【大角咀掃區】 5間CP值高餐廳
1.Panda Burger 挑戰免費漢堡
Burger店開到一街都係，這間Panda Burger口碑一向好，而且價錢比不少新式漢堡店都要平，平均$50便可飽到捧住個肚走！最近聽聞店內逢星期六有個「The Hungry Panda Challenge」*，只要在12min內完成個價值$100的「The Hungry Panda Burger Meal」就免收你錢！小記Jamie一場嚟到，就等我挑一挑機！雖然個Burger望落無想像中咁高大，但都唔好睇小佢！連埋個包一共十三層材料，再加埋薯條、汽水，真係齋睇都已經飽！第一名只是用了4分21秒，我希望（妄想）能夠用9分鐘完成！
我的策略係一次食兩層，先食肉和菇，之後先食包同蔬菜。雖然係限時，但我都要享受下個Burger，第一part的蛋同安格斯牛肉，蛋黃只是半熟，一咬流汁，再配埋厚厚的牛肉，非常Juicy！然後是菇和澳洲羊肉，菇非常厚身，而且好多汁，好清甜，也中和了羊肉的羶味。牛肉和羊肉都是半熟，充滿肉汁！其他材料有煙肉、菠蘿、焦糖洋蔥、酸瓜和生菜。包有芝麻香，而且烘得剛好，表層少脆，內裡鬆軟！
十二分鐘原來好快過，但小記仍未食晒個包、薯條和飲汽水。基於體育精神，小記決定完成整個Challenge！最終用了大約十五分鐘完成！如果你好肚餓，要喺十二分鐘內完成係絕對唔難（特別是男生），而且食完飽足全日，有興趣就星期六4-7pm來挑機！
The Hungry Panda Burger $85 (變餐+$15)
除咗Challenge之外，小店都有很多特色Burger！
「脆皮燒腩漢堡」($45) 選用荷蘭五花腩，肥瘦適中，不太油膩，肉非常嫩而且皮脆，配上蘋果蓉和青瓜，味道清新。五花腩需每天焗三小時，由於製作繁複，所以日限十個，想食就要早啲去喇！（小記當天下午三點去到已經賣晒）
想輕食的話可選「燒野菌雜菜漢堡」($40)，野菌選用Portobello，較厚身而且多汁，通常都賣過百，但小店只賣$40！其他材料有燈籠椒和焦糖洋蔥，自製的黑醋汁代替了肉汁，更加健康！麵包都係特別訂製，非常鬆軟。
*如欲參加「The Hungry Panda Challenge」敬請預約，每次只限五位參賽者。
Panda Burger
地址：九龍大角咀博文街22號地下前座B舖（東邊舖）（顯示地圖）
電話：2392 0499
營業時間：星期二至日12nn-8:30pm
平均消費：$60
2. 玥屋 $8.6一件手握壽司
行過對面，不要錯過這壽司小店，店內所有壽司即叫即握，用料很新鮮，全日散叫壽司，三文魚$5、原隻有頭甘蝦$8、帶子$12、滿滿的海膽軍艦也賣$20！
想平上加平，可選擇午市幫襯，有六款定食可選，價錢由$40-$95。小記今日食咗全店最貴的特上壽司定食，配埋蔥油甘魚手卷，都係$95!!!!!壽司共11件但先上8件，起初以為整漏，但原來是師傅想我先食部份再上其他，怕不夠新鮮，非常細心！帶子好厚身肥美，赤貝鮮甜，吞拿魚同樣新鮮無筋，甘蝦連頭上枱，海膽來自加拿大，食落無咩海水味，甜味較重且黏，份量多，一口吃下口感一流！壽司飯的大小適中，味道調較得剛好，讚！
午市另有自選魚生飯，配料每款$4-$10，可選魚生超過20款，如醋鯖魚、玻璃蝦、象拔蚌、油甘魚、白肉豚等。自選魚生飯最低消費$30，加$25有加拿大海膽一格。
特上壽司定食 $95（有吞拿魚、白玉豚、三文魚腩、劍魚腩、油甘魚、帶子、赤貝、甘蝦、鰻魚、海膽和玉子）
師傅見我哋有兩個人食就將蔥油甘魚手卷變成小卷，等我哋容易Share，細心度爆分！
