【出街搵食】西班牙混血男讀火腿課程！元朗開店 即買即切 平連鎖店4成｜元朗西班牙菜｜

撰文：Lisa 攝影：Fion

混血店主 親到西班牙學藝

面前這位老闆，是西班牙混血男Jon，他自少在元朗長大，精通廣東話及西班牙文，之前一直在西班牙領事館工作。6年前，因緣際會在網上購得關於切火腿的書，愈睇愈有興趣，就電郵與作者聯絡。從對方得知，Universidad De Cordoba正開辦一個為期一周的火腿課程，他就決定飛過去從頭學起。雖然只是短期課程，但由黑毛豬的血統沿流到營養學，都有觸及。

「讀完先發覺香港賣火腿的零售未夠專業，賣的買的都只看重年份，其實一隻火腿涉及很多專業知識。」

為了對行業加深了解，Jon走訪了4大產區，造訪豬場及作坊，最後決定將好吃的引入香港。「香港人認識的多是marketing做得很好的大牌子，其實很多細廠，做了幾代，價錢平出品又好。好似南部近海的Guijuelo就有幾百間火腿場，因為山上氣候特別適合風乾火腿，我去過其中一間叫Hernandez的家庭作坊，做了5代，不算最top，但勝在品質穩定，抵食。」一講起火腿，Jon果然停不了口。

即切火腿 平連鎖店近4成

事實上Jon賣的火腿定價，確實比大型超市平4成。人家60個月賣近$450；這裡$290有交易，而且都是「即時手切」。Jon很強調手切：「機切的火腿通常先去骨，入模壓成磚去切，再靚的肉，纖維都會被破壞；再者切好真空入袋再上架，隨時一、兩個月才到食家手上，香味都流走了。」

所以Jon堅持火腿原隻來貨，有客才即切，保證新鮮。「手切還有另一個好處，就是可以因應肉質，去掉筋位、脂肪位。」吃一塊Jon即片的火腿，油香出眾，7分肉、3分肥，完全沒有筋位，不黐牙。除了火腿，店中尚有少量即製tapas供外賣。

店鋪除了售賣火腿外，亦有供應西班牙菜小食，如西班牙地道小食憤怒蛋、炸丸子及伊比利火腿配法包。

最後，再俾個貼士你，這裡所賣的西班牙酒價錢都好實惠，手工啤才$15/枝；連Robert Parker評八、九十分的Cava都只是一百蚊，Jon話旨在方便人客配火腿。下次開party，你知去邊度入貨喇﹗

香港人對西班牙火腿的3個迷思

1.「揀火腿，睇上面個月份就夠，數字愈大就愈正﹗」

正解：啱一半﹗除了月份，豬的血統、產地都影響火腿的口感、風味。好似100%伊比利豬和75%伊比利豬，前者油份甘香；後者就肉味較濃，沒有好壞，都是個人口味。揀火腿時，還要留意產區，有4大法定產區認證標簽，較有保證。

2.「呢度寫明「全橡果」，即係隻豬淨係食橡果大，油香特別充沛。」

正解：橡果產季只在每年10至3月，其餘時間伊比利豬會以玉米、大豆為糧。橡果季過後，豬隻就會馬上送到屠房，西班牙政府規定，豬隻至少要在橡果季增重46kg，才能標簽為「全橡果」。

3.「火腿是醃製食品，放雪櫃至少一年無問題。」

火腿的確是醃製食品，不易壞，不過存放半年，風味會慢慢流失。未開封的，放雪櫃可保存三數個月；開封後最好兩天吃完。由於雪櫃的冷氣會將香味凝固，所以吃前20分鐘取出放在室溫，令油香解封。又或者連同真空包裝放入溫水泡1分鐘亦可。

每日設兩款火腿試食

店子面積較小，但每日仍設兩款不同級數的火腿供應，供客人試食。喜歡火腿的朋友不要錯過啦！

火腿莊 Jon’s Jamon
地址：元朗金輝徑28號好盛洋樓地下14B號舖
電話：3482 0086
營業時間：星期二至日12nn-10pm；星期一 12nn-8pm
備註：不設加一，只收AE

延伸閱讀：元朗最新美食合集2018！巨型炸雞髀+濃湯牛肉麵+花膠雞湯翅

延伸閱讀：【出街搵食】荃灣小商場 日本廚藏身！師承奈良洋食屋 秘製肉醬漢堡扒 | 荃灣美食日本菜 |