尖沙咀食乜好 港式懷舊排檔風味 自家甜醬油養生雞煲＋真材實料鴛鴦湯底火鍋

一講到食大家總係心多多，想同一時間可以食多啲唔同口味嘅菜式，因此主打港式懷舊排檔風味嘅「尚上下夏」，除咗提供人氣度爆燈嘅養生雞煲之外，仲有多款足料養生湯底火鍋，同埋創意手工食材，畀大家邊嘆靚湯美食邊調理身體。

香港大排檔獨有窩心人情味

「尚上下夏」只要大家一朗讀其名字時，自然會產生一種細細個玩唱遊碎碎唸時嘅親切感，滿載童年回憶。事實上整間舖面嘅設計裝潢，都採用咗大量八、九十年代嘅香港畫報印象元素去貫穿，好似手寫書法招牌、幾何圖案地磚、摺櫈同木枱。

店舖布局全以港式排檔作為設計元素，令人倍添親切感。

養生雞煲最講究用料及火喉

雖然口味呢樣嘢每個人都各有喜好，但要數大部分香港人都竪指稱讚，而且食得開心過癮又舒服貼地嘅選擇，榜首一定非選擇多元化兼夠晒火喉嘅港式大排檔莫屬！養生雞煲係呢度嘅主打必食皇牌！客人可以選擇雞胸、雞髀、全隻同半隻等部位同份量；加上經驗豐富嘅大廚掌控火喉得宜，令到雞肉無論係啱啱炒熟送上，定係已經食到中段都依然咁嫩滑入味！加上混合咗老闆獨家研發嘅秘製醬料，令雞煲同時瀰漫住層次豐沛嘅四川麻辣香，以及偏甜惹味嘅廣東醬油香！另外仲特別加入爽腍、吸汁力佳嘅豬皮，同鮮爽清脆嘅洋葱嚟豐富口感，簡直好味到令人停唔到口呀！雞煲可同時揀選辣同唔辣嘅單鍋，方便照顧各人味蕾需要。食完雞煲後可加入自選湯底變身火鍋，繼續烚烚烚。

「雞煲鴛鴦鍋」雞肉嫩滑惹味！「美顏豆腐牛奶湯」加入多種牛奶同滑豆腐，奶味、荳味同樣香濃，而且滑不溜口！「惹味番茄湯」採用大量新鮮番茄煮成鮮茄膏，再加上湯烹調。當加入海鮮燙煮後，更變得猶如龍蝦湯般異常鮮甜味美！「自家製即炸響鈴」更係鬆脆香口到頂點！

美味足料有益養生老火鍋湯

「寧可食無菜，不可食無湯」，湯水對廣東人嚟講早已成為一種獨有嘅飲食文化！由於廣東地區屬沿海亞熱帶氣候，所以大家特別容易因燥熱上火，同時又會因為濕氣重而令身體唔舒服，呢個時候除咗飲涼茶之外，仲可以適當地以食療進補同祛濕！而一鍋薈萃所有新鮮優質食材營養風味嘅老火養生湯，就啱晒所有人飲用啦！呢度分別提供矜貴嘅瑤柱群翅雞湯、足料龍蝦湯、養生藥膳湯、美顏豆腐牛奶湯、惹味番茄湯、清香皮蛋莞茜湯、四川麻辣湯同香濃沙嗲湯，共8款口味湯底畀大家，全部天然無添加！負責人建議大家可先飲一、兩碗原汁足料無味精靚湯，潤喉暖身先。然後再加入其他食材灼食，到最後等湯底吸盡所有食材精華後再飲用，又係另一番難以形容嘅美味！

「海龍王拼盤」每日精選8款時令海鮮，好似採訪當日就有珊瑚蚌、蟶子皇、新鮮鮑魚、花膠桶、8吋虎蝦、帶子皇、桂花蚌同花甲皇，全部鮮味無窮兼啖啖肉。

「牛魔王拼盤」精選6大靚牛部位，包括：靚牛皇、安格斯、牛柳粒、黑牛柏葉、牛白肉（牛胸）及牛脷托，一次過滿足晒牛迷嘅口腹之慾。

「鬼馬墨魚」屬老闆又一得意創作！廣式油炸鬼上面鋪有手打墨魚滑同蟹籽，等你可以一次過試勻三種不同味道和口感。海鮮加油炸鬼吸收湯汁後，口感更加別樹一格。

「手打香蕉墨魚丸」有齊墨魚丸嘅爽滑彈牙同埋香蕉嘅綿糯清甜，兩種看似完全唔相關嘅海鮮同水果，當放埋一齊時味道竟然係如此合拍，而且仲好受女生同一家大細歡迎㖭，係必食誠意推介！

店內設計簡潔隨意，令人坐得非常舒服自在。

店舖雖然位於食肆林立嘅山林道，但因食物口味有主題特色，所以每晚唔同時段都各有捧場客。

尚上下夏 養生雞煲火鍋

地址：尖沙咀山林道23號地下（佐敦港鐵站D出口）

電話：2470 2668

營業時間：星期二至四 6pm-2am

星期五至六 5:30pm-2am

星期日 5:30pm-1am

星期一 6pm-1am