【自助餐放蛇起底組】$88食足2.5小時!!! 酒店「 芒果燕窩甜品 」下午茶

撰文、攝影：自助餐放蛇起底組

廿多款甜品任食芒果燕窩甜品 得個樣?

小記兩點半準時入座，但場內已非常多人排隊取甜品，看來可早點入座！甜品區有兩邊，放在長枱上任取，驟眼望都是一片黃色，大部分都是芒果味的甜品！等小記逐樣點評，賣相其實幾高質，可以呃到人！但是味道方面，絕大部分都非常失色！雖然味道麻麻，但甜品卻很快被掃光，所以亦keep住有人refill，不用擔心吃不到，只要耐心排隊便可。

芒果芝士蛋糕不錯！口感綿密順滑，面頭有一片芒果和芒果醬，食落帶少少芒果味道。

一入口！酸到小記哇了一聲，熱情果的酸味好澎湃！超醒神，不過就完全蓋過了芒果mousse cake的味道了。

芒果燕窩甜品 登場！果撻size細細，撻邊超級腍，吉士醬吃完會黐脷！似食Baby food！上面雖有燕窩，但完全無味，失望！

Macaron可謂女士至愛，但一吃立即失望！外殼非常硬，裡面的芒果餡更可整塊抽起，餡殼分離，不好吃！

另一款 芒果燕窩甜品 ，千層酥有3層酥皮和2層cream，但可惜酥皮過腍，一隻叉拮下去即散，芒果和燕窩亦無味，得個樣！

突發！隨時出現新甜品

食食下會失驚無神出現新的甜品，所以要很留意著buffet枱的動靜！紅桑莓mousse cake和炸芒果雪糕便是突然出現的甜品，前者質感非常軟身，想吃都超級有難度！因為一夾便會散，好恐怖！味道更拖低了全場甜品的水準，mousse cake似糊仔，又是另一樣baby food，可一不可再！

雖然不是熱辣辣，只是微暖，但口感煙韌，入面的芒果雪糕餡亦很多，可以encore！

菠蘿杏仁撻質素不錯，飽滿大件，撻皮好有牛油香，杏仁餡的味道雖不是太突出，但配上面頭多汁菠蘿好清新！

燕窩荔枝燉蛋又再次失望！食落一陣罐頭荔枝水的味道，配上蛋味好奇怪，而燕窩亦不知所蹤！

再來芒果燕窩甜品，看到甜品名已經覺得複雜，食落味道更令人疑惑！楊枝金露變成布丁完全唔夾，上面的芒果糕更硬得似石頭，唉。

小朋友至愛　自助窩夫機

正值暑假，在場有很多小朋友和青少年，大家都非常喜歡這部自助窩夫機，機旁有蛋和製作教學，而且可以自己DIY料如彩針、煉奶等醬料，想玩要排隊等很久！指示說將一勺蛋漿倒進機內便可，但事實上要一勺半才夠，還說弄好後窩夫會發出提示聲，不過過了3分鐘亦無聲響，打開一看，窩夫已熟過頭，食落更有燶味，好玩不好吃！

總結：選擇方面其實好豐富，有廿幾款甜品，不過味道方邊真的非常失望，芒果無味，不酸亦不甜；燕窩則似切絲的大菜糕，虛有其表，非常麻麻。環境都坐得舒服，服務OK，$88可以任食2.5小時，如果不介意食物的質素，只志在找個地方吹吹水，都是一個可接受的選擇。

一句到尾：我的玻璃心碎了！

不過自助餐需要預先打電話訂座，非常爆場，記者8月頭訂座都要等到8月10日才有位，如果想吃的都可以即場去碰運氣，看看有沒有人no show。

帝都酒店

地址：沙田白鶴汀街八號帝都酒店大堂(顯示地圖)
電話：2694 3869

1+1吧 – 香芒x燕窩夏日熱情甜品自助餐

供應時間：2:30pm – 5:00pm
收費: 星期一至五：$88/位
星期六、日及公眾假期：$118/位
用餐時間：2.5小時
備註：收加一，由即日起起至2016年9月30日