【出街搵食】抹茶控出動！大阪150年茶室宇治園登港 15款必食甜品推介｜尖沙咀甜品｜

撰文：ning 攝影：Tony、網絡圖片

百年老字號 紅爆大阪心齋橋

講起日本抹茶店，你會想起中村藤吉、辻利，但原來這間宇治園同樣歷史悠久。1869年在京都山城町開業，二次大戰後始創人有感大阪商業將會紅起，決定搬至大阪心齋橋設立本店，至今已有近150年歷史。初時以煎茶及焙茶起家，而且以茶飲為主，直到80年代才開始用抹茶來做甜品，一直都是心齋橋必去的名店，在全國更有廿多間分店，遍佈日本多條知名商店街及百貨公司。

香港店茶室 坐低歎限定芭菲

今次登陸的香港店，是品牌繼上海店後第二家海外分店。店內分成喫茶店（茶室）、外賣店及禮品店，當中喫茶店有30多個座位，主力供應各款茶類甜品、飲品，以及小量生茶麵等鹹食，Menu跟足日本本店，超過25款甜品，絕對花多眼亂。唔想有選擇困難，可以即睇以下必食推介。

1.香港限定 抹茶、焙茶芭菲

抹茶軟雪糕用了石臼磨出來的碾茶，結合北海道牛乳製成，茶味香濃，食落有回甘；焙茶軟雪糕就是用店子招牌的「火男」淺火焙茶製成，帶點烘焙焦香。配料有齊抹茶或焙茶果凍、白玉丸子、大福卷、粟米片，以及宇治園獨有的樹葉形脆餅，很豐富。

2.抹茶、焙茶啫喱

同樣用招牌碾茶和焙茶做，口感滑嘟嘟，直接瀡入喉嚨，再配紅豆蓉及軟雪糕，典型和風口味。

3.抹茶Tiramisu

宇治抹茶結合軟芝士，質感柔滑軟熟；底層還有抹茶蛋糕，濕潤度剛好，配合軟芝士忌廉，層次豐富。另外也有焙茶口味可選，Tiramisu更設有套餐，可選配煎茶、抹茶、焙茶或咖啡，以茶配甜品，做下午茶一流。

4.抹茶大福卷、焙茶黑豆卷

唔食雪糕，這裡也有蛋糕類供應。大福卷外層是抹茶海棉蛋糕，內裡夾了忌廉及紅豆大福，軟熟中帶點煙韌口感；焙茶卷則是焙茶蛋糕配黑豆，質感粉糯，帶有甜香。

5.抹茶甜湯

口感柔順幼細，撲鼻傳來抹茶清香，入口甘苦香甜並重；紅豆的甜味正好中和茶的甘澀。

6.鮮打濃厚抹茶

作為老字號茶室，即場用茶筅打製的濃厚抹茶必不可少。這裡你可以選擇自己體驗，或者叫職員代勞。抹茶泡沫細密軟綿，口感豐滿，茶味特濃，適合重度抹茶控。

7.香港限定！天使之淚

另一款香港限定的堂食甜品，日本水菓子之一，但絕非水信玄餅，據稱以蒟蒻製成。晶瑩剔透，而且水漾清淡的口感，配黑糖及黃豆粉，甜度剛好。

8.腐皮、雞肉生茶麵食

除了甜品，店子也有生茶麵作為飽肚鹹食。麵條用京都產的抹茶製成，食落有輕淡的茶香；湯底則混合鰹魚及「火男」焙茶而成，配料分別可選腐皮、德島雞肉、鹿兒島黑豚肉或者和歌山南高梅配昆布。

睇埋外賣店有咩食

抹茶過江龍登港，少不免都要排隊。懶人一點，可以轉戰茶室旁邊的外賣店，主打軟雪糕、迷你芭菲、沙冰、抹茶牛乳等的外賣甜點飲品。

9.抹茶、焙茶軟雪糕筒

軟雪糕有抹茶、焙茶及北海道牛乳，單味甚至兩溝亦可。配料可選抹茶或焙茶繪卷，或是樹葉形脆餅。

10.抹茶飄浮、沙冰

飄浮即是抹茶配軟雪糕；而沙冰面層則是配自家打製的忌廉。

11.小佳女煎茶、火男焙茶

雖然抹茶控眼中只有抹茶甜品，但其實宇治園還有兩款招牌茶葉做的茶飲，分別是「小佳女」及「火男」，在外賣店這裡有樽裝茶可供外帶。前者是煎茶，茶味香醇；後者則是用文火長時間烘成的焙茶，茶色金黃，帶烘焙焦香。

禮品店終極一掃！抹茶生朱古力

食完甜品未夠喉？仲可以去禮品店買手信，一樣大把抹茶、焙茶糖果、茶點及小食，又食又買，滿足晒抹茶控的慾望！

12.抹茶、焙茶生朱古力

由日本空運直送，在當地年度銷量超過10萬盒。同樣以碾茶及「火男」焙茶製成，入口即溶，質感絲滑，茶味和朱古力的雙重甘甜，齒頰留香。

13.抹茶、焙茶繪卷

宇治園招牌的茶類夾心蛋卷，鬆脆的蛋卷分別填滿抹茶和焙茶忌廉，外脆內軟好好食。

14.極上酒樽玉露

禮品店內最矜貴的，要數這枝用酒瓶盛載的GOTAS 極上嚴選玉露。玉露是日本抹茶中最高級別的茶葉，這枝極上玉露的茶葉來自玉露產地最有名的京都宇治田原 ，以優雅的瓶身包裝，無需用茶壺沖泡，倒出來即可飲用，當地人會買來送禮或是婚宴用。除了建議用酒杯飲，更有兩種飲法，常溫飲可嘗到清雅香氣及茶葉原味；加冰飲則口感清爽俐落，帶點茶的甘澀。

15.七彩金平糖

充滿少女心的糖果盒，內裡盛著大大小小、色彩繽紛的金平糖，包括紅酒、海鹽、抹茶、焙茶等口味。

宇治園 Uji-en

地址：尖沙咀廣東道3-27號海港城港威商場4樓4201-4202K號舖（顯示地圖）
電話：2110 3052
營業時間：（喫茶店）11:30am – 10pm、（外賣店及禮品店）10am-10pm
備註：茶室堂食每位$10茶芥（6歲以下免茶），每位90分鐘用餐時間；每位最低消費一項食品及飲品。現為試業階段，價錢稍後或會有所調整

&feature=youtu.be

延伸閱讀：