火鍋控 3大必食：靚牛脊、黑毛豬、活海鮮＠Dining娜

Q: 香港18區美食有甚麼推介？

新假期編輯已經為你整合了香港18區美食指，其中包括尖沙咀、旺角、銅鑼灣等 ......即睇更多詳情。

Feb 16 2017

(Presented by不倒翁)

我Dining娜係個不折不扣嘅火鍋控，全港嘅火鍋店真係食過唔少，與其食任食又低質嘅火鍋放題，我比較鍾意食單點的，寧願揀每碟食材都係靚料同精緻嘅。作為火鍋控，對3大必食：肥牛、海鮮同豬我有高要求。不倒翁係靚牛專家，一定滿足到我班嗜牛朋友；又自設魚缸，每日都有新鮮生猛海鮮運到；想食豬，估唔到佢哋都有西班牙黑毛豬，完全滿足我等嘴刁精。趁依家仲係凍凍哋，嗱嗱聲約齊班friends打番幾轉邊爐先！

火鍋必食極品：手切靚牛、西班牙黑毛豬

做得愈專，自然就出到愈優質嘅出品，不倒翁亦唔例外，佢哋雖然有多款靚牛選擇，但最主力同店主推介嘅都係手切肥牛脊，脊位係頸位以下，雪花多而均勻，有牛味，肉質非常軟腍，焯到剛熟好鬆化；就算唔小心焯過龍，都唔會韌。另外都有手切肥牛邊位，即係頸側肌，質感較彈牙有口感。不過相比之下，我都係鍾意食脊位多啲！其他靚牛選擇包括牛脷托、金錢牛、頂級雪花肥牛，都各有捧場客；至尊牛肉船就最啱有選擇困難症嘅人。

食豬，識食梗係食西班牙黑毛豬。一般火鍋店好少見，呢度嚴選嘅係36個月Iberico黑毛豬，仲要只係揀肉嫩彈牙嘅肩胛肉眼位，咁刁鑽，我欣賞！焯熟之後，咬落食到好香嘅肉香同油花甘香。

打邊爐最緊要除咗個爐，仲有湯底！不倒翁叫得做中日火鍋，真係有唔少中式同日式火鍋選擇，中式嘅有川芎白芷魚頭鍋、成都麻辣田雞鍋、花雕醉雞鍋等等；日式就有吟嚷花蟹鍋、日式咖喱海鮮鍋等，同大班friends食，我哋都鍾意叫1款傳統地道湯底，1款日式湯底。配料方面，超大隻嘅水餃王係推介首選，仲有手打魚滑、粉腸、金菇肥牛串都係火鍋控嘅必點熱選。

每日直送罕有生猛海鮮

好多女仔都鍾意食海鮮，我Dining娜當然都唔例外。不倒翁自設魚缸，每日都有新鮮海鮮到店，柯打時即叫即劏，無論係活劏刺身定火鍋配料，上枱時都係最生猛鮮味。除咗有加拿大頂級象拔蚌、南非孔雀鮑魚、法國生蠔、龍蝦等等，佢哋仲有多款罕有貴價海鮮，包括海花金鼓、大海蘇鼠斑、黃皮大海虎斑等等。女生就最鍾意食刺身，海膽、油甘魚、劍魚腩、帶子、牡丹蝦都係每日空運直送，新鮮度高。