【出街搵食】掃街食到飽！葵芳食品嘉年華 15大必試小食推介｜葵芳街頭小食｜

撰文：ning 攝影：Woody

50檔掃街小食列陣

這個位於葵芳葵涌運動場的食品嘉年華，正正就在掃街勝地葵廣旁邊，展期由即日去到11月5日，入場費只是$5 ，最啱Weekend去行吓。

場內分成多個專區，包括乾貨、廚具、零食等，而掃街迷最關心的，就是可以即買即食的熟食區，接近50檔攤位，各式街頭小食列陣，難怪閒日去都人頭湧湧，好像年宵般熱鬧！

15大場內掃街必食推介

熟食區有咁多款美食，看得人花多眼亂。而且始終眼闊肚窄，所以要重點出擊，即睇以下15大必食推介。

1.流心彩虹玉子燒

這檔玉子燒以往都在其他美食展出現過，所有玉子燒都是即叫即煎，大份又足料。今次這款彩虹玉子燒就加了蟹柳和店主獨創的蜜瓜味芝士。聽落奇怪，記者都怕有藥水味，食落竟然無，反而帶點甜味，玉子燒亦有鹹甜的鰹魚清香，算有驚喜。

2.榴槤小丸子

和玉子燒同一攤檔，吉列外層的糯米皮，包著馬來西亞榴槤蓉，一咬爆漿，而且口感軟滑，榴槤味很濃郁，齒頰留香。

3.梳乎厘班戟

掃街新寵梳乎厘班戟，場內都有，件件鬆軟震騰騰。梳乎厘班戟一客兩件，可以選擇朱古力和榴槤口味，前者會淋上朱古力醬，後者則是榴槤蓉；亦可以乜都唔加，只吃原味，甚至雙拼亦得，好貼心。不過因為即叫即煎，所以都需要時間等候。

4.蒲燒鰻魚

即叫即燒，並且會塗上鰻魚汁，想留肚亦可以只叫半條，不過識食就當然原條食。鰻魚肉唔算厚肉，勝在肉嫩、無泥味，配鰻魚汁就剛好。

5.冰鎮醉鮑魚

與蒲燒鰻魚同一檔，一樽樽醉鮑魚用冰桶冰鎮。酒香撲鼻，而且鮑魚煮得夠腍，食落軟滑唔覺韌。

6.新鮮出爐太鼓燒餅

主打鮮果汁、茶飲的Color ChaCha今次都有在場擺檔，兼賣新鮮出爐的太鼓燒餅。流沙奶黃餡最好食，內裡有自家製的奶皇醬，再放入鹹蛋黃，食落有流心和沙沙的鹹蛋黃粒，甜中帶點甘香。

另外也有香蕉朱古力餡，裡面夾有一粒三角朱古力，很香甜，啱晒朱古力控。

7.彩虹果汁特飲、鮮果牛奶

掃街食到一半覺得口渴，可以買這款會場限定的彩虹鮮果汁特飲來喝。用上新鮮果汁，配搭底層的果凍、菠蘿粒和蘋果粒，清甜解渴又有口感；而且頗大支，算抵飲。

有少女心兼喜歡Pastel色的，可以飲鮮果牛奶，用士多啤梨、芒果等混成淡粉紅色及黃色的牛奶，撞上淺藍色的蝶豆花牛奶，夢幻之餘又呃到Like。

8.即包北京片皮鴨

另一檔就有人手即包的北京片皮鴨，在鴨餅塗上甜麵醬，包入鴨肉、青瓜而成。略嫌欠缺熱度，勝在鴨肉肥瘦適中，一客4件頗飽肚。

9.蟹粉小籠包

在北京片皮鴨旁邊，就有蟹粉小籠包，用蒸爐烘著夠晒熱辣辣，細細粒可以一啖一隻，湯汁都頗豐富。

10.蜜糖炒豬手

原隻豬手起肉切粒，再在鐵板上加蜜糖炒香，每件都食到豬手甘香的油脂，以及帶黑椒煙燻味的豬手肉，很惹味。

11.煎餅果子

北京、天津等地的傳統街頭小食，用綠豆製成的麵漿，加上雞蛋、甜麵醬、葱花，再夾上一塊薄脆而成，口感富層次，外面的綠豆蛋餅煙韌，內裡就脆卜卜，加點辣醬，食落香口過癮。

12.芋圓豆花

場內也有多間賣芋圓的攤檔，這間配料最多，底層有滑嘟嘟的豆花，再加三色芋圓、粉圓、珍珠、紅豆和一球紫薯蓉，很豐富。芋圓彈牙有嚼勁，啱煙韌控。

13.糯米釀雞翼、大腸包小腸

主打賣台灣小食，$40一個套餐有齊糯米釀雞翼和大腸包小腸。雞翼釀得飽滿脹卜卜，味道甜甜辣辣，內裡的糯米飯微微濕潤；大腸包小腸入面有青瓜、醃菜，烤香腸也很大條，不過就包得比較雜亂粗糙。

14.蚵仔煎

即叫即煎的台灣蚵仔煎，大份之餘夠晒熱辣辣，蚵仔份量落得算慷慨，每粒都很肥美。

15.小鮮肉奶茶

早前台灣大熱的小鮮肉奶茶，場內都有得飲，除了肌肉男的樽身，還有身材玲瓏浮凸的索女版，夠晒玩味。奶茶夠絲滑，茶味濃而不澀，甚有茶記Feel。

16.烤鴨髀＋雞翼

熟食區最大的攤檔，由點心、炒麵到串燒類都有供應，鴨髀大隻又厚肉，用光波爐及烤盤慢烤，食落香口不油膩。

17.會場限定！番茄味脆魚皮

食飽飽，發現場內還有「休閒食品區」，專賣零食和小量健康食品。最人氣就是這間港產的祖味脆魚皮，之前推出過蒜香鹹蛋脆魚皮而紅起，今次再帶來原味、紫菜、黑椒口味，以及最新兼會場限定的番茄味脆魚皮，咬落香口，伴帶酸甜番茄味，食到停唔到口。

第6屆香港食品嘉年華

地址：葵涌興盛路93號葵涌運動場（近硬地足球場）（顯示地圖）
展期：即日至11月5日
開放時間：11am-8:30pm
入場票價：$5（大小同價）；身高1米或以下小童、65歲或以上長者及殘疾人士免費進場
備註：每日展會結束前30分鐘及最後一日展會結束前1小時將停止售票及進場。

延伸閱讀：