尖沙咀食乜好 10餸大碗麵＋自選淨餸＋鮮油多檸樂

Jul 18 2019

（Presented by 永年士多）

車仔麵點解能夠成為其中一種最具代表性嘅香港街頭美食？大概九成人都會好直白咁答：「因為勝在由配料、麵底到醬汁都可以自己話事，加上選擇多元化，食物飽肚又好味，價錢更加係親民抵食。」事實係車仔麵易做，但好食嘅車仔麵難求，而以車仔麵煮出名堂，由元朗衝出尖沙咀同銅鑼灣嘅「永年士多」，就係其中一家Dining娜真心推介必食嘅港式車仔麵。

認真為每一款配料調味

雖然香港地車仔麵檔林立，不過好多檔主為咗節省成本同時間，都會用同一款醬汁為所有配料、粉麵同湯底調味，而元朗「永年」嘅車仔麵，就出咗名每款配料都會用唔同配方去調製，真正做到一餸一味，喺現今講求成本效益嘅社會，實在係車仔麵迷嘅搵食佳音，亦因為咁Dining娜分別幾次喺唔同時段經過都發現人龍，尤其係食晏同晚餐時段，長龍更加係排到出門口再打轉。

三代街坊與永年共成長

「永年」喺元朗無人不識，開業30幾年，好多街坊都由細食到大，食足兩、三代人。好多舊街坊長大後都會搬出元朗以外嘅地區居住，每次返入元朗都必定會嚟「永年」食返碗車仔麵醫肚，兼一解味覺情意結。不過由於大家唔係經常返嚟元朗，但又好掛住「永年」嘅車仔麵，所以每次見到負責人時都會追問佢哋幾時衝出元朗，喺九龍開設分店，所以「永年」舊年就揀咗喺人流暢旺、四通八達嘅尖沙咀開設第一家分店。滿足舊客要求同時，亦希望藉此吸引元朗區以外新客注意。

改變經營模式與時代接軌

為確保分店能夠保持「永年」三代傳承嘅招牌味道，同時要令嗱喳麵不再「嗱喳」！品牌早年已喺屯門自設2,000幾呎中央工場，每日預先處理好所有食物上游製作程序，好似清理、醃製同烹調等，既方便量產又確保食安；同時又可以控制成本。加上每日新鮮製作，絕無防腐劑。同時將廚房轉成電氣化，不再使用煤氣。所有食物飲料都會預早一日喺工場製作好，再喺翌日朝早送抵分店，師傅們更會提早喺開舖3個鐘前，返到舖頭準備後期處理工作。

坊間少見一餸一味

負責人強調「永年」出品以大眾化口味為主，並且堅持所有產品盡量自家製作，同時不忘支持本地食材及食品供應商，例如選用元朗麵廠生產嘅手工麵（真材實料）、大埔振興嘅貢丸（肉香四溢）、同德興嘅腐乳（豆香豐盈）、本地蠔油品牌，以及本地新鮮豬腸同豬手等。此外，必食秘製辣汁分成5種辛辣度，辣中帶甜，同偏咸嘅招牌藥材清湯，喺味覺上產生平衡互補效果，兩者混合嚟食味道啱啱好。