敘福樓旗下一日關三店 主席黃傑龍：作為香港人願一同承擔

主席黃傑龍在個人專頁表示：「大家唔需要特別嚟支持我，去都去咗小店先。」！

撰文：Joanne 相片：新傳媒資料室、黃傑龍facebook專頁

「敘福樓」生意僅剩一、兩成

過去數個月，因受社運衝擊，零售業及餐飲業首當其衝受到影響，由於多間分店都位於社會運動的核心區，三間受影響的分店分別是位於沙田新城市柳氏家、旺角瓊華中心及銅鑼灣世貿WTC的MMC牛涮鍋。黃傑龍指，三家分店生意過去只屬一般，10月份生意額僅是平常的10%至20%，因此才有暫停營業的決定，但為免影響員工生計，黃傑龍表示三間餐廳的員工若願意，可調至其他店舖上班。今日（9/10) 黃傑龍更在facebook專頁為集團決定作出交代。

沙田新城市柳氏家公告

銅鑼灣世貿WTC的MMC牛涮鍋公告

黃傑龍facebook專頁貼文全文如下：

「今日一日之內我哋暫停營業咗3.5間分店，有客人同埋朋友即刻問點解同埋關心我。其實三間分別係沙田新城市柳氏家、旺角瓊華中心及銅鑼灣世貿WTC的MMC牛涮鍋，仲有0.5間係收咗鋪未裝修嘅永華麵家現在也決定擱置了。 三間分店一向生意都只屬一般，過去呢幾個月亦係處於社會運動的核心區，踏入10月只有正常生意的10-20%，能夠頂到今天已經係同事最大的努力，奈何實在係虧損得太嚴重了。 停業唔可以怪任何人，只係我管理不佳。 中美貿易戰嚴重困擾本地經濟，港鐵經常突然提早關站，都明顯加速了問題的浮現。社會運動帶來的社會成本，我作為香港人當然願意一同承擔。

生意人做到要關門從來都係最困難嘅決定，但係面對着完全不明朗的處境，再困難的決定只要正確，都要馬上落實。 三間鋪我堅持一個同事都唔裁減，全部同事只要願意都會繼續被聘請調去其他店舖。

我會繼續懇請同哀求各大業主高抬貴手願意減租，6月至今暫時只有兩個舖業主同意減租，雖然減幅是很少（幫助極微）但係我內心都好感激佢哋，因為只講合約精神的話其實佢係一毫子都唔需要減嘅。

我唔想裁員，只要同事願意一起努力，一起面對困難的前路，我希望敘福樓集團仲會成為一間百年企業。今天香港亦有一些百年企業，100年以上即係經歷過滿清倒台、國共內戰、第二次世界大戰、六七暴動、中英前途談判、天安門事件、金融風暴海嘯地震、SARS… 既然這麼困難都有企業捱得過，正好是我們學習的榜樣。(事實上我們公司亦係捱過咗以上其中幾個難關)

我會繼續擔任公司CEO，直至同事與顧客對我嘅支持率跌破50分，絕對不會等到低過20分。懇請大家繼續指正教導 , 肯定我們將來會更加強壯, 只要今次唔死。

今天香港整個零售餐飲業都經營極度困難，所以唔係單單我面對這個困境，大家唔需要特別嚟支持我，去都去咗小店先。」