新開759飯堂!!!! 咩事伏味濃?| 觀塘有咩好食
廣告
759再有新搞作！今次在觀塘開工廈飯堂，一開業即成網民熱話，被彈伏味濃。有別於過往的茶餐廳、車仔麵，飯堂期望做到咩都有得食，除基本茶記食物外，新增燒味及蒸飯，不過價錢唔平。而蒸飯及車仔麵更在開業第四日後，因出餐時間太耐，而暫停供應，內部調整將再推出。759話定價與連鎖食肆相若，飯堂座位闊落，租金等成本都有差別，有信心用味道吸引客人，係真唔係？我哋即刻睇吓究竟有咩嘢食先！
午餐及茶餐
午餐每日設六款，售價為$45，例如有洋蔥豬扒腸仔飯、銀魚仔蒸肉餅飯等，天天不同，主力想做到大件夾抵食。而茶餐方面，選擇不多，主要是炸物、多士等小食類，炒粉麵飯要散叫，另有燒味茶餐索價$35。
有網民話，食過一口年糕茶餐，鬧爆孤寒到俾得一件年糕。飯堂話個餐有三件年糕，未知當日出錯的原因。
燒味飯
午市單拼飯$45，而雙拼飯則要$53，對比同區工廈食堂唔算平。記者喺開店頭幾日已經去幫襯，唔知點解叫燒味係等得最耐，足足等咗40分鐘，員工又唔幫手追單，掛住講電話，真係有d嬲嬲豬。
即炒小菜
至於759會員有無優惠呢？答案是沒有的，只有員工設八折優惠。
總評：
整體來說，食物水準都可以，以記者當日食的四寶飯來說，味道都ok，只係菜單上明明係某四款燒味，但嚟到卻無咗鹹蛋，變咗燒鴨，而無問過你如果改動想食邊款。另外，失分最多的應該就係員工服務，雖說現場各位姐姐斯文有禮，但落order後睇住廚房及水吧的工作人員郁都無郁過，呆企或傾計傾咗十幾分鐘先開始有反應煮order（當時全場得三枱客，其餘兩枱係食緊），而只需要切的燒味餐，更係30分鐘後先送到，頭25分鐘睇住燒味大廚喺度傾計…若言大家習慣歐洲生活，一餐飯可以花上兩個鐘的話，那就問題不大的。
759飯堂
地址：九龍觀塘成業街15-17號成運工業大廈地下1號（顯示地圖）
電話：3960 9899
營業時間： 7am-8pm
備註：只收現金及八達通
座位：170
消費：$40
延伸閱讀：
東京麵廠直送! 海老拉麵滾住上枱 |九龍城有咩好食|
40%超濃抹茶雪糕! 自選濃度似足日本淺草 |尖沙咀有咩好食|
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
