台灣直送│地道 台式火鍋 配罕見台菜 ＠Dining娜

Photo：二彤、Barry

有時經常打邊爐難免燥熱，如果好似我Dining娜咁係個火鍋控又怕熱氣，食 台式火鍋 就啱晒喇！因為佢主要用唔同嘅藥材炮製成台式藥膳火鍋，養生得嚟，最重要係補而不燥，喺呢個準備入秋嘅季節食就最啱！

我講嘅就係養心殿台式養生鍋，佢哋專供6款健康養生湯底。除咗旺角，佢哋上個月剛剛喺銅鑼灣開新店，我班港島區工作嘅朋友即刻拉隊去食，個個都話味道夠晒正宗，而且唔少配料都好地道，就連多款新鮮蔬菜都係台灣直送，當中幾款喺香港仲幾少見添！

台式火鍋 地道罕有靚菜

我班閨密個個都話食火鍋要食得健康，先無罪咎感，大家都盛讚養心殿有多款台灣靚菜選擇！而且每日由台灣空運直送，新鮮之餘，又夠特別，喺香港唔容易食到。例如原條珍珠筍、台灣水耕菜，兩者都可以生食或者灼熟食，清爽帶少少甜味。9至10月，店主就推介大家食台灣時令嘅翠絲水蓮菜，佢纖維高、含豐富維他命B12，亦有排油作用，質感係菠菜同韮菜花之間，口感唔錯，係今期食 台式火鍋 嘅必點靚菜。四季都有嘅台灣A菜、青江菜，好有菜味，都係熱賣蔬菜，店主強調，台灣A菜並非油麥菜，係正宗來自台灣嘅。

店主推介必食：牛胸爽、炸豆皮

養心殿有唔少台灣直送嘅火鍋配料，好似鴨血，台灣控必食！另外，店主大力推介牛胸爽，由於部位刁鑽，所以限量供應。牛胸爽口感似軟骨，爽口有嚼頭，放湯灼3秒至剛剛熟就食得。台灣空運嘅炸豆皮一定要試，灼完都唔會散，有咬口兼夾豆味濃；而炸響鈴係深水埗公和出品，柯打後即叫即炸，熱辣辣奉上，兩者都係店主推介！

白肉苦瓜係台灣特產，養心殿嘅蜂蜜白苦瓜汁可以話係落重本，用上1斤（大約2/3個）台灣大白肉苦瓜榨汁，超足料；再加蜂蜜減少苦澀，平衡甜味，食住火鍋飲最正！

店主透露，位於大鴻輝中心嘅荃灣新店會喺11月開業，屆時又多一個聚腳點喇！

養心殿台式養生鍋

銅鑼灣店：軒尼詩道418-430號友光大廈3樓（2577 4400、2577 4401）（顯示地圖）
旺角店：彌敦道607號新興大廈1樓106-112號舖（2323 3123、2323 3698）（顯示地圖）
荃灣店：眾安街55號大鴻輝（荃灣）中心17樓（2440 0300、2440 0332）（11月中開業）（顯示地圖）
備註：設加一，收現金及信用卡