德田街市藍田小食街翻新重開！宵夜必備：石磨腸粉＋雞蛋仔＋串燒｜區區搵食
藍田德田街市近3萬呎重開！首增宵夜天堂小食街
九龍區又多一個掃街之地啦！位於藍田德田邨的德田街市，最近翻新工程終於完成，全場近3萬呎打造街市區域及全新小食街，分別有73間商戶，當中有13間熟食店。最重要的是小食街營業至晚上11點，宵夜友或OT的打工仔不用愁晚餐啦！今次記者挑選數間小食店率先睇，跟我一齊掃街啦。
德田街市美食1.拉布拉腸 石磨皺皮鮮蝦腸
店子主打台山石磨皺皮腸粉，每朝新鮮即磨後，收到客人柯打即叫即製，蒸出來晶瑩剔透！配料方面有11款選擇，例如港人最愛蜜汁叉燒腸、牛肉腸、鮮蝦腸等，也有罕見口味蟲草花、櫻花蝦、汕頭菜脯等。
皺皮腸粉晶透滑溜！（圖片來源：新假期編輯部）
德田街市美食2.紅辣椒 香辣串燒
紅辣椒如店名一樣，售賣各式香辣串燒及麻辣燙，以秘製香料加上自家製酸辣湯底，配上近30款配料選擇，大受愛辣人士歡迎！離遠都聞到香噴噴的串燒，可選麻辣或日式口味，即叫即燒，17款串燒都想試均一遍！
大大塊豬柳肉油香滿瀉！（圖片來源：新假期編輯部）
韭菜串是宵夜必食之選！（圖片來源：新假期編輯部）
德田街市美食3. 三多 生炸雞髀
大埔馳名的三多炸髀，勇闖全港九開分店，今次殺到去德田街市，藍田友有福了！必食生炸雞髀，沾上麵包糠後先炸1分鐘固定炸粉，再炸7分鐘，黃金炸髀皮脆肉嫩，每份大隻過手掌，推薦食肉獸去挑機！
雞髀大過手掌心，且咬落爆肉汁，好Juicy！（圖片來源：新假期編輯部）
德田街市美食4.腸粉王 鐵板小食
腸粉王除了即製蒸腸粉外，仲可以選擇以鐵板即炒小食，如XO醬炒蘿蔔糕、雞絲炒銀針粉、豉油皇炒麵等。此外也有港式小食及經典糖水，款式多元化！
蘿蔔糕配上xo醬香辣惹味（圖片來源：新假期編輯部）
德田街市美食5.新興車仔麵 韭菜豬紅
想食主食，推薦新興車仔麵，車仔麵餸款超過40款，例如豬大腸、漢堡扒、菜肉雲吞、滷水雞翼尖等，任君選擇，最平$30就食到兩餸麵。除了車仔麵外，更有港式小食，必食韭菜豬紅、生菜魚肉碗仔翅、咖喱三寶等。
德田街市美食6. 馬拉小廚 喇沙海鮮摻摻
除了港式美食外，馬拉小廚主打多款馬來西亞風味主食，湯底及多款醬汁都是自家製，必食推薦「辣死你媽豬扒飯」、胡椒豬肚雞米線、喇沙海鮮摻摻，所有湯底熬出啖啖精華，可以當湯飲！
湯底自家製，香辣得過癮！（圖片來源：新假期編輯部）
德田街市美食7.富國島 越南小食
位於小食街盡頭的富國島，是以餐廳形式經營，店內設有座位可以慢慢用饍。餐廳由正宗越南人主理，推出多款市面少見的傳統越式美食，例如越式瀨尿蝦春卷、羅望子焗明蝦、手切牛柳河、番茄蟹肉湯檬、扎肉三文治等，款款都好正宗！
（圖片來源：新假期編輯部）
德田街市美食8.糖芝豆 雞蛋仔＋中西式甜品
食盡所有鹹食，就到甜品了！糖芝豆中西式甜品有齊，芒果布甸、千層蛋糕、豆腐花、湯圓、桃膠雪耳、芝麻糊等。也有特色口味雞蛋仔，最特別的芥辣Wasabi雞蛋仔，製作雞蛋仔時於蛋漿加入Wasabi，甜甜的蛋香透出微辣感，好過癮！
味道衝擊，甜中帶點微辣感。（圖片來源：新假期編輯部）
豆花另可配芝麻糊、香芋西米、芒果西米、仙草阿華田等。（圖片來源：新假期編輯部）
德田街市美食9.手作功夫茶 人氣茶飲店
小食街內唯一一間茶飲店手作功夫茶，近年成為年輕人茶飲人氣之選，店主推介招牌38奶霸及輕飲水果茶王，前者一杯有齊仙草、蒟蒻及珍珠，口感豐富爆燈；後者用大量鮮果入饌，例如西柚、百香果、香橙等，酸甜開胃，夏日必飲！
德田街市美食10.囍點
除了小食街之外，街市外同樣有小店售賣零食、涼茶、小吃等。其中呢個囍點，供應懷舊糕點，坊間普遍的芝麻糕、白糖糕、砵仔糕等；甚至坊間罕見的雲片糕、鹹切糕、艾草、雞屎藤等。款式超過40樣，且每日新鮮製造，很有誠意！
- 店名：德田街市
- 地址：九龍藍田區碧雲道 223 號德田廣場地下
- 營業時間：星期一至日7am-7:30pm（街市）、星期一至日7am-11pm（小食街）
- Facebook專頁：TakTinMarket
德田街市翻新後有甚麼不同？
德田街市有翻新街市及小食街，詳情按此。
德田街市營業時間是？
德田街市的街市及小食街營業時間不同，詳情按此。
