全港煲仔飯TOP 10人氣大比拼 米芝蓮推介／臘味排骨／香脆飯焦｜邊間最好食
Text：胡蚊 Photo：Fion/Day/Suki
* 試食評語乃根據記者個人經驗、觀感及口味得出，以試食當日出品為準。
*因疫情關係，餐廳營業時間或有更改，詳情請致電查詢。
煲仔飯人氣TOP10
第10位 旺角好好茶餐廳 款式最多
位於旺角鬧市，地點方便，加上入夜後，大廚就會移師到舖面開爐煲飯，非常有氣氛，難怪日賣四、五百煲。加上花樣多，除了最傳統口味，亦將煲仔菜變成煲仔飯，好似：梅菜扣肉煲仔飯、魚香茄子煲仔飯、枝竹羊腩煲仔飯等……超過三十款，花多眼亂。
抵讚位：
- 款式最多。
- 上枱最夠熱。
- 麻辣汁好香，配飯惹味。
可改善：
- 飯不夠乾身，而煲底飯焦又太燶，懷疑因火太猛。
- 豉油太鹹。
- 四川臘腸鹹而重味，麻辣雞調味亦略為重手。
好好茶餐廳
地址：旺角花園街1L-1R號鴻禧大廈地下2號舖（顯示地圖）
電話：2771 0061
營業時間：6:30am-11:30pm（煲仔飯11:30am開始供應）
備註：只收現金，不設加一
第9位 西環永合成馳名煲仔飯午市限定
舊舖在上環時已經打出名堂，只做午市，以麵包爐焗煲仔飯，貪其火力夠平均。午市經常排長龍，所以煲仔飯會焗至六、七成熟等客，繁忙時間，10分鐘左右就有得食；唔想同人迫，可以在早餐或下午茶時分幫襯，人較少，但就要等20分鐘才有得食。
抵讚位：
- 用料不錯：雞肉夠滑；北菇亦厚肉彈牙。
可改善：
- 12:30pm幫襯，10分鐘不到就上枱，飯不夠熱。
- 豉油太鹹。
- 飯焦微薄，失望。
- 飯太濕，唔夠香，水準不定。
永合成馳名煲仔飯
地址：西環德輔道西360號地舖（顯示地圖）
電話：2850 5723
營業時間：星期一至六7am-4pm
備註：只收現金，不設加一
第8位 慈雲山榮記茶餐室 創意煲仔Risotto
開業超過廿年的慈雲山茶記，一直賣開芝士撈丁，前幾年玩過界，創出芝士煲仔飯，將片放上網，打出名堂。近期餐廳首創的沙牛煲仔麵，更成為人氣菜式，晚晚都大排長龍去朝聖。餐牌除了有傳統煲仔飯、芝士飯，還有四川麻辣及流浮山金蠔拼煲仔飯。
抵讚位：
- 芝士飯飯面鋪上炸煙肉絲，飯底又加了粟米和洋葱，有咬口。
- 用了兩種芝士，奶香濃郁。
- 豉油濃淡適中。
可改善：
- 芝士煲仔飯太濕，雖有拉絲，但入口似risotto，而且雞件無味。
- 芝士飯太膩，而且沒有飯焦。
榮記茶餐室
地址：慈雲山毓華里12號地下A-B舖（顯示地圖）
電話：2328 9232
營業時間：星期一至六 6:30am-10pm；星期日6:30am-6pm（煲仔飯5pm開始供應外賣）
備註：只收現金，不設加一
第7位 筲箕灣紹華小廚 創新口味
前身是銅鑼灣川龍街新翠華，老闆在筲箕灣另起爐灶。店子除了20款傳統煲仔飯，亦有10款全新自創煲仔飯，好似：野菌鵝肝、疆土羊肉、泰式豬頸肉、蒜香牛頸脊等，配搭新穎，吸引很多年輕人幫襯。
抵讚位：
- 豉油香甜濃稠。
- 排骨醃得入味，肉質軟滑。
- 帶子大隻，肉質彈牙。
可改善：
- 飯夠乾身，但食起來少了飯香。
- 象拔蚌無鮮味，爽爽地。
- 加了海鮮的煲仔飯飯粒較濕，錯誤配搭。
- 飯焦不多。
紹華小廚
