海景私竇│歎零味精住家 靚湯火鍋 ＠Dining娜
Photo：二彤
一啖不加味精、好似阿媽煲嘅住家靚湯，飲落去舒服療癒，最能征服火鍋達人嘅胃口。私房火鍋店18鍋所有湯底都係零味精嘅住家湯，加上大廚每日用新鮮靚料，鮮熬嘅 靚湯火鍋 湯底尤其鮮甜細緻。食店仲會供應鮮魚同海鮮活劏刺身，海鮮迷最Like。由於店主熱愛打邊爐，所以店舖選址銅鑼灣臨海位置，坐擁180度維港海景，環境相當舒服，自然成為唔少食客嘅火鍋私竇，每逢節日都會預訂包場打邊爐。
靚水炮製零味精住家 靚湯火鍋
由於店主自己不時都喺18鍋同朋友打邊爐，所以對湯底嘅製作尤其執著。總廚聰哥任職打邊爐師傅已有十二、三年，熬煮嘅 靚湯火鍋 湯底非常到家，著重選用新鮮靚料，所以唔落味精啖住家湯一樣鮮甜，全部湯底都可以飲，大家不妨先飲湯後火鍋。
店主深信飲好水令人健康，所以湯底高成本用咗電解還原水熬煮，每啖湯入口清純細滑，與別不同。
海鮮湯底大家食得多，但人氣湯底辣味野菌花蛤蟹鍋，加入了辛辣風味感覺好唔同，亦好啱呢個涼涼哋嘅時候食，特別暖胃。呢個湯底由海鮮辣湯煮成，再將新鮮膏蟹、花蛤煮到剛剛熟，加入炒香嘅野菌，一啖湯就飲到唔同層次嘅海鮮、配料真鮮味。除咗大中小辣，唔食辣的朋友亦可以揀唔辣版本。
靚湯火鍋 首選必食，海鮮辣湯加入3款炒香嘅珍菌，再放入新鮮膏蟹同花蛤提鮮，鮮香撲鼻！
至於另一招牌熱選水佬魚仔鍋，總廚會視乎時令揀選4種海魚，務求熬出最鮮香嘅魚湯。師傅透露，今期佢用咗九棍魚、門鱔等鮮魚，貪其魚味濃郁；再加埋豆腐、番茄、黃豆等熬煮3個鐘，質感香滑、味道濃郁似豆漿，飲完好似有大量蛋白質注入皮膚咁，我Dining娜最Like！
嚴選多種海魚炮製，今期用上九棍魚、門鱔，加入豆腐、番茄、黃豆等熬湯3個鐘，濃郁細滑，質感似豆漿！
日日新鮮私房火鍋
店主同總廚最重視食材新鮮，由於18鍋專做預訂私房火鍋，所以接到柯打後，總廚每朝會親自去街市揀選當日用嘅生猛海鮮、靚牛肉、當造食材等新鮮靚料，無論係湯底抑或火鍋配料都食到最鮮嘅味道。
最欣賞18鍋嘅係，小小店舖依然堅持每日供應多款時令活魚、海鮮刺身，都係由總廚每朝去街市嚴選，每日新鮮靚海產包括紅鱲魚、石蚌、立魚、章紅魚等活魚刺身，亦有龍蝦、象拔蚌、牡丹蝦等刺身，全部即叫即劏，生猛鮮甜。
大廚每日由街市挑選最靚海鮮，日本大元貝、南非6頭鮑、紐西蘭蟶子皇、海中蝦都係今期推介。
18鍋每日都有時令活魚供應，即叫即劏，紅鱲魚刺身肉質厚實，口感爽脆。
每日搶靚牛、刀工令牛肉加分
除咗各款海鮮，店主同總廚連牛肉都會親自去街市精心挑選，不假手於人，因為佢哋話肉類放得耐就會走味，呢度出品嘅每樣食品都咁一絲不苟，佩服！
嗜牛族嚟到18鍋就有口福喇，因為有多款唔同部位選擇，包括手切頸脊、頸邊肥牛、牛𦟌、本地牛白肉、牛小排、牛柳粒等。有啲部位供應量少或難買，例如金錢𦟌（即牛𦟌）、牛白肉等，都要識人先可以攞到靚貨，所以師傅每日都要去「搶貨」！
牛柳粒肉質軟腍；金錢𦟌爽口鬆化；牛頸脊肥瘦適中、有咬口，不同部位各具特色。
識食牛嘅朋友都會揀手切，手切同機切牛肉最大分別係前者有咬口得多！原來聰哥刀工亦非常了得，佢會小心拿捏各種牛肉部位嘅紋路嚟落刀，以確保切到最理想嘅軟腍、細緻口感，同時灼後食到香濃嘅牛脂油花。落刀稍有偏頗，牛肉就會過韌，所以有靚牛都要遇到超卓嘅解牛師傅。
每日新鮮全人手打，每粒手打丸均由九成鮮肉同新鮮食材製成，真材實料，爽口彈牙。
前者嘅韮菜同豬肉比例係8:2，韮菜味濃，有霸氣，豬肉就用半肥瘦，口感極佳；而後者嘅紫洋葱同豬肉比例就各佔一半，紫洋葱味道夠香又夠甜，女生大愛，兩款都係美味健康之選。
私竇歎180度維港海景
由於店主一班好友都係熱愛打邊爐嘅同道中人，開設此店都係因為「私心」，可以有個私竇畀大家歎火鍋，又係傾偈、飲酒、開party嘅聚腳點。
18鍋地方唔算好大，但勝在好有住家feel，感覺寧靜cozy。呢度主打做預訂私房菜（約佔九成），客人可以自己tailor made菜單，例如海鮮加牛，又或者全牛宴等；客人亦可提出「筆值」由店主構思發辦又得！
要讚嘅仲有佢哋可以睇到180度無敵維港海景，睇煙花一覽無遺，包場開party打邊爐最正！而且店舖位置幾有私隱度，好多明星、歌星都會幫襯。
好多幫襯過18鍋嘅朋友，都想喺屋企開火鍋party，但又怕麻煩、唔想買嘢唔想洗，呢度都有外賣預訂， 靚湯火鍋 湯底、配料、醬料全部直送到屋企，正！
烚時精選
‧ 零味精靚水煲湯：唔止用新鮮海鮮、靚料，仲用高成本嘅電解還原水熬湯，加上零味精，火鍋湯底特別鮮甜。
‧ 每日新鮮入貨：海鮮、牛肉、蔬菜等，每朝都由師傅去街市揀時令食材，烹調嘅湯底同配料都保留真鮮味。
‧ 180度海景：打邊爐同時欣賞無敵大海景，仲可以睇煙花，係理想嘅火鍋party私竇！
18鍋
Whatsapp訂座電話：6996 4148
備註：須預訂，另設外賣預訂（須1日前預訂）；設加一，收現金及信用卡。
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
