清熱解暑藥膳！羅漢果高湯葛粉絲

Q: 香港18區美食有甚麼推介？

新假期編輯已經為你整合了香港18區美食指，其中包括尖沙咀、旺角、銅鑼灣等 ......即睇更多詳情。

Jul 16 2015

吓？羅漢果唔係煲涼茶、或者煲老火湯就咁飲嘅咩？可以加埋葛粉絲一齊食架？咩味架？係咪好怪架？見到呢個title，或者你心入面會有呢啲疑問，呢間麵店嘅高湯由原材料熬成，唔落味精、雞粉，由開業至今，食客都係讚多過彈！到底呢碗高湯麵點解會有咁多like呢？記者決定親身試食！

IMG_0117 (1) — 店內招牌湯底：黑高湯(左)、大高湯(中)、白高湯(右) 配陽春麵/米線/葛粉絲/米粉

甘甜羅漢果黑高湯

黑高湯以羅漢果、牛骨、牛腩，煲六個鐘熬成，牛骨要用焗爐烘過先煮，以逼出牛嘅香味。上菜嘅時候，聞到有陣台式紅燒牛肉麵嘅味，亦見湯色呈醬油色，心諗應該會幾濃味，但飲落去就好唔同啦！好大陣羅漢果嘅甘甜味，但蓋過咗牛肉味，味道唔濃，個湯無乜油，味道比較淡，真係估唔到！

黑高湯葛粉絲 $48 配兩款麵點心 $75 配三款麵點心 $85 — 黑高湯葛粉絲 $48
配兩款麵點心 $75
配三款麵點心 $85

鮮味金腿雞湯

如果唔鍾意羅漢果嗰陣甘味，可以揀大高湯麵，呢隻湯底算係比較大路嘅選擇。湯主要由老雞、嫩雞、金華火腿、豬骨熬製而成，個湯要煲12個鐘，等材料出味。個湯要湯色係金黃色，非常清，聞落好大陣雞湯味，飲落味道好鮮，但味道都係偏淡，少咗啲鹹香。

大高湯陽春麵 $48 配兩款麵點心 $78 配三款麵點心 $88 — 大高湯陽春麵 $48
配兩款麵點心 $78
配三款麵點心 $88

白白滑滑鮮魚湯

白高湯由牛鰍及大眼雞、同埋一啲合時令嘅魚一齊煲，以岩鹽調味，因為煎香啲魚先至煲，所以湯色呈奶白色。白高湯適合配滑嘟嘟嘅米線。湯底有鮮魚味道，同前兩種湯底都係味道偏淡，唔太鹹，有少許腥。

白高湯米線 $48 配兩款麵點心 $75 配三款麵點心 $85 — 白高湯米線 $48
配兩款麵點心 $75
配三款麵點心 $85

雖然啲湯麵食落都真係幾鮮，又無味精，但對於食慣濃味野，無餸不歡嘅記者，淨係食一碗淨麵，真係好寡喎！每碗高湯麵其實可以跟餐加小食(咁價錢就要加返少少啦)。小食有十幾種，依家就搵咗比較受歡迎嘅四種小食俾大家睇。

爆漿芥末墨魚球

煎炸野真係好邪惡，同時又好吸引。正當我想將呢粒炸墨魚球放入口之際，負責人叫停咗我！！佢話要攤下先食，炸完即刻食，入面啲芥末醬會好燙口，唯有遲少少先啦……外層係燕麥碎，幾香脆，咬落去係有啲芥末醬爆出嚟，質感幾彈牙，食到有啲墨魚肉粒，幾有嚼勁。

卜卜脆炸蝦丸

同炸墨魚丸一樣咁邪惡嘅炸蝦丸，外層係炸到好脆嘅碎米粉，入面有鮮蝦同豬肉碎做餡，咬落去有少少酸梅汁流出嚟，不過食唔到有酸梅味。

酒香溏心蛋

以蛋白較實，蛋黃甘香嘅鴨蛋嚟做凍食溏心蛋，有陣煙燻味同埋有好大陣米酒香，蛋黃係醬嘅質地，質感幾滑。

清淡竹笙卷

蝦肉、豬肉同火腿打成膠狀，釀入竹笙再用湯煮，食落有彈牙蝦肉，亦有豬肉鮮味，但味道較為清淡。

懷舊味道豬油渣撈麵

豬油渣，可能好多keep緊fit嘅人士一聽見都會耍手擰頭，但其實以前物質唔富裕，脆卜卜嘅豬油渣撈飯就已經係人間美食，所以豬油渣係唔少老饕嘅恩物。以前食嘅豬油渣撈麵，甚至加埋豬油嚟撈以突出香味，不過呢碗麵嘅油就轉用植物油，好似無咁大罪惡感XP豬油渣炸得幾脆，有少少油份，配蔥油食幾惹味，仲有啲炸銀魚仔喺麵入面，但銀魚仔比較硬，又啲難咬。