日本直送！師傅推介今季必食最鮮 日本水產 ＠Dining娜

Photo：二筒

香港人鍾意食日本菜，刺身、壽司更加係長青首選必食。香港好多間壽司店嘅魚類、水產都係由日本直送，絕對有一定新鮮度。不過打開餐牌選擇多多，總係令人花多眼亂，唔知點揀好？今次搵咗負責推廣日本水產嘅JFOODO（The Japan Food Product Overseas Promotion Center）講吓今季當造之選。

專家推介必食 日本水產

所謂不時不食，識食當然要揀每季最當造嘅 日本水產 嚟食，尤其是刺身、壽司，先至能夠食到食材最原始嘅鮮甜滋味。JFOODO副總監小野村拓志先生同埋從事日本壽司餐廳多年嘅壽司師傅，都大讚初春季節嘅油甘魚、鯛魚、帆立貝，皆因佢哋會特別肥美、厚肉，所以兩位都特別推介。

3大今期當造水產

鯛魚、油甘魚、帆立貝都係小野村先生嘅專業推介，睇睇有咩原因！

【鯛魚】

日本人尤其鍾情於鯛魚，唔單只因為佢係幸運之魚，而且油脂甘香、分佈均勻，咬落去有種淡淡嘅鮮甜，肉質鮮爽幼嫩，簡單配wasabi或者海鹽食已經能夠帶出鮮味，最當造嘅時分係秋季至春季之間。

【油甘魚】

油甘魚油分多、肥美鮮甜，腹部係油脂最集中嘅位置。而鰤魚（大品種嘅油甘魚）更係油甘魚之王，大家可以因應自己嘅喜好揀選唔同部位嚟食。依家出產嘅油甘魚特別油潤、有嚼頭，魚油味濃香。

【帆立貝】

多數來自北海道、青森，今季歎帆立貝，最能夠食到佢厚肉鮮嫩嘅味道，除咗刺身、壽司，都好適合用嚟炙燒或烤焗，味道更香口，料理創作好多元化。而日文叫扇貝做「帆立」，就係因為佢外形同帆船好似，帆立貝仲有一帆風順之意，幾有意頭噃！