睇住流奶皇包！相機食先新派茶樓 【尖沙咀食乜好】
廣告
好多人出街食飯都有一個宗旨，就係要相機食先。有無諗過去飲個茶、食個包都可以揸緊呢個宗旨呢？喺尖沙咀新開張嘅「飲茶」，名副其實係一間茶樓畀大家飲茶，不過與一般茶樓不同。呢度主打新派中菜，除咗有開放式嘅廚房，畀食客望住廚師煮食，出品嘅點心及中菜都帶有玩味元素。事不宜遲，即刻向大家介紹。
「睇住流奶」，見到個咁搞笑嘅菜名，就知道食呢個奶黃包，要小心流哂奶黃出嚟。一籠三件嘅奶黃包，橙黃色加上有對眼晴嘅造型，篤穿個包之後，睇住佢流奶黃出黎，同個包你眼望我眼，真係搞笑。
同樣造型都Super Cute嘅仲有「一籠八戒」，一籠三件豬仔造型嘅叉燒包，望住個包咁可愛，真係唔忍心食落肚，唯有食之前影多幾張相留念啦⋯⋯
上個年代，有好多人都會帶個雀籠去茶樓嘆茶，同其他雀友傾下雀仔經，但呢個景象喺香港買少見少。不過，大家而家可以喺「飲茶」嗌個「鴿吞鳳梨」，試下另類體驗。
鴿吞鳳梨其實係一個雀籠入面，有三件雀仔造型嘅鳳梨酥，外皮香酥，鳳梨餡蓉有一絲絲鳳梨，都係一個唔錯嘅甜食。
最後，再推介多個呃Like之甜品。呢款點心「可可脆球」係有餡煎堆，入面唔係蓮蓉芝麻，而係流心朱古力！一上菜，都唔好咁急放落口，因為「可可脆球」內餡好熱，同埋超流心，攤凍一陣先食啦！
一入店內，個感覺唔似係一間中菜餐廳，店內環境主色係金同灰色，周圍有蒸籠同雀籠等等中式擺設，再加上開放式廚房設計，簡直就係完美嘅中西合璧。
一邊歎住一盅兩件，一邊欣賞咁正嘅環境，再加上相機食先，完全滿足到各位嘅要求呀！
YUM CHA
地址：九龍尖沙咀加連威老道20-22號Attitude Hotel 3樓（顯示地圖）
電話：2751 1666
營業時間：星期一至日 11:30am-11pm（Last Order：10:30pm）
延伸閱讀：
人氣Gelato手工雪條Stickhouse到港！率先試食【尖沙咀食乜好】
【18區掃食】三角公廁搵食 尖咀七大$100有找推介
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
