醬襯雞夠fusion 【中環食乜好】

來自英國的貴氣新派韓國餐廳本周五進軍香港，選址蘭桂坊開店。由美籍韓裔靚女廚師Judy Joo 帶領的Jin Juu，在倫敦開業短短一年， 已被英國《獨立報》選為2015最值得幫襯餐廳，將傳統韓食加入西方元素，好似：用韓式醬料做豬腩肉Tacos，酸酸辣辣，少了原本墨西哥醬汁的濃烈香料味；又創出以粟米莎莎醬蘸韓國炸雞。餐牌只得散叫，但選擇豐富，單是小食也有廿多款，有生有熟，全部有細細碟似tapas，七、八十蚊有交易；主菜則要三、四百，以燒牛、燒魚為主，配白飯、紫菜、生菜葉，捲埋食，韓式風味。收此價錢，食材也交足貨：澳洲走地雞、澳洲和牛、西班牙Iberico 豬，米及醬料就來自韓國。值得一提是自創的韓雞尾酒，用泡菜、紅參調燒酒，行氣活血又有創意。裝修也講究，高樓底，工業風，天花吊滿玉石繩結，吧枱用百子櫃改裝而成，巧妙融入韓國元素，明攻有型有格中產客。