鬼馬港式西餐~紅棗雪耳糖水變雪糕！炸芝士午餐肉＋海膽葱油麵｜大坑食乜好｜

Q: 香港18區美食有甚麼推介？

新假期編輯已經為你整合了香港18區美食指，其中包括尖沙咀、旺角、銅鑼灣等 ......即睇更多詳情。

飲食

CentralEditor_WW

Nov 11 2016

大坑最近多了間外牆五顏六色的餐廳，入到去開放式廚房扮成搶眼貨櫃，成間餐廳好鬼潮！望埋餐牌，更加鬼馬，主打西餐，但加入了不少港式原素，有腐乳撈埋carbonara、午餐肉夾埋芝士一齊炸同紅棗雪耳糖水變雪糕！

撰文：Joan｜攝影：Woody

&feature=youtu.be

大坑：鬼馬港式西餐~午餐肉、腐乳大變身！

最邪惡的一定是炸芝士午餐肉，用大家由細食到大的梅林牌，夾着車打芝士炸，鹹香味勁出，邪惡到爆！就連日式冷麵都搞搞新意思，海膽冷麵加了港式葱油汁，食落洋葱味重，配埋甘香的加拿大海膽，新食法又幾得意。其他流心蛋卷和椒絲腐乳卡邦尼意粉等都好搞鬼，就連甜品都有驚喜，把中式糖水變成雪糕，紅棗雪糕配合桃龍眼雪耳，雪糕用紅棗蓉、杞子和片糖造成，配埋清甜雪耳食，估唔到又幾match！

午餐肉夾車打芝士炸香，切開流心，食落香脆鹹香；還有春卷包Mozzarella芝士和午餐肉碎，蘸自家製墨西哥醬，甜中帶酸。

蛋卷用澳門英記的，烘熱蛋卷後把餡料注入，有四款口味，可先吃味道較輕怡的綠茶蛋卷配香草番茄水牛芝士醬和香葱蛋卷配忌廉芝士煙三文魚醬，再吃黑色的竹炭蛋卷，豆豉鯪魚醬充滿鹹香，口感幾得意；再吃朱古力蛋卷配辣朱古力mousse，甜中帶辛，似甜品多啲。餐具都是由Connie精心揀選，例如這隻木碟是用人手雕製，好有心思。

墨汁和梅子味冷麵，加上以洋葱、薑和蒜造成的蔥油，清爽開胃，配上大大件加拿大海膽，甘香新鮮，估不到又跟葱油味道幾夾。

醬汁用了磚半椒絲腐乳、辣椒乾混和Carbonara醬汁，並加入了忌廉和巴馬臣芝士，無落鹽，微辣中有適中腐乳鹹香，不會太重口味。配埋炸豆腐粒食，好香口。

八珍甜醋~份~外~~香！豬扒用梅頭肉，醃後加入八珍甜醋和八珍糯米醋煎香，甜甜酸酸。

把中式糖水變身為雪糕，雪糕材料包括紅棗和杞子，再加蛋和忌廉等打成，只落片糖不加白糖，配埋雪耳、紅棗和自己炸的琥珀合桃，雪糕都學人滋補。

.店主Tony和Connie一位讀Hospitality，一位讀Fashion，Tony負責下廚，Connie則負責餐廳設計，餐廳走型格工業風，開放式廚房搭鮮豔的貨櫃、雲石枱和不規則形狀的燈，成間餐廳都好有型！

2樓可容納十幾人，預計12月可開放預訂。

就連店名都玩食字，即將結婚的店主們，二人碰巧是8月26日生日(緣份啊~)，所以店名就同Eight26差唔多讀音啦。