太子區涼茶老店 兒時街頭 油渣麵 +豬骨湯碗仔翅 |撐小店！|
廣告
太子區這間小店，表面上是涼茶舖，怎麼竟然有 油渣麵 ？看檔的是一位嬌滴滴後生女。舖頭細細，但做得好有心機，油渣是攞貨回來，卻有腍(浸過湯)同脆(未浸過湯)兩種，想要瘦渣或肥渣都可以講明，外面邊有咁好服務？自家製辣菜脯，味道很家常，食得出心機。無論味道和賣相，都似足童年時在街邊食 油渣麵 嗰種feel。
撰文：Lisa 攝影：Scott
爸爸病了 大女上場
春潤堂是翟氏一家的心血，12年前，最初只賣涼茶和 油渣麵 小食，兩年後生意漸有起色，棄賣涼茶，專心做小食。可是翟生身體出了毛病，翟太一人獨力難撐，只好回家央求在補習社工作的大女幫手。「邊有廿幾歲女賣魚蛋咁失禮？」大女起初甚是反感。翟太卻不放棄，日復日說：「試吓先喇﹗好過在外頭打工(下刪一千字)。」歷時一年，女兒終於應承辭工來幫手。
企到腳腫 頂硬上
要由冷氣教室，走入熱辣辣廚房，殊不簡單，連翟爸爸也打賭女兒捱不過兩天。「第一個月，企唔慣，對腳腫到著唔到鞋，晚晚要浸鹽水，幾慘﹗」媽媽開始心痛，勸她放棄，但決心下了，豈能說改就改，一於頂硬上。一個月過後，腳不再腫，工作亦慢慢上手。
味道踏實 價錢實惠
手撻魚肉、用豬骨熬湯做碗仔翅、自醃香辣菜脯、調製酸辣粉醬汁……通通都做得有板有眼。妹妹見家姐做得起勁，也自告奮勇回來幫手，三母女，胼手胝足，將舖頭做旺。來幫襯的街坊都盛讚服務好，出品味道踏實。以車仔麵為例，外面收八、九蚊一個餸，這裡只賣五蚊，已經有7粒魚蛋，擺明薄利多銷。
為生活拼搏 平凡便是福
三母女對現在的生活也很滿意：「生意好，忙不停手，時間飛快就過；生意靜，打吓牙骹，說說笑笑又一天。」能夠全家上下一心，為生活拼搏，不就是最平凡的幸福嗎？
春潤堂
地址：深水埗大埔道14-16號華都大廈2號舖（顯示地圖）
電話：2788 2383
營業時間：星期一至星期六 9:30am-10pm、星期日10:30am-8pm
平均消費：$25/位
備註：不設加一，只收現金
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
