【18區掃食】石籬5大必吃! 懷舊 新香冰廳 私房熱情果蛋糕
撰文、攝影:Undercover 餓底覓食
1. 周末限定! 懷舊 新香冰廳 私房蛋糕
係呢間冰廳入面，你會感受到老闆同伙記真係拎個心出嚟同你交流，每件糕餅都用心製作，佢地嘅好客同熱情，小編真係好欣賞！
除咗傳統糕餅，呢個週末特別推介絕對要試，每星期都有唔同特色蛋糕，全部都係老闆娘親自整，有柚子芝士蛋白蛋糕、伯爵紅茶朱古力蛋糕、紅桑子慕絲蛋糕等，仲要係好搶手，四點左右已經賣剩最後兩件！想食就要趁早去啦！
今個星期係熱情果慕絲蛋糕，賣相好吸引，第一啖入口，面層嘅熱情果啫喱偏酸 帶少少甜，好開胃，熱情果陣味咁突出係因為老闆娘用熱情果打成蓉來製作，所以味道唔會死甜，再配合慕絲同底層朱古蛋糕真係好夾！
夏日熱辣辣，一杯冰凍又解渴嘅飲品唔少得，呢杯凍柑桔話梅蜜酸酸甜甜，潤喉降火，夏天must try。
酥皮嘅忠實粉絲請舉手，熱烘烘嘅香脆外層，一咬落去勁鬆化，加上勁嫩滑嘅蛋，真係無得輸！
越簡單嘅甜品越能顯功夫，呢個合桃蛋糕結實得嚟入口鬆化，用嚟做下午茶就最好不過。
食甜點配返杯咖啡先叫歎，呢一杯特濃咖啡除咗濃烈嘅咖啡香味，仲有啲果仁香氣，醒腦提神！
老闆仲要請我哋食自家製鳥結糖！
新香冰廳餅店
地址: 葵涌石蔭路58號地下(顯示地圖)
電話: 2426 0255
營業時間: 7:00am- 7:00pm
2. 每枱必點！特色越南河
呢間深受街坊們喜愛嘅美食店，主打潮式粉麵，除咗價錢大眾化，仲係物超所值，唔少人專程嚟食佢地嘅招牌特色越南河，每枱必點。
一片檸檬已經為這碗越南河生色不少，先飲一啖湯，湯底顏色好深，充滿濃濃嘅牛骨味道，非常鮮甜，裡面帶有檸檬酸同剛好嘅微辣，加埋牛肉好嫩滑，甜甜嘅洋葱夾埋越南河一齊食真係完美配搭！
自家製雲吞，好足料！雲吞皮夠薄，入口爽滑，每一隻雲吞都包入一隻蝦，夠鮮味，配麵或淨食雲吞都夠滿足。
豆漿有香濃豆香，啱晒夏天飲。
有口福美食店
地址: 葵涌大隴街153號怡勝花園2號 (顯示地圖)
電話: 2428 6611
營業時間: 9am- 1am
3. 街坊食堂 懷舊快餐店
老牌懷舊快餐店，街坊由細食到大，係一間保留咗時光嘅快餐店，連啲枱櫈都係fix死係地下，好懷舊～！假期晏就坐滿咗嚟食下午茶嘅一家大細，店員好親切，真係好似坐咗時光機返咗幾廿年前咁！
雞髀足足有一隻手掌咁大，落左單之後，店員會再炸，外層炸至金黃，一咬落去好脆口，面層帶有鹽，味道剛好，裏面依然嫩滑有肉汁，配上波浪粗薯條，肥幾磅都要食！
食豬扒包唔一定要去澳門，呢個包嘅上下層包面都用牛油煎過，充滿牛油香又脆卜卜，配上醃過嘅厚切豬扒，啖啖都好滿足！
食炸髀最好就係配杯紅豆冰，呢杯好足料好多紅豆，每粒紅豆都煲到軟綿綿，夠晒甜！
食口福
地址: 葵涌和宜合道58號地下(顯示地圖)
電話: 2427 6383
營業時間: 星期一至六 6:30am- 8:30pm
4. 不得不試! 無敵豬扒 絕世牛扒
嘩嘩嘩！門口大大隻字寫住「無敵豬扒 絕世牛扒」，真係超有霸氣！最霸氣嘅係佢即刻試下你係何方神聖先！
牛扒大大塊，薄得嚟好嫩口，最好味係個黑椒汁！微辣但唔嗆喉，唔太食得辣嘅都接受到！惹味到淨係汁都可以撈一碗飯！
豬扒真係好驚喜，外層煎得金黃香口，咬落去超級鬆軟，完全冇鬆肉粉嘅跡象，明顯下過功夫，配上粟米汁出奇地夾，簡單嘅扒飯，水準超班無敵豬扒並唔係齋講架。
碗仔翅主要有肉絲同粉絲，入口尚算順滑，不過肉絲較粗糙，有啲失望！
發雞盲都見到無敵豬扒絕世牛扒呢幾隻字!
金輝麵食
地址: 葵涌和宜合道82號地下(顯示地圖)
電話: 5543 5938
營業時間: 星期一至星期六 6:30am- 5:00pm，星期日休息
5. 貓痴店主開Café 不過無真貓
Meow~ 無錯！呢間係以貓為主題嘅Café ，不過係無真貓嘅 (小編扮俾你睇啦)，全因店主喜愛貓，享受烹調，所以就開咗呢間貓主題cafe，連嘢食都有樣叫貓鬚，好得意！
解構下呢個全日早餐先，沙律菜好新鮮，拌上欖油同芝麻醬，有一隻好靚嘅太陽蛋，煙肉煎得脆卜卜，仲有腸、茄汁焗豆、薯餅同埋鬆脆牛角包。
唔好以為素食就好齋，呢個綠油油意粉用香草、欖油同蒜炒到好香口，薯仔係爽口嘅，好有口感。
用空心意粉沾上炸粉，落油炸至一條條貓鬚造型，好新奇！不過食落有偏硬。
檸檬梳打飲落好清新，不過甜咗少少。
有個好可愛嘅貓貓杯盛茶，另外有一小壺蜂蜜，就咁飲杯茶有啲茶澀，落少少蜂蜜就可以中和苦澀之餘，仲可以帶出茶香，好潤喉！
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
