【出街搵食】小店香濃娘惹螄蚶蝦湯喇沙！名廚Harlan愛徒監製｜鰂魚涌星馬菜｜
撰文：ning 攝影：Day
名廚Harlan徒弟主理！鰂魚涌巷弄娘惹小店
這間位於鰂魚涌一條小巷的娘惹菜小店，開業只有幾個月，由老闆兼大廚Kelvin和太太兩夫妻經營。不過，旁邊是賣肉骨茶紅遍全港的「迷湯」，不遠處英皇道又有月前冒起的「馬來亞春色綠野景致艷雅」，在此處開舖，唔怕輸蝕？
皆因Kelvin師傅根底深厚，入行30年，紅褲仔出身，做過多間酒店及私人會所，更有7年時間在深灣遊艇會擔任當時行政總廚Harlan Goldstein的助手。在名廚師傅訓練下，他除了擁有西餐的本領，店子所賣的娘惹菜，有不少就是當年遊艇會招呼星馬富豪的 Secret Menu。
足料香濃螄蚶蝦湯喇沙
店子最招牌的，有眼前這碗娘惹海蝦喇沙，用南薑、喇沙葉、大紅椒、椰糖、咖喱膏、黃薑粉、石栗等十多款香料，打碎混合之後，人手炒成喇沙膽；又用大量虎蝦頭和殼，連同白胡椒粒熬3小時做蝦湯，當中有1/3是新鮮蝦肉，蝦鮮份外濃。
將喇沙膽、蝦湯及椰奶結合，煉出鮮黃色喇沙湯，面層泛起一抹紅油。呷一口湯，柔滑濃稠，卻不覺漿口黏膩。第一下衝擊味蕾的，是椰奶甜香，然後就是蝦湯膏香，再慢慢感到舌尖微刺微癢的咖喱香辣。
麵底用油麵米粉摻摻做法，有齊雙重口感。
配料更是慷慨，手指般粗的海蝦3隻、魚片、豆卜，連螄蚶都有！坊間都因為螄蚶處理工序繁複而省略，這裡卻是從街市買來泰國螄蚶，逐粒刷走泥濘，灼熟後人手搣走半邊殼，方便客人進食，相當貼心。
烏卒卒！新加坡老牌黑醬油豬手撈麵
喇沙以外，黑醬油豬手乾撈麵也是人氣。新鮮豬手用新加坡老牌廣祥泰黑醬油，連同滷水膽來燜，軟綿鬆化，有滿滿骨膠原；油麵麵條纏上黑醬油，吃到嘴唇烏卒卒，但鹹甜有致！可惜只有星期日才有供應，想吃也要講緣份呀。
椰奶飄香！檳城白咖喱湯米粉
也有檳城風味的白咖喱湯米粉，香茅、南薑、白胡椒，鮮椰汁和椰奶各半，食落奶滑香甜，辣度溫和；新加坡深海魚蛋尤其爽彈，帶濃郁魚香。
限量30碗！古法肉骨茶
星馬菜必備的肉骨茶，這裡都有得飲。每日限量30碗，用新鮮豬腩排來做，揉合新加坡及馬來西亞兩派，既有藥材，又有白胡椒，兩者平衡剛好；湯頭醇香十足，飲落暖身，更有羅漢果和甘草的清甜餘韻。
刁鑽！牛面頰肉做巴東牛肉
唔食粉麵類，這裡也有巴東牛肉配白飯，更刁鑽地用牛面頰肉來做，油花勻稱，有肉有筋，腍得一咬即開；面層還沾上香茅碎、斑蘭葉碎、新鮮椰絲，食落甜中帶辣，拌飯一流。
西式 x 星馬甜品！椰皇奶凍、斑蘭焦糖燉蛋
食完粉麵主菜，連女生最關注的甜品都有，更大玩西式混星馬風味。新鮮椰皇奶凍用椰皇水和法國忌廉做成 Panna Cotta，啖啖清甜椰香，軟滑得像慕絲。
斑蘭脆焦糖燉蛋則於燉蛋漿內榨入新鮮斑蘭汁，奉客前才用火槍燒焦糖，外層脆卜 卜，富焦糖甘香；燉蛋滑溜，帶斑蘭葉獨有草香。
最重要的是，店子的菜式價錢相宜，如此足料，每碗都只是$70有找，性價比超高！難怪深得附近太古坊一眾上班族的歡迎。不過提提你，小店只開星期一至五，以及星期日的午市時段，下午2、3點賣晒就關門，想食要早點來，別撲空！
小娘惹 Little Nyonya
地址：鰂魚涌海堤街18號地下D9號舖（顯示地圖）
電話：3428 2250
營業時間：星期一至五 11:45am-2:45pm、星期日 12nn-3:30pm（星期六休息）
平均消費：$70/位
備註：不設加一，只收現金；公眾假期將不定休，建議先致電查詢。
延伸閱讀：
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
