巨型番茄肉醬多士! 元朗隱世小店 |元朗有咩好食|

多士賣相大份得嚟好邪惡，睇吓啲餡料！用大小番茄、香草、新鮮豬肉同蘑菇一齊炒，未食已經聞到香噴噴，肉醬流出嘅感覺實在太邪惡啦！

首先烘脆麵包，之後將餡料放喺每層中間夾住有車打，同白芝士生菜，夾埋再放入焗爐。新鮮出爐嘅多士熱辣辣，咬落啖啖豐富芝士同肉碎，趁熱食，超正！

多士全部即叫即整，不過小本經營，人手唔多，製作需時大概10-15分鐘～ 好多人都叫依個多士食，老闆話有時如果麵包用晒仲要即刻去對面超市買添！

店內裝潢好簡單，又不失整齊，環境唔嘈，好多街坊都鍾意係呢度撐枱腳。幾張枱，幾張櫈，好適合一家人齊齊整整係度食餐飯，好溫馨！

食好西時抬頭望吓會發現好得意嘅擺設。架上擺放著嘅模型，全部都係老闆嘅私人珍藏，有啲一盒盒咁疊係度，有啲砌好咗嘅係佢親手砌㗎，厲害！

唔講唔知原來老闆係搞藝術嘅，仲有facebook page 添，大家有興趣可以like吓。老闆話佢搞藝術，係大膽之人，經營食店都係希望大家有得食好西！

輝記美食

地址：元朗馬田路怡豐花園A座地舖（顯示地圖）
電話：2486 1098

延伸閱讀：
估你唔到fusion系列！鐵板 pancake 漢堡 & 西式肉醬兩面黃
|佐敦-掃食行動組|4間宵夜醫肚熱辣辣串燒店
太誇張啦～長洲特厚6味爆醬西多士盒【長洲食乜好】