三大外賣平台終於齊集觀塘區！外賣平台大比拼：實測推介心水外賣體驗！

*實測結果以測試當日為準，價格、優惠、送餐質素及其他服務有機會隨地區或時間有變動

1. 餐廳類別 – Deliveroo、foodpanda打和

今次嘅實測喺觀塘區進行，Lunch Hour同下午茶時段喺App介面上可以見到Deliveroo同foodpanda都有好多選擇，花多眼亂之際都係用篩選功能幫手搵出心水餐廳。菜式分類嚟講，大部分大路類別例如中式西式都有，呢方面Deliveroo同foodpanda嘅分類就較多，而且Deliveroo有得篩選個人口味及飲食要求，今次就係App到輸入「香辣」餐點要求，輕鬆揀到啱心水嘅餐廳，呢個功能夠哂細心！

2. 總金額 – Deliveroo勝出

今次嘅實測入面，兩輪嘅單點食物價錢大致相同，但係落單嘅時候Deliveroo有75折優惠，最多可以減到$25。而Lunch Hour時段，雖然KeeTa有商戶優惠減$5運費，但餐廳喺Deliveroo做緊免運費優惠，所以訂單總額Deliveroo最平。雖然KeeTa落單過$150有九折優惠，不過門檻太高，今次嘅實測就享用唔到呢個折扣喇。小溫提：大家落order前都可以留意運費部分，Deliveroo就算無免運費優惠，佢嘅原價運費都分別比foodpanda及KeeTa平$4同$1，作為打工仔，當然要慳得一蚊得一蚊！

至於下午茶時段嘅餐廳，Deliveroo及foodpanda都無免運費優惠，三間平台嘅原價運費都差唔多。雖然KeeTa照樣有商戶優惠減$5運費，但係Deliveroo都有75折優惠，一次過全單減$25，所以都係Deliveroo最平！

大家叫外賣之前，記得睇清楚餐廳喺外賣平台有無優惠，因為可以爭成幾十蚊㗎！

Lunch：臻味冰室

下午茶：小方糖甜品

3. 送餐時間 – Deliveroo勝出

送餐時間必定係其中一個大家最關心嘅地方。由落單開始計，三間外賣平台嘅預計送遞時間都唔同。以下大家可以一次過睇晒三個平台喺Lunch Hour同下午茶時段嘅送餐時間。兩次測試入面，Deliveroo都係準時而且最快送到；KeeTa喺Lunch Hour就遲咗5分鐘，但下午茶準時到；而foodpanda喺Lunch Hour大遲到，下午茶都遲咗5分鐘。foodpanda同KeeTa都分別有出現遲到嘅情況，所以今次實則嘅結果係Deliveroo勝出！

午餐

下午茶

不過如果外賣遲大到，平台會有補償計劃：Deliveroo有Plus會員專享嘅「準時承諾」，比預計時間遲15分鐘送達會有$25優惠券補償；KeeTa雖然無會員計劃，但都有「準時保」，遲到15分鐘以上會有$10優惠券，遲得越耐，賠得越多；至於foodpanda，無論會員定普通用家都未見有送餐時間上嘅保證服務。

4. 送餐質素 – Deliveroo、KeeTa打和

叫外賣最怕外送員心急、粗魯，將啲食物倒瀉晒。係Lunch Hour時段，foodpanda嘅凍檸茶有輕微倒瀉，倒到紙皮都濕濕地，不過都唔算太影響整體食物質素；而Deliveroo同KeeTa都無倒瀉，下午茶時段就三間外賣都無問題！

午餐

下午茶

5. 最低消費 – Deliveroo、foodpanda打和

一個人想叫外賣，叫唔夠百幾蚊仲要加個「小型訂單費用」，有時都幾肉赤，所以門檻低嘅最低消費金額對用家嚟講都幾重要。今次實測， Deliveroo 同foodpanda係觀塘區嘅低消係$50，而KeeTa就要成$60，所以呢一回合係Deliveroo同foodpanda比較優勝！

6. 其他優惠 – Deliveroo、foodpanda、KeeTa打和

除咗外賣服務，Deliveroo同foodpanda都有外賣自取服務，而且仲有低至6折嘅優惠，如果餐廳喺附近，不妨選擇自取，抵好多！

另外，Deliveroo同foodpanda都有會員制度，成為會員後可享免運費同埋喺指定餐廳享有折扣優惠。如果係Deliveroo Plus會員，未計運費滿$100嘅訂單可享免運費，但pandapro會員就要$120先享用到呢個免運費福利喇。無論係咪foodpanda會員，你都可以用到panda rewards，儲印花賺積分當錢洗！而KeeTa就暫時未有會員計劃，但註冊成為新用戶有$300優惠券之外，近日仲推出半價券，大家可以密切留意官方update。

三間外賣平台幾乎每個禮拜推陳出新，每間嘅優惠各有千秋，所以呢part三間都打和。大家真係要mon實post，因為優惠驚喜隨時都會出現！

迎新優惠方面，如果你係被推薦者，KeeTa嘅新用戶有$300優惠券，而foodpanda及Deliveroo嘅新會員分別可獲$150及$100優惠券。如果成功推薦朋友用KeeTa，你可以得到$50優惠券，而邀請朋友用foodpanda及Deliveroo，就有$50及$100優惠券。

7. 服務範圍 – Deliveroo、foodpanda打和

Deliveroo同foodpanda喺香港已經營運多年，基本上覆蓋大部分地區。但係最新打入香港市場嘅KeeTa，服務範圍暫時只覆蓋九龍區，不過KeeTa計劃年底前會將服務範圍擴展至全港，港島、新界地區嘅朋友就要再等吓喇。

總結

每個外賣平台嘅表現各有千秋，而Deliveroo係價格、送餐時間及準時度方面勝出，其他方面都表現良好；foodpanda及KeeTa嘅表現就有待改善，不過整體上呢兩間平台嘅外賣體驗都尚算滿意！