【我最喜愛食材-海膽篇】 海膽＋牛油果蛋糕極澎湃~ 自己揀料 度身訂造壽司蛋糕

《新假期年度我最喜愛食材選舉2019》投選你最喜愛食材！免費下載食材Whatsapp Stickers！贏雙人食材之旅！

投票網址：https://foodof2019.weekendhk.com

撰文：方中snake 攝影：Fion、相關機構

海膽蛋糕 ：自己揀刺身＋食材

這間快餐形式的壽司刺身店，有各款丼飯、刺身，例如海膽、三文魚、油甘魚和甜蝦等等，lunch有好多上班一族幫襯。壽司蛋糕可以讓你自行挑選食材，就連蛋糕size都可以自己選擇，有6吋、8吋、11吋，海膽就可選加拿大海膽或日本馬糞海膽，另外仲可選一款夾心餡，有牛油果、黃瓜、冬菇；圍邊同樣可選一款餡料，有蟹籽、紫菜粉、日本芝麻、魚鬆粉。壽司蛋糕的結構和平時甜食的蛋糕差不多，把海綿蛋糕換了是壽司飯，上面的忌廉換了是刺身。（因應所選食材，價格都會有所不同）

今次記者揀選了加拿大海膽、牛油果和三文魚子鋪面，師傅另外加添了幾隻甜蝦，飯底則選了三文魚、青瓜，賣相好震撼！

壽司蛋糕是用一般的蛋糕盒裝着，不設送貨，須自行到舖取貨。

蛋糕上佈滿海膽、牛油果、甜蝦和三文魚子，好澎湃！而即使記者是把蛋糕由上環運回觀塘，經過一輪車程，蛋糕亦絲毫沒有散掉！

蛋糕有8吋大，重約5.5磅，非常足料，足夠一大班朋友開party用了！

即睇試食報告

蛋糕上最搶眼的是加拿大海膽，海膽和牛油果一起吃的味道都幾夾，第一口會吃到滑嘟嘟、很鮮甜的海膽，再咬第二口就會吃到很creamy的牛油果，兩者味道互相交疊，又因為牛油果切得好薄，多吃幾件亦不會膩。

加拿大海膽當然是主角！望落每片都大塊完整，原來足足用了超過兩板的海膽，有27塊之多！海膽雖不算勁厚身，但入口亦creamy鮮甜，好滿足！

把牛油果和海膽一起吃，更添軟滑口感，而因為牛油果切得很薄，所以不會很膩。

共有4隻甜蝦，是師傅額外加的，肉質爽口有鮮味。

三文魚子粒粒爆汁，夠飽滿，充滿鹹鮮味。

2吋壽司飯 三文魚＋青瓜分量少

海膽和牛油果下面是壽司飯底，飯內亦能加入自選食材，記者就選了三文魚和青瓜，飯有2吋高，但可能是蛋糕的結構上要做得結實一點，所以飯亦壓得好緊密，質感較實，口感麻麻。食落雖有微微醋味，但三文魚和青瓜都是細碎的粒狀，而且分佈份量較少，變相好像齋吃壽司飯，有點單調。

可以選蟹子或紫菜粉圍邊，蟹子的賣相不錯，望落幾開胃。

不過蟹子分佈得不太平均，有一邊好疏落。另亦可選紫菜粉圍邊， 不過蛋糕就會變得黑漆漆。

飯底好結實，不能容易地一刀切，醋味適中，如果鬆軟點就好了。

牛油果＋豉油＝三文魚？

飯底內的三文魚太少，固然不滿足。不過早前網上流傳把牛油果沾上日式豉油吃，味道會像吃三文魚，儘管試試！記者把整片牛油果放進豉油內，入口好滑溜，質感和肥美的三文魚差不多，而吃到豉油的鹹味，亦會有錯覺，令你以為真的在吃帶魚鮮的食物，想不到有幾分相似，暫時止止三文魚癮亦OK。

牛油果creamy的口感會令你有一刻錯覺，令你覺得在吃綿滑的三文魚。
總結：海膽壽司蛋糕賣相好震撼，好適合影相呃like，當生日蛋糕送出去，收到的人會有驚喜！而壽司蛋糕亦較少見，又可以自己選配料，刺身味道又OK。

一句到尾：少點飯、多點三文魚就好了！

海膽屋
地址：上環永樂街28-34號地下A舖（顯示地圖）
電話：2409 2409/6999 2919（WhatsApp）
營業時間：星期一至日 12:00nn-10:00pm
備註：記者選的8吋海膽壽司蛋糕為$1080，蛋糕可自行選配食材及大小，會因為不同食材及材料收費。選好材料後WhatsApp店主下單，店主和師傅商量後便會報價，價錢OK的便可以約定取貨時間！需至少提早3天預訂，不設送貨。

新假期年度我最喜愛食材選舉2019！投票即下載Whatsapp Stickers！贏免費雙人食材之旅