抵食回本！ 九龍灣泰菜 火鍋放題 送咖喱龍蝦 ＠Dining娜
Photo：二彤
我Dining娜食過無數火鍋放題，放題花款確實愈玩愈多，但係將泰菜同火鍋合二為一嘅泰式火鍋放題坊間唔算多，滿足晒又鍾意打邊爐又鍾意食泰國嘢嘅朋友。 九龍灣泰菜 餐廳Siam Al Fresco Dining嘅半自助火鍋晚餐自從舊年推出之後，反應極好，今年再度登場，呢個半自助放題原來只限冬日限定㗎。
啱啱推出嘅龍蝦火鍋放題性價比極高，單係每位入座即送半隻泰式咖喱龍蝦（每隻$388），經已回本！由於有泰廚坐鎮，所以由火鍋湯底、前菜、甜品等，都好有地道風味。列入咗我嘅Foodie List嘅原因，仲有佢哋另設戶外露天座，坐喺開揚嘅環境下歎火鍋都幾有泰國度假feel！
師傅嚴選肉質厚實嘅龍蝦，以黃薑粉、黃咖喱、椰漿、蛋白等炒香，香料味道滲透蝦肉，惹味醒神。
九龍灣泰菜 歎正宗泰式湯底
嚟到Siam，大部分人都叫招牌冬蔭公湯底，鍾意食辣嘅我當然唔執輸啦。佢哋嘅冬蔭公湯依足傳統做法，用咗香茅、南薑、檸檬葉、辣椒膏等煮成，最後加入花奶即刻令湯底香滑好多，辛辣風味地道得嚟亦容易入口，總廚話可以先飲湯後打邊爐，一鍋兩食，我班鍾情於泰菜嘅姊妹都話正！
跟足傳統做法，湯底以香茅、南薑、檸檬葉、辣椒膏等煮成，最後放入花奶，辛辣與香滑俱備。
除咗冬蔭公湯底，自選湯底仲有椰汁雞湯、泰式清湯、紫菜豆腐湯選擇，總共4款，如果想雙拼，都只係加$28！
Siam嘅出品有水準得嚟，風味又正宗，原來因為有兩位泰國師傅坐鎮。泰菜主要走曼谷風格，口味地道而大眾化，好似冬蔭公湯、咖喱等辛辣菜式都唔會過辣，幾啱香港人口味。連食材都喺泰國食材店舖入貨，難怪食得出細緻有層次嘅泰式風味啦！
雞湯加入香茅、南薑、椰汁和青檸等炮製，椰香濃郁，湯底仲有草菇同車厘茄，口感豐富。
任食多款前菜小食甜品
再睇睇有咩食，先講火鍋配料，回本推介有海蝦、美國肥牛、日本豚肉片。再去自助泰式前菜、甜品Bar睇下，泰式前菜同甜品選擇都幾多，經典如燒豬頸肉沙律、醃酸辣鳳爪沙律、泰式青木瓜沙律等頭盤，仲有傳統泰式甜品：芒果糯米飯、泰式千層糕、椰汁糕、斑蘭千層糕、牛奶布甸等，全部都係任食！
另外，汽水、啤酒亦係任飲，天氣涼涼哋，我Dining娜有暖笠笠推介：Siam自創嘅香芒甜薑，將薑茶加入芒果汁，微辣暖胃，飲落好舒服！
火鍋放題配料選擇幾多，有海蝦、美國肥牛、日本豚肉片、紮肉、蝦丸、鯪魚滑等，非常新鮮。
地道泰式前菜、熟食
若嫌火鍋放題仲未滿足到食泰國嘢嘅慾望，可以另外柯打泰菜，例如生蝦刺身、粉絲蟹煲、明爐烏頭魚等。
選用海蝦，鮮甜味突出；亮點喺秘製生蝦汁，由青辣椒汁同蒜蓉等混成，微辛香口，為生蝦提鮮。
以薑、蒜、黑椒，仲有大廚自家調配嘅辣汁煮粉絲，各具層次嘅香料味道滲透其中，再放上肉蟹或膏蟹一齊焗，蟹肉鮮甜惹味。
將新鮮烏頭蒸煮後，放入香茅、南薑、檸檬葉等，再加入清湯、泰式鹹酸梅略煮，令魚肉提鮮，泰式風味出眾。
九龍灣泰菜 享受泰國度假Feel
除咗食物味道，Siam連環境都畀人泰國度假feel！佢哋室內環境唔算大，不過座位間隔舒服；而戶外就有露天座，坐喺外面吹住涼風打邊爐，感覺幾寫意！火鍋放題5:30pm就開始，早啲嚟食，仲可以感受下秋日陽光嘅尾巴！
烚時精選
‧ 送回本龍蝦：泰式咖喱龍蝦每隻$388，食火鍋放題入座即送半隻，已回本有突！
‧ 泰廚坐鎮：總廚係泰國師傅，有多年烹調泰菜經驗，供應嘅泰菜走曼谷風格。
‧ 開揚露天座：趁秋意濃有涼風，推介坐戶外歎火鍋，傾偈一流！
Siam Al Fresco Dining
地址：九龍灣宏照道33號國際交易中心2樓3號舖（顯示地圖）
電話：2790 3288
龍蝦火鍋放題：星期一至五5:30pm-7:30pm $168/位、7:45pm-9:45pm $178/位；星期六、日及公眾假期每位加$18（大小同價）
備註：設加一，收現金及信用卡。
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
