【潮食傳統滋味】年輕健康版 京川滬 風味 ＠Dining娜

Photo：Issac（部分）

大家都知 京川滬 （北京、四川、上海）菜式，一向標榜濃油赤醬嘅特色風味，配料、醬汁用料多，味道特別濃，但我班 friends個個都話減肥 keep fit，成日都 say no。講真， 京川滬菜 嘅惹味真係好難抵擋，而且一大班人食先食到多啲款式，早前發現有間 京川滬 拉麵小籠包店以健怡少膩烹調，鹹淡適中，但又保留到傳統風味，最重要係價錢大眾化。農曆新年食得太多廣東菜，飯敘要轉轉口味，我 Dining娜 上個 Happy Friday 已經同班朋友試過喇，食完個個都俾 like，最緊要大家食得開心！

新派改良 保留地道 京川滬 風味

位於荃灣嘅名棧京川滬拉麵小籠包開咗唔係好耐，不過已經吸引到區內唔少食客捧場。食店總廚飛哥雖然係客家人，但係烹調 京川滬 菜式超過30年，煮得一手風味正宗嘅 京川滬 菜。鎮店招牌菜有樟茶鴨、上海毛豆大肉蟹炒年糕、酸菜魚塊、滬式雲吞雞煲，都係食客嘅必點之選。

名棧嘅樟茶鴨選用2斤重嘅新鮮米鴨，貪佢肉質軟腍嫩滑。先用自家秘製淮鹽醃足1日，然後用花香較突出嘅香片茶葉蒸熏後再炸，工序繁複，但就能夠將茶香迫入肉內，上枱時散發出回甘香味，難怪每日足足賣20隻！

至於酸菜魚，坊間多數用鯇魚，不過飛哥嫌多骨，改用龍脷柳，啖啖肉之餘，仲好嫩滑彈牙。呢度嘅鹹酸菜專登喺重慶買返嚟，用嚟炮製湯底，已經有超濃嘅四川風味，湯底再加入辣中帶酸嘅野山椒同乾辣椒，辣度夠，魚塊同湯底一齊煮，配料仲有番薯粉，吸收晒湯底精華，勁開胃，班女仔friends個個食唔停！

嚴謹製作巧手點心

食完主菜，到點心出場喇！小籠包要等15分鐘？當然無問題啦，因為係即叫即做，即叫即蒸！一啖咬開，餡料分量剛好，湯汁充滿住成個小籠包。一問之下，原來點心師傅徐師傅製作小籠包有套嚴格標準：每隻嘅新鮮豬肉重5克，梅頭同肥肉比例係3：2，高湯1湯匙（每日新鮮熬製）；麵糰即叫即打，外皮厚度均勻，邊薄而中間略厚，蒸後小籠包不會穿，收口麵糰小，咬落去鮮甜多湯，食1粒真係唔夠喉，決定encore！所以佢哋日賣超過200籠㗎。

3大識食Hashtag

名棧有別於好多上海菜酒家，打破上海菜傳統，堅持「三免」原則：全日免加一、免茶錢、免小食（如花生、蕎頭），相當抵食。佢哋仲有唔同款嘅優惠套餐，約多啲朋友食都有啱心水選擇，可以試多幾款菜式。

#三免 #免加一 #優惠套餐

名棧京川滬拉麵小籠包

地址：荃灣路德圍71-75號運通洋樓地下S舖（港鐵荃灣站A1出口）（顯示地圖）
電話：2952 5333
備註：不設加一，收現金及信用卡。
facebook：名棧 京•川•滬 拉麵小籠包