【煮食神器】一機兩味！粉綠色 BRUNO雪糕機 開箱試玩報告！
撰文：ning 攝影：Fion
柔和粉綠色 BRUNO雪糕機
這部 BRUNO雪糕機 比A4紙稍大，雖然不及之前推出的幾款雪糕機的骰，但拿上手都唔覺重。而且機身的粉綠色提升了可愛感，貫徹日本小家電的精緻風格。
整部機的配件一眼睇晒，電動的攪拌主機、倒入雪糕漿的透明膠蓋、兩個攪拌槳，以及兩個雪糕冰桶。機身亦有「Lock」掣，可以鎖實主機、膠蓋及攪拌漿，以免在攪拌的過程中鬆脫。
雙杯設計 一次過整兩款雪糕
坊間的雪糕機，一般都只有一個冰桶，即是每次只可以做一種口味的雪糕，比較單調。這部 BRUNO雪糕機 就有雙杯設計，將兩個冰桶預先冷藏後，就可以同時做兩款口味，好方便。容量大約200ml，相等於2-3球雪糕，雙杯結合的話，就可以兩個人開心share食雪糕。
另外， BRUNO雪糕機 的直身圓柱冰桶，可以確保雪糕在攪拌的時候，四周受冷平均，增加成功率。
即刻試做雪糕！
開完箱，係時候落手試整了。今次就用伯爵茶雪糕和芒果杏仁粒雪糕來做測試。先將冰桶放入冰箱冷藏最少12小時。
將伯爵茶葉、芒果、砂糖、牛奶和鮮忌廉分別拌勻成伯爵茶雪糕漿和芒果雪糕漿。材料記得要夠凍，雪糕才可以攪拌成形，所以最穩陣就是拌好雪糕漿，再冷藏半小時備用。
伯爵茶葉 半茶匙、砂糖 2湯匙、牛奶 30毫升、忌廉 100毫升
芒果果蓉 80克、砂糖 2湯匙、牛奶 20毫升、忌廉 100毫升
先開機 再倒雪糕漿
這部 BRUNO雪糕機 操作簡易，裝嵌好攪拌主機，蓋於冰桶上就可以整雪糕。唯一要留意的是，製作雪糕時要先開機，待攪拌槳開始轉動後，才由膠蓋上的小孔倒入雪糕材料，否則雪糕漿有機會濺出。另外，倒入雪糕漿時，建議注入至攪拌槳約一半的份量，預留空間讓雪糕凝固脹起。
小孔設計亦方便在攪拌途中加入其他配料，增加口感。透明膠蓋也可以觀察到雪糕製作的進度。
成功！雪糕超軟滑！
攪拌大約15-20分鐘後，雪糕就完成了。效果是成功的，加上膠蓋小孔和闊圓冰桶的設計，有足夠空氣拌入雪糕內，出來的口感和軟雪糕相似，很綿滑，微微黏稠。
和坊間雪糕機一樣，雪糕製成後可以即食；但如果要影相呃Like，最好就將雪糕刮下，再雪至硬身，舀出雪糕球形狀，賣相就更靚。
試玩後感：好玩！
一向來B仔的小家電就不錯，今次這部 BRUNO雪糕機 亦無令人失望。粉綠色設計明顯攻陷煮婦們的少女心；做雪糕的效果頗滿意，基本上只要食譜份量正確、材料夠凍的話，幾乎每次都可以100%成功。
小缺點是機身較其他雪糕機大，需要頗多的空間儲存。雖然價錢比坊間雪糕機貴一半，但BRUNO雪糕機有兩個冰桶，變相都是合理的。
BRUNO Dual Ice Cream Maker 雙杯雪糕機
售價：$598
銷售點：SOGO、city’super、全線百老匯、Aeon、二德惠烘焙店、橘子烘焙
延伸閱讀：
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