小店供應坊間少見的紅衫魚刺身，一客約11片，只售$80。紅衫魚來自日本，味道和質感也較清爽。由於不是每天有貨，想吃的話最好預訂！
玥屋
地址： 大角咀 海景街44號地舖（顯示地圖）
電話：3488 6693
營業時間：11pm-11pm；星期日休息
平均收費：$70
3.冬暖夏涼 刁鑽配料車仔麵
車仔麵聽落無咩特別，但呢間大角咀 小店自創不少配菜，絕對是啖啖心機！配菜分熱食和凍食兩種。熱食如去油豬大腸，師傅將大腸開邊再刮走油分，食落唔肥膩。剁椒翼尖取材自B仔的翼尖，剁椒是醃製過的辣椒，可帶出鹹鮮味，不太辣，值得一試！凍食如酒糟雞翼，用酒糟、八角和香葉等材料浸過12小時；自家製的沙茶蜂巢豆腐，要先將豆腐雪藏約24小時，沙茶被豆腐吸收，令整體味道提升；蒜香黑豚腩片取材自蒜泥白肉，用老抽和鎮江醋來醃製，較為濃味。麵底分湯麵和冷麵兩種，都是$20，湯麵可選紅薯粉、幼麵等，冷麵可選綠茶麵、蕎麥麵等。湯底有雞、豬骨、糊椒等，每天煲4小時，飲落鮮甜。冷麵用的自家製醬汁合共四款，如較淡味的日式照燒汁和較濃稠的泰式咖喱汁。
湯麵底 $20，去油豬大腸 $10、剁椒翼尖 $6
冷麵底 $20，蒜香黑豚腩片 $10、沙茶蜂巢豆腐 $6
冬暖夏涼 濃雞湯車仔麵館
地址：大角咀 杉樹街2-16號金基大廈4號地舖（顯示地圖）
電話：2576 3533
營業時間：星期一至六 11am-11pm，星期日 6pm-11pm
平均消費 $50
4.文華雞飯（新加坡）
想食正宗新加坡海南雞飯，不用去新加坡，去 大角咀 就得！老闆兼大廚早年在新加坡開海南雞飯店，他的海南雞好吃很多人也知，但燒雞有否試過？這個全日供應的燒雞飯套餐，有雞有飯、油菜、細肉骨茶和飲品，改雞脾加$5。燒雞皮脆肉嫩，不用蘸任何醬也很美味。雞油飯淡黃色，用香茅、雞湯等材料焗過，粒粒分明不糊口，值得一讚。肉骨茶的胡椒味很重，蓋過了藥材味，豆卜很入味，排骨肉和軟骨位很腍身。
燒雞飯套餐 $70 (改雞脾加$5)
雞雜 ($18)，雞腎和雞膶以上葱油調味，爽彈香口。
牛油果汁 ($28)，飲落不是太重牛油果味，反而有焦糖味，味道幾特別，質感似奶昔。
文華雞飯（新加坡）
地址：大角嘴 中匯街17號地下（顯示地圖）
電話：2301 4266
營業時間：11:30am-10pm，星期三休息
平均消費：$70
5.老掌櫃 幾十蚊高質東北菜
此東北菜小館，大廚李師傅曾於北京酒樓、松竹樓等著名京菜館工作，全店菜式有過百款選擇，以山東和北京菜為主，同時亦有小量川菜。牛犇麵、大拉皮和酸菜餃必吃，另外招牌醉雞、拔絲蘋果亦要試，而且每款都只不過是六、七十蚊，好食又抵食！
招牌醉雞 $68 上海走地雞，只用髀位，以最高等級花雕浸兩天，雞肉嫰滑，酒味清香。
秘製牛犇麵 $46
用上牛肋骨近腩位，燜得鬆軟入味，幾乎入口即溶。湯底以牛肉、牛骨、花椒、八角等熬製，非常鮮甜，好味！
脆椒香雞 $78
自家研發的東北菜，雞先炸過，再將其放進秘製醃料三至五天以吸收當中的精華，食落香脆，帶點麻，雖然有很多辣椒，但不太辣。
地三鮮 $64
傳統東北菜，蒜蓉和葱爆炒薯仔、茄子和青椒，食材新鮮，粗獷惹味。
老掌櫃東北菜館
地址： 大角咀 大角咀道55-65號牡丹大廈北座地下9-12號舖（福澤街交界）（顯示地圖）
電話：2572 8366
營業時間：11:30am-3pm、6pm-10:30pm
平均消費：午市$45/位、晚市$80/位
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