地址：筲箕灣愛秩序灣道15號愛秩序灣街市熟食中心CF3店（顯示地圖）
電話：8199 8188、2548 8818
營業時間：7am-11pm（煲仔飯6pm後供應）
備註：只收現金、不設加一
第6位 大埔陳漢記粥麵專 家配料出色
大埔老字號，90年代，門面較小，只賣粥麵，是中大學生宵夜熱點；後來鄰舖結業，索性租下擴充，千八呎、雙舖位、黑地金漆大招牌，很有霸氣。店中以腸粉和煲仔飯最聞名。煲仔飯6pm開賣，但食客五點多就坐定等食，冬天晚上，門外永遠有條人龍，是區內名店。
抵讚位：
- 白鱔有5件，厚切，都是腩位，夠肥美，啖啖肉，好食。
- 北菇厚肉好味；雞僅熟，肉質好滑。整體材料不俗。
可改善：
- 豉油太鹹 飯比較濕，無飯焦
- 臘腸腸衣太韌
- 每煲飯約等50分鐘，加上食客眾多，7:30門口30人長龍，要有排隊的心理準備。
陳漢記粥麵專家
地址：大埔運頭街91B地下（顯示地圖）
電話：2658 2277
營業時間：11am-4am（煲仔飯於6pm-2am供應）
備註：只收現金，不設加一
第5位 旺角銓滿記餐廳小廚 海鮮最強
旺角茶記，聞說老闆曾在海鮮酒家工作，所以對烹調海鮮特別有研究，加上店子鄰近旺角街市，新鮮靚料源源不絕，更索性以海鮮煲仔飯專門店自居，招牌菜式包括：陳皮粉絲龍躉球、金銀蒜粉絲扇貝、陳皮鴛鴦鮑魚、豉汁帶子……通通都可變成煲仔飯，加上老闆自創以先電爐後明火，將海鮮鮮味逼入飯中，引來台灣、日本傳媒追訪。
抵讚位：
- 食煲仔飯有老火湯及油菜送，湯不算太多味精，有誠意。
- 海蝦有3隻，size算大，開邊味道很鮮甜。
- 飯夠乾身，有飯香。
- 粉絲蒜香很突出，配黑松露醬，都幾夾，有驚喜。
- 牛肉新鮮，但味道偏淡。
可改善：
- 豉油太甜。
- 膶腸太肥，每啖都有幾粒肥豬肉。
- 一煲有極少飯焦，一煲無，水準不穩定。
銓滿記餐廳小廚
地址：旺角新填地街419號萬福大廈地下（顯示地圖）
電話：3760 8855
營業時間：7am-12mn（煲仔飯5pm起供應外賣，外賣自取有9折）
備註：只收現金，不設加一
Fb專頁：銓滿記餐廳小廚 Chuen Moon Kee Restaurant
第4位 荃灣江湖小棧 豬油加分
店主任職中廚多年，曾創業開過豆品店、小食店。近年回歸本行，以「武俠」為主題在荃灣開小菜館。只做晚市宵夜，有串燒、燒烤及粵式小炒；煲仔飯亦有趣，有自選款式，人客可在20款配料/佐醬中自由配搭，榨菜、豆豉鯪魚、麵醬、蝦膏……靈活多變，難怪周末10pm，門口仍有人在等位。因疫情闗係，餐廳暫停營業至12月23日。
抵讚位：
- 兩煲煲面都鋪滿葱花，顏色悅目，味道又清香。
- 飯粒乾身，加上有任落自家製豬油，夠香、夠惹味。
- 鯰魚很滑、肥美，但有淡淡泥味。
- 馬拉盞和鯰魚很夾，一濃一淡。
- 豉油調得好，香甜適中。
- 肉片選半肥瘦脢頭，腍滑；鹹魚亦梅香。
可改善：
- 馬拉盞份量略少，如加多些少就更好。
- 膶腸得5片，唔夠喉。
- 飯焦大片，但不夠香脆。
江湖小棧
地址：荃灣鱟地坊30號寶成大廈1號地舖（顯示地圖）
電話：2399 7994
營業時間：6pm-12mn
備註：設加一，只收現金
第3位 西營盤坤記煲仔小菜 長龍名店
