【香港美食】秋生哥息怒！ 食雞唔一定貴！ 全港6大高質 好食海南雞飯

撰文：ning 攝影：Tommy、《新假期》資料室

1. 新樂園 杜汶澤都讚 濃郁雞味（荃灣）

藏身於荃灣海旁工廈區的柴灣角熟食市場，由泰國人主理，兼賣泰國菜及港式早餐、碟頭飯。招牌海南雞飯聲稱以新鮮雞來做，以雞湯浸熟，上桌時已去骨。

雞皮油潤肥美，一咬已食到雞油香，雞肉亦有濃郁雞味，口感嫩滑不韌，油飯色澤微黃，質感偏向黏糯，但不油膩。午市1碟海南雞飯連飲品都只是$42，算抵食。難怪杜汶澤前日去幫襯，都大讚叫到好雞，更食晒原隻海南雞！

新樂園

地址：荃灣柴灣角街4號柴灣角熟食市場（顯示地圖）
電話：2490 8483
營業時間：5:30am – 4:00pm (星期日及公眾假期休息)
備註：海南雞飯每日11:00am後供應

2. 海南雞專門店 太安樓$28排長龍雞飯 （西灣河）

掃街勝地太安樓的名物，無論午市或晚市都排長龍，碗碗$28蚊，更可加$5要雞腎、雞肝，極有可能是全港最平海南雞。

海南雞飯即切即賣，去骨雞件鋪於飯面，可任添薑蓉、黑醬油和辣椒醬，又可選白飯或雞油飯，夠自由。雞肉雖然不算滑，但肉味夠香，油飯香口，而且粒粒分明；附送的冬瓜湯也不太油膩，飲完不口渴。

海南雞專門店

地址：西灣河筲箕灣道57-87號太安樓地下A32B舖（顯示地圖）
電話：6539 9312
營業時間：11:00am- 9:00pm（售完即止）

3. 拿督星馬大飯店 新鮮雞＋香茅蔥油炒飯（觀塘）

數度復出的星馬菜小店，老闆娘陳太十多年前先後在尖沙咀、北角、小西灣開店，後來因租金、健康問題結業。2、3年前於觀塘碼頭熟食中心重出江湖，憑着自家製的海南雞飯、肉骨茶、喇沙、黑豉油撈麵，吸引觀塘寫字樓客，生意越做越旺。

海南雞堅持用新鮮雞，由老闆娘親自主理，採購、浸雞、熬湯統統包辦。雞件厚肉，質感彈牙有微微嚼勁，雞皮富油脂甘香，唯一美中不足是冇去骨。油飯以香茅及蔥油炒過，夠乾身，而且粒粒分明，口感煙韌；黑醬油、辣醬、薑蓉齊備，更送蘿蔔雞湯，地道得來很豐富。難怪每日午市1:30就賣光，想食就要早到。

拿督星馬大飯店

地址：觀塘海濱道190號觀塘碼頭熟食市場1樓20號舖（顯示地圖）
電話：2344 2347
營業時間：7:00am-4:00pm（星期六、日及公眾假期休息）
備註：海南雞飯每日11:30am後供應

4. 好時沙嗲 重出江湖三黃海南雞 (尖沙咀)

屹立尖沙咀40多年的星馬業老字號，紅館演唱會觀眾的飯堂，蔡瀾都是座上客。去年因租約問題宣佈結業，引起fans排長龍來懷緬，結業2個月後在原址捲土重來，老闆及班底依舊不變，繼續供應海南雞飯和沙爹串燒等新加坡大牌檔菜式。

店子招牌的海南雞飯以三黃雞做，更有日本雜誌介紹過。雞用雞骨熬成的上湯浸熟，客人落單後才起骨，肉質腍而滑溜，件數亦多；油飯夠香，油潤度剛好，飯粒軟硬度適中；附送的清雞湯是每日熬製，飲落順喉舒服；醬汁也是自家調配。

好時沙嗲

地址：尖沙咀麼地道63號好時中心144-148號舖（顯示地圖）
電話：2739 9808
營業時間：12:00nn – 10:00pm

5. PappaRich 馬來西亞過江名店（銅鑼灣）

來自馬來西亞的連鎖店，在當地擁有超過80家店，分店遍佈澳洲、台灣、新加坡、韓國等等。去年首次進軍香港，主打馬來西亞傳統庶民食物，香港少見的海南烤麵包、美碌恐龍都可以吃到。店中用的醬料都是從馬拉直接進口，堅持正宗。

海南雞已起骨，肉質嫩得來，又保持咬口，吃出雞油香；油飯非常好食，飯粒分明，未入口已經聞到斑蘭香，油而不膩；湯用蝦殼、蝦油熬足12小時，充滿蝦香，濃得似雲吞麵湯底。辣醬尤其出色，微酸有辣勁，連附送的芽菜都爽脆好吃。

PappaRich Malaysian Delights

地址：銅鑼灣駱克道459-461號L Square 4樓（顯示地圖）
電話：2414 7188
營業時間：11:30am-10:30pm
備註：設加一，收信用卡

6. 老巴剎廚房 名人海南雞+砂鍋煲仔飯 (灣仔)

由設計師出身，20年前轉戰廚師的鍾樹棠（Billy）開設，憑一手東南亞菜打響名堂，海南雞飯fans眾多，包括唐英年、林建岳、林青霞等等。去年因租約問題告別食友，後得林建岳力撐，東山再起，依舊以雞飯做頭牌。

海南雞以新鮮、出名肥美肉厚的龍崗雞做。廿多隻雞煉成1大煲雞湯，味道濃郁。雞販更為Billy留起最肥美的雞隻，浸於雞湯內，不加鹽糖調味，就全靠那雞湯提鮮。雞件啖啖肉，皮下脂變成啫喱狀，是時間、火候準繩的證明。

砂鍋雞油飯更是點睛位！兩大匙雞油全取自雞湯面頭，煮飯水也是那鍋濃雞湯加上香茅香料煮成。慢火煲40分鐘，雞的精華滲進米心，而雞油則流到鍋底，水乾便烤出薄薄1層香脆飯焦，飯面再放炸香的香茅、南薑、老薑、生薑、炸蒜焗，香料味道一次過迫落飯心，一打開香噴噴。

1隻雞連砂鍋飯索價$588，但足夠6-8人食，除開每人都是百多元，依然抵過天價海南雞。不過，這道矜貴海南雞只於晚市供應，想食就必須提早預訂了。

老巴剎廚房

地址：灣仔交加里32-38號（顯示地圖）
營業時間： 星期一至六 12:00nn-2:30pm，6:00pm-10:00pm （星期日休息）
電話：2871 1993
備註：設加一，收信用卡

延伸閱讀：