祖傳辣椒油28種香料秘製 鮮香麻辣！仲有4款新口味 三峽烤魚＋招牌冒菜

師承祖父輩正宗川菜風味

喺四川「烏蠅館」係當地人口中味道最正宗，但舖面唔起眼仲要深藏巷弄裡面，剩係得識途老饕先知門路嘅地道小菜館。老闆兼主廚鍾先生自祖父輩起已喺重慶開設「烏蠅館」，因自細喺廚房裡面耳濡目染，無論食定煮都對四川菜抱有嚴格要求，仲直言：「很多人誤以為大麻大辣先係川菜正宗，但其實四川菜系最大特色係一菜一格，百菜百味，簡直係海納百川！麻辣只屬於其中一種，仲有酸辣、椒麻、糊辣、香辣、魚香、怪味等24種特色風味。」

三峽烤魚4款新口味

三峽烤魚係長江三峽地區嘅傳統烤魚煮法，結合咗河魚嘅鮮嫩肥美同埋火鍋嘅大嗚大放兩大特點，因口味奇絕、香氣撲鼻而成為皇牌主菜！鑑於香港同重慶嘅地理環境有好大分別，所以香港製作嘅烤魚，亦由原來嘅三峽河魚改為3種同樣鮮美多肉嘅海魚，分別係多寶魚、龍躉同黃𩶘䱽，畀大家按喜好挑選配搭。除咗麻辣同泡椒兩款原有口味外，近期仲加入香辣、蒜香、酸湯同豆豉，4款全新川渝口味！

粵廚製鮮 川廚製味

為配合扁身嘅烤魚盤，同埋令到成條魚都可以畀醬汁均勻咁淋灑兼吸收湯汁精華，所以規定每條烤魚嘅大細重量都要維持喺1.5至2斤，而每份烤魚都會配有3款時令鮮蔬，當食完烤魚後啲蔬菜啱啱好吸收晒魚湯同醬汁嘅精華， 更顯得份外清脆爽甜。而啲醬汁喺呢個時候亦差唔多食得七七八八，或揮發晒而變成干鍋，跟住就可以加入水或者原汁，再點叫其他配料變身火鍋，繼續食埋下另半場啦！

「酸湯烤魚」配以厚肉龍躉，酸、香、麻、辣等層次豐富，溫熱辣勁更由舌腔一直延伸至腸胃。

正宗成都特色小食：冒菜

冒菜其實同廣東蒸煮菜好相似，「冒」係動詞，又係形容詞，既指廚師將食物放喺漏勺同熱湯裡面上下灼煮後，倒入碗再順手舀一勺調味湯汁嘅整套動作；同時又形容烹調時所冒出嘅蒸氣。由於食材先用清湯煮熟，並無調味，所以成碗冒菜嘅味道就要靠最後倒入嘅調味湯汁啦！雖然四川人成日都話冒菜就係一個人嘅火鍋，火鍋就係一個人嘅冒菜，但由於冒菜烹煮時用油更少、時間更短，所以較火鍋或者麻辣燙，都更能品味到食材嘅原味，亦更加健康。

50種配料＋6款湯底粉麵

呢度嘅冒菜配料多達50種，包括豆味香濃嘅豆皮結；脆爽有營嘅海帶結、海白菜同貢菜；腩肉同肥牛等肉類。主食就有河粉、火鍋麵、火鍋寬粉，米線同土豆粉等選擇，推介質感較爽、掛湯力佳，用土豆曬乾磨粉製成嘅土豆粉。湯底更有麻辣、清湯、藤椒、酸湯、番茄同海鮮，6款口味！連小食都有十幾款葷素選擇，除咗大家熟悉嘅蒜泥白肉、紅油豬耳絲，同埋成日售罄嘅新會陳皮麻辣牛肉之外，仲有以下兩款一葷一素嘅熱門推介！

三代祖傳秘調辣椒油

以牛油同芥花籽油做基調，再加入魔鬼辣椒、指天椒、燈籠椒和二荊條等多種辣椒，同埋老薑、花椒、泡椒、香料，麻椒等28種香料，泡浸1至3星期而成，唔單止層次豐富、香味濃郁、餘韻深長，仲具有食療功效，就算素食人士都可以安心食用，更加係鍾師傅用嚟炒製各款特色醬汁嘅秘密武器！為咗保持四川風味，鍾師傅每兩星期都會飛返四川老家，買好晒所有辣椒同香料，喺工場用8人枱咁大嘅鐵鍋幾個人輪流炒製醬料，再帶返香港備用。

吃香喝辣嘅同時記得要點返一杯，由老闆娘兼茶藝師王小姐親手沖調，既有清新花茶香味，又有幼滑芝士香味嘅手泡茶，嚟幫助消化、去油解膩兼消暑呀，玫瑰蜂蜜奶蓋同茉莉蜂蜜奶蓋都係推介。

烏蠅館

地址：尖沙咀亞士厘道34號天星大廈一樓B號舖

訂座電話：2606 2722

營業時間：星期一至日 11:00 – 20:00

備註：不設加一，收現金。外賣加$1。