國產!! 小米電飯煲 －購買、開箱試玩全直擊！

蘋果式的發布會風格，不過將小米飯煲稱為「新國貨」，即刻強國味濃囉！

•官方原價/淘寶預售價：¥999（約港幣$1,193，未包括運費）
•淘寶現貨價：¥1,318（約港幣$1,574，未包括運費）
•售銷點：小米內地官網、淘寶

開箱

買煲篇－香港不發貨硬食淘寶炒價

發布會宣布電飯煲於4月6日早上在小米內地官網開賣，筆者已經準備搶煲。但對唔住，官方首輪發售的配送地區，香港係無。份。嘅！乜唔係話大家都是中國人，不用分那麼細的嗎？惟有轉移陣地，投靠馬雲，去淘寶網尋煲，果然發現大量賣家及淘寶商店有售這款飯煲，不少聲稱是官方正貨，大部分標價都是維持原價¥999，更重要的是，可以發貨至香港。
正想入手之際，卻發現，真正售價是¥1318而不是¥999喔親，即係點？一個字：炒價。由於現時供貨量較少，於官網發現，經常顯示出售罄字眼。相信一眾淘寶賣家是先購入一批現貨，以炒價發售。再溫馨提示買家，嫌現在的價錢貴可以選擇＄999的預購價，等遲啲價格回落（賣家亦回答唔知幾時），才發貨完成交易。另外留意返，淘寶網購並不設保養，小米香港亦無相關保養提供，各位買之前，記得考慮清楚。雖然香港有網店代購發售，但價錢卻接近＄2,000，而且無法確認是否官網正貨，假如你唔想買水貨， 就睇下內地有無親戚朋友幫你「特事特辦」，否則只好像我們一樣，忍痛付上炒價了。

淘寶網搜尋出大量小米飯煲，炒價各異，更聲稱可以即日發貨。

到貨喇－開箱驗貨 即試Wifi手機app

於淘寶埋單找數後，話咁快就收到貨，前後只是大約兩日時間，效率都算高。一於即刻開箱！設計風格非常蘋果，飯煲內膽並非傳統合金材質，而是選用導熱、儲熱性高的灰鑄鐵製成，遠比一般飯煲內膽重手。機身只有三個按鍵，保留了最基本的煮飯功能，至於其他功能，就必須依靠小米「MiHome 智能家庭」的手機app 進行操作。

發現飯煲食譜

可以做蛋糕、乳酪、養生粥等，有齊材料份量和步驟， 手機一按即煮，夠方便。

最令人費解功能！

可以逐個％調校飯的軟硬度，但邊個會逐個％試呢？真係𢱑晒頭。

連接Wifi五部曲！

確保訊號燈為黃色。

選取自己家用的網絡。

再連接飯煲Wifi帳戶。

等待接駁完成，Wifi燈變成藍色。

連接完成後開啟程式，有齊精煮、快煮、煮粥、保溫等功能。

實戰應用篇－Scan米功能半桶水 認唔出內地

近年出產的智能飯煲，普遍都有選擇米種功能，按米種專用的時間來煮飯，多數包括泰國米、東北米、絲苗米等，而這個飯煲除了這些米種，還有內地米種如湖南米、江浙米，亦有日本秋田小町米可供選擇。而最特別之處，就是可以透過手機app，掃描白米包裝袋上的Barcode，識別及確認米種。據小米官方介紹，手機程式內預設了2,000種米，一於買幾包米測試下！
為了符合國情，記者特意找來中國出產的絲苗米及珍珠米，以及一款港人常吃的茉莉香米來做測試。結果發現， 只有茉莉香米成功通過掃描， 新增至米種清單， 有屬於自己的烹調時間； 其餘兩款內地產的米種，則顯示為無法識別、甚至無反應，證明資料庫以及手機程式未夠完善，若果想知邊啲米種可以成功掃描，睇怕都要去超市逐款試。不過就算scan 唔到，都可以於app 內揀返相應的米種煮飯。

選擇煮米模式後，會見到一系列的米種，按下scan鍵就可以進行掃描。

將鏡頭對準米袋上的barcode，就會自動掃描。

Test 1

成功識別！

Test 2

無法識別！

Test 3

Scan極都無反應

煮飯篇－編輯部盲試中、韓飯煲對決

講到底，這個小米飯煲玩到咁多功能，價錢又比對手平一大截，大家最關注的煮飯效果如何呢？它和日韓產的飯煲，有無分別？唔好心急，即刻洗米煮飯。我們就以成功掃描新增的茉莉香米，用相同份量、水量、時間，分別以小米和韓國牌子的IH 飯煲煮飯作比拼，再請同事試食，睇下佢哋試唔試得出，鍾意邊款多啲。開煲蓋開飯一刻，小米飯煲煮出來的米飯明顯比韓牌帶濃郁香甜的米香；賣相亦更加晶瑩剔透和飽滿，充分睇到粒粒米飯爆開。口感綿密、軟糯，咬落煙韌彈牙，都頗為令人滿意。韓牌飯煲的米飯都算煙韌，但色澤卻較為暗啞，絕是僅僅輸個馬鼻。同事知道是小米飯煲及其價錢之後，都覺得可以買來一試，不過聽到用app 操控飯煲，就話有點多此一舉、未必啱阿媽用喎。

選用快煮功能及已掃描的茉莉香米，開始煮飯，app內更會顯示火力圖表。

夠鐘有提示，開飯喇！

手機app 食譜篇－蛋糕鬆香軟 豆渣乳酪大 fail

成功用app 煮飯，當然要試埋只可靠app 操作的食譜功能，今次我們就試做蛋糕和乳酪，兩者難度懸殊，即管看看小米能否駕馭。

一按即焗　零失敗海綿蛋

手機app 內的第一個食譜就是蛋糕，內裡所指導的是需要自行混合雞蛋、麵粉、牛奶、砂糖，由零開始的製作方法。若然想方便一點，可以去烘焙店買預拌蛋糕粉來做。

試玩後感
蛋糕膨脹得夠大，清楚見到氣泡孔，食落鬆軟不厚實，有濃濃的蛋香，飯煲亦無倒汗水滴在蛋糕上，口感無被影響。弧形的內膽令蛋糕變成半球體狀，kawaii呢！
防黏底功能一般，蛋糕脫模時略有困難，影響了邊位的賣相，建議焗蛋糕前在煲內輕輕塗上油份，避免黏底。

較難掌握　乳酪凝固失敗

另一食譜是製作酸奶，即是乳酪，材料簡單，卻易學難精，而且烹調時間接近12小時。心驚膽顫等足一晚，開蓋聞到乳酪酸香，不過卻未凝成固體軟膏狀，有如豆腐渣，更和乳清分離！

試玩後感
蒸煮模式雖可自行設定時間，但最少只可選擇10分鐘，換言之即是要自己睇時間，夠三分鐘就停火，否則牛奶過熱，加入乳酪時就會把裡面的酵母菌殺死，影響凝固效果。