滿記新店 Sweetish ?! 潮推榴槤芝士薄餅 |元朗有咩好食|
廣告
平時食開 滿記 嘅中式甜品，估唔到今次佢哋搞新意，建立另一個旗下品牌 Sweetish by HONEYMOON DESSERT。餐廳走簡約北歐風，配上原木色調，感覺好Chill。其主打「魔鬼V.S.天使」路線，將你意想不到嘅嘢食結合一齊！就好似 榴槤 芝士 薄餅，真係好難想像味道係點！
魔鬼榴槤配芝士
又到咗食果王嘅日子，榴槤愛好者今次有新嘗試！Sweetish by HONEYMOON DESSERT 推出嘅一系列薄餅甜品中，最注目嘅當然係榴槤芝士薄餅。先將清甜嘅金枕頭混合起士以及忌廉芝士醬，再厚厚擦上3mm特薄餅底上，並灑上Mozzarella Cheese。
焗完之後已經可以見到表面嘅芝士完全融化，而且聞到濃濃榴槤味，拎上手即刻可以拉絲。濃濃嘅餡料配香脆餅底，可以中和返飽滯感，但都係好邪惡！
幸福感UP！草莓棉花糖組合好夢幻
如果想揀返啲適合大眾口味嘅薄餅，可以選擇草莓棉花糖薄餅。喺餅底到擦上Nutella再鋪上棉花糖，焗完之後棉花糖已同Nutella完美結合，此時再唧忌廉同放上草莓於頂，最後加入朱古力醬。又冷又熱加上棉花糖嘅煙韌，口感豐富，相信會吸引不少女士同小朋友！
浪漫唯美玫瑰花蛋糕
呢款Rose Angel如其名，表面擦滿忌廉，加上一塊塊經封乾再加糖嘅玫瑰花瓣，由賣相所看已經靚到唔捨得食！切開蛋糕，入面有兩層海棉蛋糕夾住玫瑰花醬，清新可口！媽咪或者女朋友生日絕對可以買返個氹下佢哋。
Sweetish by HONEYMOON DESSERT
地址：元朗朗日路8-9號及元龍街9號YOHO MALL 2 期 3 樓 A315B 舖（顯示地圖）
營業時間：11am-11pm
電話：2791 7388
Facebook：Sweetish by HONEYMOON DESSERT
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