西營盤名店，連得多年米芝蓮推介，是煲仔飯界老大哥。想食，必須有排隊的心理準備，記者準時6pm到達，不止全店已坐滿，門外更圍住廿多人。侍應着食客先登記，9:30pm再回來，非常誇張。老闆嫌瓦煲易裂，找來成本更貴的瓷煲，又以火山石代替炭火，老店在傳統中一直求變。
抵讚位：
- 雞很新鮮，醃味略重，但幾好食，雞亦夠滑。
- 飯甘香，軟硬有致，可能因為配料醃味重，令飯本身都有味道，就算不加豉油都夠味
- 豉油夠濃夠甜，有鮮味
- 飯焦好食，脆卜卜，一大塊在煲底。
可改善：
- 等足50分鐘才有得食，而且太多人排隊，吃一次，很勞累。
- 最平的排骨飯都要$80，部份雙併更是$105，以平民店來說，蠻貴。
- 雞件斬得太細，一煲約8小件，部份更是骨頭。
- 臘味份量太少：得1/3條膶腸、1/3臘腸同小件臘肉，唔夠喉。
- 膶腸太多肥豬肉粒。
坤記煲仔小菜
地址：西環西營盤皇后大道西263號和益大廈地下1號舖（顯示地圖）
電話：2803 7209
營業時間：11am-2:30pm、6pm-11:30pm（煲仔飯6pm起供應供應外賣）
備註：只收現金，不設加一
第2位 北角嚐喜大不同特色餐廳小廚 必食剁椒
日間是茶餐廳，晚市變身小菜館，吸引很多街坊專誠訂座來吃晚飯。四季炭火煲仔飯固然是每枱必食，亦有不少可預訂的私房小菜，價錢亦相宜。老闆對煲仔飯很有堅持，先用石油氣將飯煮至收水，放配料後，再移至炭火上以文火收水，一煲飯等足40分鐘才有得食。
抵讚位：
- 自家製的，鹹鹹酸酸，一打開煲蓋已經聞到很惹味。加上辣度適中，點到即止，配肉餅，好食﹗
- 肉餅有鮮味，雖然偏瘦，但入口又不會嚡。
- 牛肉嫩滑，有肉香。
- 飯粒乾爽分明，軟熟好食。
- 飯焦可以成塊起出，焦脆，不會太燶。
可改善：
- 豉油味道調得好，但略嫌不夠厚身。
00
嚐喜大不同特色餐廳小廚
地址：北角七姊妹道25-31號嘉蘭大廈地下C舖（顯示地圖）
電話：2833 6968
營業時間：7am-4:30pm；6pm-11pm（煲仔飯於6pm後供應外賣）
備註：不設加一，只收現金
第1位筲箕灣祥囍煲仔小廚 完美飯焦
位於後街暗巷，甚隱蔽，聞說老闆兼大廚曾在西環嚐囍及坤記做過，有20年煮煲仔飯經驗。一入門口就聞到炭香，感覺對辦。煲仔飯款式較大路，大廚推介的臘味蝦乾飯，蝦乾是同筲箕灣漁民直接入貨，鹹香惹味，值得一試。
抵讚位：
- 飯粒分明，有彈性，乾爽香軟，有飯味。
- 鹹魚梅香，入口化，好味；肉餅肥瘦亦適中，而且加入馬蹄，很爽口。
- 份量頗大，滿滿一煲，餸亦蠻多。
- 臘味蝦乾飯內加了冬菇粒，更好咬口，食落亦更香。
- 兩煲都有頭盔型飯焦，脆口而不燶。
- 臘味揀得不錯，油鴨不太肥、膶腸亦甘香。
可改善：
- 土魷沒有剁入肉餅中，而且切得稍大，咬時比較費勁。
- 豉油不夠甜香。
祥囍煲仔小廚
地址：筲箕灣愛民街6-28號新利大廈4A至5A地舖（顯示地圖）
電話：2343 8811、2343 9311
營業時間：3pm-12mn（煲仔飯5:30pm起供應外賣）
備註：不設加一，只收現金
Fb專頁：祥囍煲仔小廚
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
