番茄師兄灣仔分店 開業即現人龍！招牌番茄湯麵殺入港島區 再推全新番茄芝士蛋包飯｜區區搵食
廣告
番茄師兄將於灣仔開分店！單聽店名，便知道番茄師傅是一間番茄湯麵專門店，由深水埗發圍起家，再到元朗開第二分店。如今番茄師兄殺入灣仔開第三分店，更有全新菜式，即睇有咩新嘢食！
番茄師兄開入灣仔 成第三分店！
人氣小店番茄師兄愈做愈紅，不止番茄湯底火鍋外賣團購賣個滿堂紅，最近更由深水埗、元朗殺到灣仔，開第三間新分店。新店位於灣仔和銅鑼灣港鐵站中間，不算就腳，但一樣吸引很多港島客來幫襯。
必食招牌騸牯牛番茄湯底 灣仔店獨賣芝士焗飯＋蛋包飯
食物方面，當然繼續以牛骨番茄招牌湯底作招徠，食客可搭配騸牯牛、牛脷、豬扒、黑豚肉，酸甜濃香，冬天食完，暖笠笠。今次港島開分店，老闆終於回應一眾「米飯寶寶」的要求，加入三重芝士焗飯和醬汁蛋包飯。兩款飯都可以選擇「招牌番茄汁」和「芝士蘑菇汁」為醬汁，至於配料，則可從十款食材中自由揀選。
推介騸牯牛面頰招牌番茄汁蛋包飯，牛肉香嫩與酸咪咪的番茄和滑蛋配搭得天衣無縫，撈飯一流。如你是芝士狂徒，就不能錯過脆炸龍脷魚柳三重芝士焗飯跟芝士蘑菇汁，魚柳炸得酥香，芝士又落得重手，跟creamy的蘑菇汁同吃，非常好味，且份量足，六、七十蚊已吃得飽飽。
得知將在灣仔開舖，不少網民也留言希望能多開幾間，將軍澳、觀塘、沙田都榜上有名。而在灣仔區的打工仔亦興奮留言：「港島人等咗你哋好耐喇！」
事實上，番茄師兄能突圍而出，除了湯底特別外，配搭上的牛肉也上乘！特別找買手牛皇莫入貨，全是即日屠宰的新鮮閹牛，無論肉味、油香都特別濃。配料選擇還有新鮮的花甲、豬腩肉、滑蛋等，麵底就可選米線、日式拉麵、烏冬各款湯麵價錢由$48起。
番茄湯底濃厚，酸咪咪很開胃，略嫌有一點點鹹，若肉味再豐富一點就更好。牛肉配料有三款，牛面頰軟腍、牛坑腩肥美、崩沙腩爽口煙韌，而且份量不少。（圖片來源：新假期編輯部早前報道）
- 番茄師兄
- 地址：灣仔安樂里1號利昌大廈地下B號舖
- 電話：3563 8456
- 營業時間：星期一至日11:30am-3:30pm、6pm-9pm
- Facebook：tomato.c.hing.shamshuipo
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
圖片來源：新假期編輯部、番茄師兄
